مەملەكەتتىك «وڭىرلەردى دامىتۋ» باعدارلاماسى اياسىندا سالىناتىن قۇرىلىس نىسانىنا 280 ميلليون تەڭگە قارجى قاراستىرىلىپ وتىر. ءۇرجار اۋداندىق تۇرعىن ءۇي-كوممۋنالدىق شارۋاشىلىق جانە قالا قۇرىلىسى ءبولىمىنىڭ سەكتور مەڭگەرۋشىسى سولتانعازى ەلەمەسوۆتىڭ ايتۋىنشا, قازىرگى ۋاقىتتا ءۇيدىڭ جوبالىق-سمەتالىق قۇجاتتامالارى ازىرلەنىپ, مەملەكەتتىك ساراپتامادان وتكىزىلگەن.
«قۇرىلىسقا تەك وتاندىق ونىمدەردى پايدالانامىز. نىسان ورتالىقتاندىرىلعان سۋمەن, ورتالىقتاندىرىلعان جىلۋمەن قامتاماسىز ەتىلەدى. قالاداعى ۇيلەردەن ەش كەم بولماۋعا ءتيىس», - دەگەن ول قۇرىلىس جۇمىستارى ساتىمەن اياقتالسا كوپبالالى انالار مەن اسىراۋشىسىنان ايىرىلعان بالالار, الەۋمەتتىك جاعىنان از قامتىلعان وتباسىلار مەن مەملەكەتتىك قىزمەتكەرلەر باسپانامەن قامتىلاتىنىن جەتكىزدى. اۋداندىق ءماسليحاتتىڭ دەپۋتاتى زۋحرا تۇراپوۆا قازىرگى كۇنى اۋداندا 600-دەن استام ادام باسپانا كەزەگىندە تۇرعانىن ايتادى.
«2015 جىلى اۋدان اكىمى سەرىك ءزاينۋلديننىڭ باستاماسىمەن 27 پاتەرلى تۇرعىن ءۇي بوي كوتەرىپ, ناتيجەسىندە 27 وتباسى باسپانالى بولعان ەدى. بيىل كوپقاباتتى تۇرعىن ءۇي حالىق يگىلىگىنە بەرىلسە اجەپتاۋىر كومەك بولاتىنى انىق», - دەيدى ول.
ازامات قاسىم,
«ەگەمەن قازاقستان»
شىعىس قازاقستان وبلىسى,
ءۇرجار اۋدانى
