ارۋلاردى سول مەرەيلى مەزگىلدىڭ العاشقى اپتاسىندا قۇتتىقتايتىندار از ەمەس. ءبىزدىڭ تىلەك تە سونداي ىزگى نيەتتى وزىنە ماقسات تۇتقانداي. جالپى, تابيعاتتىڭ تامىرىن بۇلكىلدەتىپ تۇرعان قوس باستاۋ, سۇلۋلىقتىڭ سۋاتى – انا بولسا, تىرشىلىكتىڭ قۋاتى – اكە. سول سۇلۋلىقتان تارايتىن ادامي ۇلى مورالدىق قاسيەتتەر, انالىق مەيىرىم, نازىك ءيىرىم, ءبارى-ءبارى ەرتە كوكتەمدە ءبۇر اتىپ, بۇكىل ادامزاتتىڭ رۋحاني بولمىسىن ءتۇرلى-ءتۇستى الەمگە بويايدى. بۇل رەتتە كەز كەلگەن انانى شىعارماڭا شىراق قىلۋعا بولاتىنداي. الايدا, باتىر انالاردىڭ, باتىر باپتايتىن بەسىك يەلەرىنىڭ, ساردارعا ساداق تارتۋدى ۇيرەتكەن جاۋىنگەر حانىمدارداي تۇرپاتى بولەك نازىك جاندىلاردىڭ ءجونى مەن جولى ءبىر باسقا.
ءبىزدىڭ بۇگىنگى لەپەس سوندايلىق تۇلعا, رەسپۋبليكالىق ق.مۇڭايتپاسوۆ اتىنداعى وليمپيادا رەزەرۆىنىڭ مامانداندىرىلعان مەكتەپ-ينتەرنات-كوللەدجىنىڭ ادىسكەرى, قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى تاتيانا چيركوۆاعا ارنالماق.
جالپى, تاتيانا نيكولاەۆنا جايلى ايتپاس بۇرىن, ايەلدىك ادەمى الەمىن جوعالتپاي-اق اسكەري ءتارتىپتىڭ ادەپكى ءادىس-ءتاسىلىن جەتىك مەڭگەرگەن قىز-كەلىنشەكتەردىڭ قىزمەتىن ايتا كەتكەن ءجون. ەڭ الدىمەن اتالعان اۋىر جولدى تاڭداعان ايەل زاتىندا مىنەز بولۋ كەرەك شىعار. قايتپاس قايسارلىق, وشپەس وجەتتىك ارۋعا ەڭ اسىل قارۋ بولسا كەرەك. ونىڭ ۇستىنە قازىرگى تاڭدا قىزمەتىنىڭ قىر-سىرىن جەتىك بىلەتىن ساۋاتتى ماماندار از. مەڭگەرگەن ماماندىقتان بولەك, ابزال ىستەرىمەن, ادامدىق ءھام انالىق بولمىسىمەن ايانباي ەڭبەك ەتۋ اناۋ-مىناۋ ادامنىڭ قولىنان كەلە بەرمەسى دە انىق. مۇنى نەگە ايتىپ وتىرمىز؟ ماسەلە, تەمىردەي ءتارتىپتى تالاپ ەتەتىن, قىزدار تۇگىلى قىلشىلداعان جىگىتتەردىڭ ءوزى بايقاپ-بايقاپ باراتىن جۇمىسقا ءبىزدىڭ كەيىپكەر ءبىر ەمەس, ەكى ءتۇرلى ومىربايانىمەن باق سىناپتى. ايتالىق, تاتيانا نيكولاەۆنا ەڭ ءبىرىنشى پاۆلودار قالاسىنداعى پەداگوگيكالىق تەحنيكۋمدى, ودان كەيىن پەدينستيتۋتتى تامامداعان سوڭ ءوزىنىڭ ەڭبەك جولىن الماتى قالاسىنداعى باۋىرجان مومىش ۇلى اتىنداعى رەسپۋبليكالىق اسكەري