بۇل سۇمدىق وقيعا وڭتۇستىك قازاقستان وبلىسى شۇبارسۋ اۋىلىندا بولدى. بۇل اۋىل كەزىندە شىمكەنت قالاسى تۇرعىندارىنىڭ ساياجايى بولاتىن. سوناۋ ءبىر تولقىنمەن وزبەكستاننان كەلگەن اعايىن وسىنداعى ارزان ساياجايلاردى ساتىپ الىپ, ۇلكەن اۋىلعا اينالدىرىپ جىبەرگەن ەدى. ءابدى قوجىقوۆ تا وسى توپپەن وزبەكستاننان كوشىپ كەلىپ, بىرەۋدەن ىلگەرى, بىرەۋدەن كەيىن ءومىر ءسۇرىپ جاتقان. ونىڭ جالعىز ۇلى جيىرما سەگىز جاستاعى جانداربەك كەيىنگى جىلدارى كۇرت وزگەرىپتى. ەسىرتكى تارتادى-اۋ دەپ شامالايدى اكەسى. ءوز-وزىمەن جۇرگەن سوڭ جالعىز بالاسىن پوليتسياعا قايدان ۇستاپ بەرسىن. قويار دەگەن ءۇمىتى بولدى. تەمەكى شەككەن جانداربەك تۇندە دالاعا شىعۋعا قورقادى ەكەن. كۇنىنە نامازىن قازا قىلماي وقىپ, سوسىن ۇيىقتاي بەرەتىن بولعان.
قاندى وقيعا بولاتىن كۇنى سەبەپ بولاتىنداي ۇرىس-كەرىس بولماعان. كەلىنى ءدارى كەرەك دەگەن سوڭ ءابدى اقساقال ونى دارىحاناعا جىبەرىپ, جانداربەككە وتىن اكەل دەپ بۇيىرادى. سويتسە ۇلى داستارحانداعى پىشاقتى ىلە كەتكەن ەكەن. ول ايەلىن قۋىپ بارىپ پىشاققا جىققان سوڭ, ايقايدى ەستىپ ۇيدەن شەشەسى اتىپ شىعادى. كەلىنى قورقىراپ جىعىلىپ جاتقانىن كورگەن ول ۇلىنان قورقىپ, كەرى قاشادى. ەسىرتكى كوزىن تۇمانداتقان ەسسىز ۇل تۋعان شەشەسىن دە پىشاقتاپ تاستايدى. قاندى قىرعىننىڭ ۇستىنەن تۇسكەن اكەسىنە كوزى قىزارعان ۇل ء«سىز دە ولەسىز, مەن دە ولەمىن» دەپ پىشاعىن جالاڭداتىپ تۇرا ۇمتىلادى. ءابدى اقساقال ەلىرگەن بالانىڭ قولىن قايىرىپ, پىشاعىن الادى دا, ايقايلاپ كورشىسىن شاقىرادى.
وسىلايشا, اينالدىرعان بەس-التى مينۋتتىڭ ىشىندە ءبىر وتباسىنىڭ شاڭىراعى ورتاسىنا تۇسكەن. كەلىنى التى اي بۇرىن بوسانعان ەدى. جەتىم قالعان نارەستەنى قىزدىڭ اكە-شەشەسى كەلىپ الىپ كەتىپتى.
وتباسى ءبىر كۇندە ويراندالعان ءابدى قوجىقوۆ بالاسىن اقتارعا ءسوز تاپپاي وتىر. ء«جۇز جىلعا كەسىلسە دە وكىنبەيمىن» دەيدى. بىراق ءبىر نارسەنىڭ بايىبىنا بارعىسى كەلەدى. اشەيىندە مومىن بالاسىنا ەسىرتكى اكەپ بەرىپ, ساتىپ جۇرگەن كىم؟! ويتكەنى ەسىرتكىگە ەلىككەن وسى اۋىلدىڭ ءبىر تۇرعىنى بالاسىن پىشاقتاپ تاستاعان ەكەن. ياعني ادامدى اقىل-ەستەن ايىراتىن اناشانى ساتىپ, پايدا تاۋىپ جۇرگەن قاسكۇنەمدەر بار. «سولاردى تاۋىپ, جازالاسا», دەيدى جۇرەگى قان جىلاعان بەيباق اكە.
بۇگىندە بۇل ماسەلەمەن قۇقىق قورعاۋ ورگاندارى اينالىسىپ جاتىر.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
