ۆەدومستۆو باسشىسى كەلتىرگەن دەرەكتەر بويىنشا ءوڭىر 2016-2019 جىلدارعا ارنالعان «دەنساۋلىق» مەملەكەتتىك باعدارلاماسىن جۇزەگە اسىرۋدا كوش سوڭىندا كەلەدى. رەسپۋبليكالىق كورسەتكىشتەرمەن سالىستىرعاندا جۇرەك-قان تامىرلارى اۋرۋلارى – 9, انالار ءولىمى – 18, بالالاردىڭ شەتىنەۋى – 13, جاراقاتتار مەن تاماقتان ۋلانۋ 56 پايىزعا كوپ. سوندىقتان تۇرعىندارعا مەديتسينالىق كومەكتەر بەرۋ مەن ۇيىمداستىرۋداعى ولقىلىقتاردى, ياعني جىلدار بويى قوردالانعان پروبلەمالاردى جەدەل ءارى كەشەندى تۇردە شەشۋ مىندەتتەلدى. مينيستر ءبىر ايدىڭ ىشىندە ايماقتىق جوسپاردى قايتا قاراپ, ءتۇزۋدى, بارلىق باس دارىگەرلەر مەن ورىنباسارلاردى اتتەستاتسيادان وتكىزەتىن باقىلاۋ كەڭەسىن قۇرۋدى تاپسىردى. ايماقتاردا تولىق ەلەكتروندى قۇجات الماسۋ فورماتى ەنگىزىلىپ جاتقانى, مۇنىڭ ءوزى كورسەتىلەتىن قىزمەتتەردىڭ ساپاسىن ارتتىرۋعا, قاعازباستىلىقتى ازايتۋعا ەلەۋلى ىقپال جاسايتىنى اتاپ ءوتىلدى. ەل بيۋدجەتىنىڭ 11 پايىزى دەنساۋلىق ساقتاۋ سالاسىنا باعىتتالادى. ونىڭ 60 پايىزى ستاتسيونارلىق مەديتسينالىق كومەك بەرۋگە جۇمسالادى. بيىل تەگىن ءدارى-دارمەك ساتىپ الۋعا 1 ميلليارد 300 ميلليون تەڭگە قاراستىرىلدى. ساقتاندىرىلماعان ازاماتتاردىڭ سانى ءۇش ميلليونعا جۋىقتىعى ەسكەرىلىپ, جۇيەنى ەنگىزۋ ءبىر جىلعا شەگەرىلدى. رەسەيدە تەگىن مەديتسينالىق قىزمەت الۋ تىزىمىندە 36-38 ناۋقاس ءتۇرى قامتىلعان. كەي مەملەكەتتەردە ونشاقتى عانا. قازاقستاندا 263-كە جۋىقتايدى. الداعى ۋاقىتتا ديسپانسەرلىك تىزىمگە ەنەتىن كەسەلدەر قايتا رەسىمدەلىپ, ون ەسەگە دەيىن قىسقاراتىن بولادى دەي كەلىپ, ە.ءبىرتانوۆ وبلىستاعى 11 كوپ سالالى اۋرۋحانانىڭ ەسكىرگەنىن, 500 توسەكتىڭ بوس تۇراتىنىن, بۇدان بىلاي شاعىن ەمدەۋ ورىندارى سالىنبايتىنىن, 400 توسەكتەن كەم بولمايتىنىن, سوندا تولىق قۋاتىندا جۇمىس ىستەپ, ەم-دوم الۋ ارزانعا تۇسەتىنىن ايتتى. وبلىستا 700 توسەكتىك اۋرۋحانا تۇرعىزۋ ماقساتىمەن قاراجات كوزدەرى ىزدەستىرىلىپ جاتقانىن جەتكىزدى.
دەنساۋلىق ساقتاۋ سالاسىندا تۇيتكىلدى جايتتاردىڭ جەتىپ-ارتىلاتىنىن وبلىس اكىمى دە راستادى. بۇعان №1 قالالىق ەمحاناعا ەش ەسكەرتۋسىز بارعاندا كوز جەتكىزىپتى. ەمدەلۋشىلەر ۇزىن-سونار كەزەكتە تۇرۋعا ءماجبۇر, ساعاتتاپ توساتىن جايتتار از كەزدەسپەيدى. الەۋمەتتىك جەلىلەر ارقىلى دا رەنىشتەر كوپ ءتۇسىپ جاتادى. بۇدان بىلاي دارىگەرلەردىڭ جۇمىسى ەلەكتروندى جۇيە ارقىلى باعالانادى. وبلىستا ءبىر عانا بالالار گەماتولوگى بار. قالادا بالالار كارديولوگى, اللەرگولوگ دارىگەر جوق. ونىڭ ءبىر سەبەبى باسپانا جايىنا كەلىپ تىرەلەدى. وسى سەبەپتى ادامداردىڭ رەسەيگە بارىپ ەمدەلۋلەرىنە, ال بىلىكتى مامانداردىڭ باسقا جاقتارعا قونىس اۋدارۋلارىنا تۋرا كەلەدى.
مينيستر م.قوزىباەۆ اتىنداعى سقمۋ-دا مەديتسينالىق فاكۋلتەتتىڭ اشىلۋىن قۇپتاپ, مەملەكەتتىك تاپسىرىس بەرۋگە ءازىر ەكەنىن مالىمدەدى. وبلىستىق اۋرۋحانادا, ونكولوگيالىق ديسپانسەردە, جەدەل قىزمەت كورسەتۋ ورتالىعىندا بولىپ, حالىق دەنساۋلىعىن جاقسارتۋعا ارنالعان شارالارمەن تانىستى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
