حالىقارالىق ايەلدەر كۇنى قارساڭىندا, مىڭداعان ادامداردى جاقسىلىق جاساۋعا رۋحتاندىراتىن ەلدەگى ءىرى قايىرىمدىلىق ۇيىمدارى مەن قوزعالىستاردىڭ نەگىزىن قالاعان ايەلدەر قاتىسىپ, پىكىرلەرىن ءبىلدىردى. ولاردىڭ قاتارىندا «قايىرىمدىلار كلۋبى» ەرىكتىلەر قوزعالىسىنىڭ نەگىزىن قالاۋشى گۇلميرا ابدىراشەۆا, «الەمجان جولى» قوعامدىق قورىنىڭ ديرەكتورى قۇرالاي يسەنوۆا, استانا قالاسى اكىمدىگىنىڭ «مامانداندىرىلعان بالالار ءۇيى» مكم باس دارىگەرى ساۋلە كەنجەباەۆا جانە مۇگەدەكتەردىڭ «دوس» تاۋەلسىز ءومىر ورتالىعى» قوعامدىق بىرلەستىگىنىڭ اتقارۋشى ديرەكتورى قارلىعاش تىنابەكوۆا بار.
جيىندا ءسوز العان «قايىرىمدىلار كلۋبى» ەرىكتىلەر قوزعالىسىنىڭ نەگىزىن قالاۋشى گۇلميرا ابدىراشەۆا وزدەرىنىڭ وسى ۋاقىت ارالىعىندا اتقارعان قىزمەتتەرىنە توقتالىپ, ءتۇرلى شارالارعا شولۋ جاسادى. ال «دوس» تاۋەلسىز ءومىر ورتالىعى» قوعامدىق بىرلەستىگىنىڭ اتقارۋشى ديرەكتورى قارلىعاش تىنابەكوۆا ورتالىقتا بۇرىندارى جۇمىس جاساعان مۇمكىندىگى شەكتەۋلى جاندارعا ارنالعان ۇيىرمەنىڭ جۇمىسى قايتا باستالاتىنىن باياندادى. وعان كەز كەلگەن مۇگەدەك جاننىڭ قاتىسۋىنا مۇمكىندىك بارىن جانە ۇيرەنەم دەپ كەلگەن جاندارعا ۇيىرمەنىڭ كەستەسىن ءوز ۋاقىتىنا قاراي ىڭعايلاپ بەرەتىنىن جەتكىزدى.
گۇلميرا ابدىراشەۆانىڭ ايتۋىنشا, جاقسىلىق جاساۋ ءۇشىن قالتالى بولۋ مىندەتتى ەمەس, ەڭ باستىسى, مۇقتاج جانداردىڭ مۇڭىنا قۇلاق ءتۇرىپ, ولاردىڭ كوڭىلىندەگى ويدى كورە بىلەتىن كوز بەن كومەكتەسكىم كەلەدى دەگەن نيەت بولسا جەتكىلىكتى.
راۋان قايدار,
«ەگەمەن قازاقستان»
