تاراپتار 2015 جىلعى 21 جەلتوقساندا استانا قالاسىندا قول قويىلعان كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدى (كاىك) ىسكە اسىرۋ ءۇشىن بىرلەسكەن قادامداردى كورسەتەتىن جول كارتاسىن ازىرلەۋ جۇمىستارىن باستاۋ قاجەتتىگى تۋرالى كەلىستى. (قازىرگى كەزدە كاىك-ءتى ەو-عا مۇشە بارلىق 28 مەملەكەت راتيفيكاتسيالاۋعا دەيىن ۋاقىتشا قولدانۋ رەجيمىندە قولدانىپ كەلەدى: بۇل رەتتە, ەو-عا مۇشە 23 مەملەكەت جانە ەۋروپالىق پارلامەنت ونى بەكىتتى).
سونىمەن قاتار, ق.ءابدىراحمانوۆ جانە ت.حريستەا ەۋرازيا قۇرلىعىنداعى ءوزارا بايلانىس جانە كولىكتىك-لوگيستيكالىق قاتىناستاردىڭ پەرسپەكتيۆالىق باعىتتارىن, سونداي-اق ورتالىق ازيا مەملەكەتتەرى اراسىنداعى ىنتىماقتاستىقتىڭ اعىمداعى وڭ ۇردىستەرىن قاراستىردى. ەۋروپالىق وداق وكىلدىگىنىڭ باسشىسى ازىرلەنىپ جاتقان ەۋروپا مەن ازيا اراسىنداعى ءوزارا بايلانىس جونىندەگى ەۋروپالىق وداقتىڭ ستراتەگياسىن وسى جىلدىڭ قازان ايىندا وتەتىن «ازيا-ەۋروپا» فورۋمى سامميتىنە (اسەم) دەيىن بەكىتۋ كۇتىلىپ وتىرعانىن ايتىپ ءوتتى. سونىمەن قاتار, ءوڭىر ەلدەرى, ونىڭ ىشىندە قازاقستان بەلسەندى قاتىسىپ وتىرعان ورتالىق ازيا بويىنشا ەو-نىڭ جاڭا ستراتەگياسىن ازىرلەۋ پروتسەسى جالعاسۋدا. ەو-نىڭ جاڭا ستراتەگياسى 2019 جىلدىڭ ەكىنشى جارتىسىندا قابىلدانادى دەپ بولجانۋدا.
اۋعانستانداعى تۇراقتى دامۋعا جاردەمدەسۋ ماسەلەلەرىندە ىنتىماقتاستىققا ەرەكشە نازار اۋدارىلدى. ەو ەلشىسىنىڭ ايتۋىنشا, قازاقستاندىق تاراپتىڭ ءتيىستى باستاماسىنا جاۋاپ رەتىندە ەۋروپالىق كوميسسيا 2010 جىلدان بەرى جۇزەگە اسىرىلىپ كەلە جاتقان قازاقستاننىڭ اۋعانستان ءۇشىن ءبىلىم بەرۋ باعدارلاماسىن دامىتۋ شەڭبەرىندە قازاقستاننىڭ جوعارى وقۋ ورىندارىندا اۋعان ايەلدەرىن وقىتۋ جوباسىن قارجىلاندىرۋدىڭ ءبىرىنشى كەزەڭىن دايىنداۋعا كىرىستى.
كەزدەسۋ بارىسىندا ەۋروپالىق ديپلومات قوعامدىق ءومىردىڭ ءتۇرلى سالالارىنداعى قۇقىق ۇستەمدىگى مەن زاڭنامانى جەتىلدىرۋگە باعىتتالعان قازاقستاننىڭ ينستيتۋتسيونالدى رەفورمالارىن ىسكە اسىرۋ بارىسى تۋرالى حاباردار بولدى.
ق. ءابدىراحمانوۆ ەكونوميكالىق دامۋ ءۇشىن جاڭا ىنتالاندىرۋ شارالارىن, ورتا تاپتى نىعايتۋ جانە ەلدىڭ ادامي الەۋەتىن ودان ءارى دامىتۋعا باعىتتالعان پرەزيدەنت نۇرسۇلتان نازارباەۆتىڭ بەس الەۋمەتتىك باستاماسىمەن ەگجەي-تەگجەيلى تانىستىردى.
وسى ورايدا, تاراپتار اتالعان باستامالاردى ىسكە اسىرۋدا قازاقستان مەن ەۋروپالىق وداقتىڭ ءوزارا ىقپالداسۋ جولدارىن تالقىلاي وتىرىپ, وسىلار قر مەن ەو ىنتىماقتاستىعىنىڭ نەگىزگى باعىتتارىنا, وعان مۇشە مەملەكەتتەردىڭ جانە قارجى ينستيتۋتتارىنىڭ, اتاپ ايتقاندا ەۋروپالىق قايتا قۇرۋ جانە دامۋ بانكىنىڭ نەگىزگى باعىتتارىنا تولىق سايكەس كەلەتىندىگىنە نازار اۋداردى.
