كوكتەم شىعا دوستىق پەيىلمەن كورشى تالاس وبلىسىنىڭ دەلەگاتتارى دا جامبىل جەرىنە كەلدى. مەيمانداردى «ايشا ءبيبى» كەدەن بەكەتىنەن تاراز قالاسى اكىمىنىڭ ورىنباسارى كەنجەبەك ولجاباي باستاعان ازاماتتار كۇتىپ الدى. قىرعىز اعايىنعا دەگەن ىستىق پەيىلىن ايتىسكەر اقىن ەرنۇر بەيسەنوۆ جىر ارقىلى ءبىلدىرىپ, ارناۋ ايتتى. بۇدان كەيىن سالتانات تاراز قالاسىنداعى «كونە تاراز» تاريحي-مادەني كەشەنىندەگى «دوستىق» ۇيىندە جالعاسىن تاۋىپ, قىرعىزدارعا وبلىس اكىمىنىڭ ورىنباسارى ەرقانات مانجۋوۆ باستاعان جامبىلدىقتار قۇرمەت كورسەتتى. بۇل جەردە ءتۇرلى ۇلت وكىلدەرى وزدەرىنىڭ دومبىرا, دويرا, تار, چانگو, قومىز سىندى ۇلتتىق اسپاپتارىمەن ونەر كورسەتىپ, كوپشىلىكتىڭ كوڭىلىن كوتەردى. ال وسىنداعى حالقىمىزدىڭ ۇلتتىق ويىندارى, قولونەر شەبەرلەرىنىڭ تۋىندىلارى جانە وزگە ۇلت وكىلدەرى سالعان كارتينالار ايىرقالپاقتى اعايىننىڭ تاڭدانىسىن تۋدىردى.
قوس وبلىس اراسىنداعى دوستىق مەرەيتويى «راحمەت ساعان, تۋعان ەل!» اتتى كوركەمونەرپازدار كونتسەرتىنە ۇلاستى. سونىمەن قاتار كوپشىلىككە قازاق حالقىنىڭ دارحان پەيىلىن تانىتاتىن دەرەكتى فيلم كورسەتىلدى. مۇندا تاريحي ساتتەر بەينەلەنۋمەن قاتار, وتكەن عاسىردىڭ باسىندا ءبىر جارىم ميلليون وزگە ۇلت وكىلدەرىنىڭ قازاق دالاسىن پانالاپ كەلگەن ءساتى كورسەتىلدى. بۇدان كەيىن كەلگەن قوناقتارعا جامبىل وبلىسى اكىمىنىڭ ورىنباسارى ەرقانات مانجۋوۆ وبلىس اكىمى اسقار مىرزاحمەتوۆتىڭ سالەمىن جەتكىزىپ, جامبىل جاباەۆ بەينەسى بەينەلەنگەن كىلەمشەنى سىيعا تارتتى.
ءوز كەزەگىندە تالاس وبلىسى گۋبەرناتورىنىڭ ورىنباسارى ازيات جارقىناليەۆا, تالاس ولكەلىك تەلەارناسىنىڭ ديرەكتورى ەرمەك ۇمبەتوۆ, تالاس وبلىستىق مۋزىكالىق دراما تەاترىنىڭ ديرەكتورى قۋان ەستەبەكوۆ ءسوز الىپ, جامبىلدىقتارعا دەگەن جىلى لەبىزدەرىن جەتكىزدى. سونداي-اق اۋليەاتالىقتارعا قىرعىز حالقىنىڭ ماقتانىشى «ماناس» كىتابىن سىيعا تارتتى.
سالتاناتتى شارا بارىسىندا جامبىل ءوڭىرىنىڭ ساحنا شەبەرلەرى اسەم اننەن شاشۋ شاشىپ, بيشىلەر مىڭ بۇرالا بي بيلەدى.
حاميت ەسامان,
«ەگەمەن قازاقستان»
جامبىل وبلىسى