مەكتەپ ينتەرناتىندا باستاعان. كەيىن ەلوردامىز ارقا توسىندە بوي كوتەرگەننەن كەيىن گەنەرال ساعادات نۇرماعامبەتوۆ اتىنداعى «جاس ۇلان» مەكتەبىندە مۇعالىم بولىپ قىزمەت ەتەدى. تاتيانا حانىم ءجۇرىپ وتكەن ۇستازدىق ۇلاعاتتى جولداردىڭ باسقا باعباندىقتان ءباسى ءبىر باسقا بيىك ەكەنىن دە وسى جەردە ايتا كەتكەن ءجون. سەبەبى بولاشاق ەل نامىسىن قورعايتىن باتىرلاردىڭ بويىنا رۋح, ساناسىنا ءبىلىم قۇيۋ باسقا سيپاتتاعى مۇعالىمدىك. ەڭ العاشقى ەڭبەك جولىنان باستاپ بالا تاربيەسىمەن اينالىسىپ كەلە جاتقان ىزگىلىك يەسىن بولاشاق پاتريوتتاردىڭ باعبانى دەۋىمىز سوندىقتان شىعار. قىزمەتىنە قىزۋ كىرىسە كەتەتىن, ەڭبەك ەتە ءجۇرىپ ءوز ارىپتەستەرىنە سىيلى, بەدەلدى قىزمەتكەر اتانۋ دا جەمىستى جول.
– العاشقى ۋاقىتتا بۇرىن ماعان تانىس ەمەس تارتىپكە بوي ۇيرەتۋ وڭاي بوماعانى انىق, – دەيدى ءبىزدىڭ كەيىپكەرىمىز. – الايدا, بۇل سالادا سان قىرلى تاجىريبە جينادىق. ونى تەك ءوزىمىزدىڭ يگىلىككە عانا پايدالانباي, ول جىگەردى بولاشاقتىڭ بويىنا سىڭىرۋگە جۇمىس ىستەپ كەلەمىز. جۋىردا ءوزىمىز جۇمىس ىستەيتىن ءبىلىم ورداسىنا اۋعان سوعىسىنىڭ ارداگەرلەرىن قوناققا شاقىرىپ, جاس ۇلانداردى كوزى ءتىرى قاھارماندارمەن جۇزدەستىردىك. كەيدە مەنەن سۇرايدى: اسكەري مەكتەپتە جۇمىس ىستەپ كەلىپ, وليمپيادالىق رەزەرۆكە بالا دايىنداۋ قيىندىق اكەلمەي مە دەپ؟ ونىڭ قايتا ءوز ارتىقشىلىعى بار دەر ەدىك. سەبەبى وتان نامىسىن قيىن كۇندە قارۋمەن, بەيبىت كۇندە بىلعارى قولعاپپەن قورعاۋ كەرەك. مىسالى, كەشەگى كۇننىڭ باھادۇرلەرى قاجىمۇقان مۇڭايتپاسوۆ, باۋىرجان مومىش ۇلى, ساعادات نۇرماعامبەتوۆ بولسا, بۇگىندە ول ءداستۇردى باقىتجان ەرتاەۆ, سەرىك ساپيەۆ جالعاپ كەلەدى. ءبىز سولارعا باعبان, باعدارلاۋشى بولساق, ءوزىمىزدىڭ وتان الدىنداعى بورىشىمىزدى تۇگەل وتەگەنىمىز, – دەيدى ت.چيركوۆا.
جالپى, پاتريوتتىق تاربيە دەگەنىمىز تەك وتانعا دەگەن جالاڭ سۇيىسپەنشىلىكپەن ەمەس, وتباسىنداعى ۇلگى-ونەگە مەن مەكتەپتەن باستالاتىن ءمىنسىز قىزمەتكە دە بايلانىستى. تاتيانا, ەندەشە سونداي ۇلاعاتتى ۇستاز, بولاشاق باعبانى دەر ەدىك.
ميراس اسان,
«ەگەمەن قازاقستان»
