جاڭا اكتسيا اياسىندا «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ جاسى 103-كە كەلگەن استانا قالاسىنىڭ تۇرعىنى, ەڭبەك جانە تىل ارداگەرى دانا قۇلمۇحامەدقىزى دوسپولوۆانى قۇتتىقتادى. اپامىز ۇيىنە ارنايى كەلىپ, مەرەكەلىك كوڭىل-كۇي سىيلاعان نۇروتاندىقتارعا ريزاشىلىعىن ءبىلدىرىپ, اق باتاسىن بەردى.
دانا اجە 1915 جىلدىڭ 12 قىركۇيەگىندە اقمولا وبلىسىنىڭ قورعالجىن اۋدانىنا قاراستى جانتەكە اۋىلىندا تۋعان. جاستايىنان ەڭبەككە ارالاسقان اسىل اجەي ەل تاريحىندا ەرەكشە ماڭىزعا يە ءترانسسىبىر تەمىر جول ماگيسترالىنىڭ قۇرىلىسىنا دا ۇلەس قوسقان. اتالعان ماگيسترالدى سالۋ كەزىندە اپامىز اسپاز بولىپ جۇمىس ىستەگەن ەكەن. سوعىس جىلدارىندا دا تىلدا ەسەلى ەڭبەك ەتىپ, ۇلى جەڭىستى جاقىنداتقان جانداردىڭ قاتارىندا بولدى.
دانا اجەيدى بارشا نۇروتاندىقتاردىڭ جانە ەلباسى, پارتيا توراعاسىنىڭ اتىنان شىن جۇرەكتەن قۇتتىقتاپ, سىي-سياپات تارتۋ ەتكەن ماۋلەن اشىمباەۆ زاتى اسىل وسىنداي اپالارىمىزدىڭ ونەگەگە تولى ءومىر جولى جاس ۇرپاققا قاشاندا ۇلگى ەكەنىن ايتتى. ولار وتكەن عاسىردىڭ قيىن-قىستاۋ كەزەڭدەرى: ازامات سوعىسى, تاريحىمىزدا زۇلمات جىلدار دەپ تاڭبالانعان ساياسي قۋعىن-سۇرگىن جانە ۇلى وتان سوعىسى سياقتى نەبىر تار جول, تايعاق كەشۋلەرگە تايسالماي توتەپ بەرىپ, ەلىنىڭ ەرتەڭى ءۇشىن ايانباي كۇرەسە ءبىلدى. سول ارقىلى اپالارىمىز قايسار رۋح پەن جالىندى جىگەردىڭ جارقىن ۇلگىسىن كورسەتتى. سونىڭ ناتيجەسىندە اياۋلى دا اسىل اپا-اجەلەرىمىز قازاقستاننىڭ تاۋەلسىز ەل اتانعانىنا كۋا بولدى. بۇگىندە ولار ازات ەلدىڭ ازات ۇرپاقتارىن تاربيەلەپ, نەمەرە-شوبەرەلەرىنىڭ ورتاسىندا باقىتتى ءومىر سۇرۋدە.
– مەيىرىمدىلىكتىڭ نىشانىنداي بولعان 8 ناۋرىز – حالىقارالىق ايەلدەر كۇنى – ادەمىلىكتىڭ, ىزگىلىكتىڭ جانە جىلىلىقتىڭ مەرەكەسى. سوعان وراي «نۇر وتان» پارتياسى «ەل انالارى» دەگەن اۋقىمدى شارانى قولعا الىپ وتىر. وسى اكتسيا اياسىندا پارتيانىڭ بارلىق فيليالدارى عاسىر جاساعان جانە جاسى جۇزدەن اسقان اجەلەرىمىزدى ۇيلەرىنە ارنايى بارىپ قۇتتىقتاۋدا, – دەيدى ماۋلەن اشىمباەۆ.
شىن مانىندە اۋلەتىنىڭ عانا ەمەس, تۇتاس ەلىمىزدىڭ التىن قازىعى, بەرەكە-بىرلىكتىڭ ۇيىتقىسى بولىپ وتىرعان وسىنداي اپا-اجەلەرىمىزدىڭ ومىرىنەن الار ساباق مول. سوندىقتان نۇروتاندىقتار ابىز انالاردى جەكە-دارا قۇتتىقتاپ, اق باتالارىن الۋدى وزدەرىنىڭ ابىرويلى مىندەتى دەپ سانايدى.
– ەل باسىنا كۇن تۋعان قيىن-قىستاۋ شاقتا ەتىگىمەن سۋ كەشىپ, كەلەشەك ۇرپاق ءۇشىن جانىن بەرىپ ەڭبەك ەتكەن اياۋلى جاندارعا قۇرمەت كورسەتۋدى ءوزىمىزدىڭ ازاماتتىق بورىشىمىز دەپ ەسەپتەيمىز. ويتكەنى ءبىزدىڭ بۇگىنگى باقۋاتتى ءومىرىمىزدىڭ باستاۋىندا ەلىمىزدىڭ ىرگەسى بەرىك, بىرلىگى بەكەم بولۋىنا زور ەڭبەك سىڭىرگەن وسىنداي انالارىمىز تۇر, – دەگەن ماۋلەن اشىمباەۆ قازاقستانداعى بارلىق اق جاۋلىقتى اجەلەر مەن اياۋلى ارۋلاردى ايتۋلى مەرەكەمەن شىن جۇرەكتەن قۇتتىقتادى.
بۇگىندە قازاقستان بويىنشا جاسى جۇزگە جەتكەن جانە اسقان 415 اجەي بار. ولاردىڭ باسىم بولىگى, ياعني 80-ءى وڭتۇستىك قازاقستان وبلىسىندا تۇراتىنىن اتاپ وتكەن ءجون.
ايتا كەتەيىك, «ەل انالارى» اكتسياسى ەلىمىزدىڭ بارلىق وڭىرىندە وتكىزىلۋدە. سونىڭ اياسىندا نۇروتاندىقتار وبلىس, اۋدان ورتالىقتارىمەن قاتار, شالعايدا ورنالاسقان اۋىلدى جەرلەردەگى اپا-اجەلەرىمىزدى دە ارنايى بارىپ, مەرەكەلەرىمەن قۇتتىقتاۋدا.
