مۇنداي جاعدايدا تەك شىن مانىندە قۋاتتى مەملەكەتتەر عانا الەۋمەتتىك ينفراقۇرىلىمدى نىعايتۋىن جالعاستىرىپ, ءوز ازاماتتارىنىڭ ءومىر دەڭگەيىن ودان ءارى كوتەرۋگە قاۋقارلى. ەلباسىنىڭ بۇگىنگى «بەس الەۋمەتتىك باستاماسى» قازاقستاننىڭ قۋاتى مەن الەۋەتىن الەمگە تانىتتى.
«پرەزيدەنتتىڭ بەس الەۋمەتتىك باستاماسى» وركەندەۋ ءۇشىن جاڭا العىشارتتار تۋعىزادى. بۇل رەتتە ول بۇعان دەيىن جاريالانعان جانە جۇزەگە اسىرىلىپ جاتقان جاڭعىرۋ يدەيالارىمەن جاقسى قابىسادى.
ەگەر ءجىتى ۇڭىلسەك, نۇرسۇلتان نازارباەۆتىڭ وسى باستامالارى, ەڭ الدىمەن, ەشكىمگە ماسىل بولىپ قاراپ وتىرمايتىن, قايتا بويىنداعى بار الەۋەتىن قاجەتكە جاراتىپ, ەڭبەك ەتەتىن, ىلگەرى باساتىن, ءبىلىم-عىلىم يگەرەتىن بارشا جىگەرلى قازاقستاندىقتارعا ارنالعانىن بايقاۋعا بولادى. اتاپ ايتقاندا, رەسمي تابىسى بار, بىراق باسپاناسى جوق ازاماتتارعا 7 پايىزدىق مولشەرلەمەمەن 25 جىلعا جەڭىلدەتىلگەن يپوتەكا بەرىلمەك. جالاقىسى تومەن سانالاتىن جۇمىسكەرلەرگە سالىناتىن سالىق ون ەسە ازايتىلىپ, 1 پايىز عانا بولادى. مۇنداي يگىلىكتى ءتىپتى دامىعان ەلدەردە تابۋ قيىن. سونىمەن بىرگە جوو-عا تۇسكىسى كەلەتىن جاستار ءۇشىن ءبىلىم گرانتى 20 مىڭعا ۇلعايتىلادى. بەس جىل ىشىندە ەڭ كەمى 75 مىڭ ستۋدەنتتى قامتيتىن جاڭا جاتاقحانالار قولدانىسقا بەرىلۋگە ءتيىس. بۇدان بولەك, ءوز بيزنەسىن اشقىسى كەلەتىن ىسكەر-ىسمەر جاندارعا بيىل 62 ميلليارد تەڭگە كولەمىندە شاعىن نەسيەلەر ۇسىنىلادى. مۇنىڭ بارلىعى حالىق تاراپىنان كەڭ قولداۋ تابارىنا سەنەمىن. ويتكەنى كەز كەلگەن عاسىردا, كەز كەلگەن قوعامدا جاڭعىرۋدىڭ ۇستىنى – ەكونوميكالىق بەلسەندى تۇرعىندار مەن ءتيىمدى جۇمىس جاسايتىن ينستيتۋتتار بولعان.
ماسەلەن ءۇيى بولماي, كۇيى كەلمەي جۇرگەن وتباسىلاردان رۋحاني جاڭعىرۋدى, جاڭا تەحنولوگيالىق سەرپىنگە سەپتەسۋدى سۇراۋ قيىن.دەمەك, بەس باستاما بولاشاققا دا باعدارلانىپ وتىر. ال ەلىمىزدىڭ كەلەشەكتەگى دامۋ باعدارى مەن بەت الىسى بۇگىنگى جاڭعىرۋلاردىڭ تابىسىنا تىكەلەي بايلانىستى بولادى.
تاعى ءبىر نازار اۋدارار جايت, بىرلىك ۇعىمى ەلباسىنىڭ بۇگىنگى ۇندەۋىنىڭ ءون بويىنا «التىن ارقاۋ» بولىپ ورىلگەن. «بۇگىنگى باستامالار ەلىمىز تۇتاس, قوعامىمىز تۇراقتى بولسا عانا تابىستى جۇزەگە اسادى. ال ەل بىرلىگى – ەڭ ءبىرىنشى, قازاقتىڭ بىرلىگى. جاھاندىق كوشتىڭ باسىندا جۇرەتىن مەرەيلى ەل بولۋ ءۇشىن بىرلىك پەن ىنتىماق الدىمەن وزىمىزگە, قازاققا كەرەك. تاريحتىڭ ءوزى دالەلدەگەن ءبىر اقيقات بار – حالقىمىز بىرلىكتە بولسا كۇشەيگەن, بىرلىگى قاشسا السىرەگەن», – دەدى مەملەكەت باسشىسى.
ەندەشە ازاتتىقتىڭ شيرەك عاسىردان استام تاريحىندا تاتۋلىعى مەن كەلىسىمىن ساقتاي بىلگەن قازاقستان حالقى ءۇشىن ەندى ءارى قاراي دا اينىماس اۋىزبىرلىگىن, جارقىن بولاشاققا ۇمتىلىسى مەن جاسامپازدىعىن بەكەمدەي ءتۇسۋى – پارىز. سەبەبى ەلباسى ايتقانداي, ۇندەۋدىڭ سىرى – بىرلىكتە, جۇدەۋدىڭ سىرى – الاۋىزدىقتا.
باقىتبەك سماعۇل,
اۋعان سوعىسى ارداگەرلەرى ۇيىمدارى «قازاقستان ارداگەرى» قاۋىمداستىعىنىڭ توراعاسى
