كونفەرەنتسيادا حالىقارالىق قوعامداستىقتىڭ قولداۋىمەن اۋعانستانداعى بەيبىتشىلىك پەن تاتۋلىققا قول جەتكىزۋ جانە تەرروريزمگە قارسى ارەكەت ەتۋ سالاسىنداعى بىرلەسكەن شارالاردى قابىلداۋ سىندى نەگىزگى ماسەلەلەرگە ەرەكشە نازار اۋدارىلدى.
باسقوسۋعا ناتو-نى قوسا العاندا ايماقتىق جانە حالىقارالىق ۇيىمدار مەن 25 ەلدىڭ دەلەگاتسيالارى كەلدى. ال قازاقستان تاراپىنان جيىنعا سىرتقى ىستەر مينيسترلىگىنىڭ اۋعانستان بويىنشا ارنايى وكىلى, ەرەكشە تاپسىرمالار جونىندەگى ەلشى ستانيسلاۆ ۆاسيلەنكو جانە قازاقستان رەسپۋبليكاسىنىڭ اۋعانستانداعى توتەنشە جانە وكىلەتتى ەلشىسى ءومىرتاي ءبىتىموۆ قاتىستى.
جيىن بارىسىندا اۋعانستان پرەزيدەنتى موحامماد اشراف عاني قارۋلى وپپوزيتسيا وكىلدەرى «تاليبان» قوزعالىسىن بەيبىت كەلىسسوزگە شاقىردى, ول ۇكىمەتتىڭ ىمىراعا كەلۋ تۋرالى نەگىزگى جەتى ۇسىنىسىن جەتكىزدى. ولار: «تاليبان» قوزعالىسىن ساياسي پارتيا رەتىندە تانۋ, اتىستى توقتاتۋ, وتپەلى سەنىم شارالارى جانە كەڭ اۋقىمدى سايلاۋ وتكىزۋگە جول اشۋ, اۋعانستان كونستيتۋتسياسىن قايتا قاراۋ نەمەسە وعان تۇزەتۋلەر ەنگىزۋ, ءادىل سوت تورەلىگىن جۇزەگە اسىرۋ, شاعىمداردى قاراۋ مەن زاڭنىڭ ورىندالۋى.
بايانداماشىلار بەيبىتشىلىككە, ىمىراعا كەلۋگە, اعايىندىلار ءبىرىن-ءبىرى ولتىرەتىن سوعىستى تەز ارادا توقتاتۋعا جانە «تاليبانمەن» بەيبىت كەلىسسوزدەردى باستاۋعا شاقىردى. باتىس ەلدەرىنىڭ وكىلدەرى ايەلدەر مەن بالالاردىڭ قۇقىقتارىن ساقتاۋ ماسەلەلەرىن كوتەردى. پىكىرتالاس ناتيجەسىندە كابۋل دەكلاراتسياسى قابىلداندى.
قازاقستان سىرتقى ىستەر مينيسترلىگىنىڭ ارنايى وكىلى ءوز سوزىندە ەلىمىزدىڭ حالىقارالىق قوعامداستىقتىڭ اۋعانستانداعى جاعدايدى رەتتەۋ بويىنشا بارلىق ءىس-شارالارىن قولدايتىندىعىن ءبىلدىردى. ول ەلىمىزدىڭ اۋعانستانمەن ىنتىماقتاستىقتىڭ ءتۇرلى سالالارىنداعى ناقتى قادامدارىن اتاپ ءوتتى.
جالپى العاندا اتالعان فورۋم كابۋلدىڭ قارۋلى وپپوزيتسيا – تاليبتەرمەن بەيبىت پروتسەستى باستاۋ بويىنشا جاڭا كوزقاراستارىن كورسەتتى, سونىمەن قاتار اۋعانستانداعى جاعدايدى رەتتەۋگە مۇددەلى قاتىسۋشى ەلدەر مەن ۇيىمدار وسى ماسەلەدە وزدەرىنىڭ قولداۋىن تاعى دا ءبىر رەت راستادى.
ايتا كەتەيىك, قازاقستان مەن اۋعانستان اراسىنداعى ديپلوماتيالىق قاتىناس شەجىرەسى 1992 جىلدىڭ 12 اقپانىنان باستاۋ الادى. سودان بەرگى ارالىقتا ەكىجاقتى ىنتىماقتاستىقتى نىعايتۋ باعىتىندا مەملەكەتتەر باسشىلارى, ەكى ەل ۇكىمەتىنىڭ جەتەكشىلەرى, پارلامەنتتەر توراعالارى, سىرتقى ساياسي ۆەدومستۆولار دەڭگەيىندە كوپتەگەن كەزدەسۋلەر ءوتتى. قازىرگى تاڭدا قازاقستان اۋعانستانداعى جاعدايدى رەتتەۋگە بەلسەنە قاتىسىپ كەلە جاتىر. وسى ورايدا ءبىزدىڭ ەلىمىز بۇل مەملەكەتكە بار مۇمكىندىگىنشە قولداۋ بىلدىرۋدە. اسىرەسە, اۋعانستان ەكونوميكا, ءبىلىم بەرۋ, گۋمانيتارلىق سالالار بويىنشا قازاقستان تاراپىنان كوپ كومەك الۋدا.
سوڭعى دەرەكتەرگە سۇيەنىپ سويلەسەك, 2016 جىلدىڭ قورىتىندىلارى بويىنشا قازاقستان مەن اۋعانستان اراسىنداعى تاۋار اينالىمى 489,4 ملن اقش دوللارىن قۇرادى: ونىڭ ىشىندە قازاقستان ەكسپورتى – 486,8 ملن دوللار, يمپورتى – 2,6 ملن دوللار. ساۋدا-ەكونوميكالىق قاتىناستاردى دامىتۋدا ۇكىمەتارالىق كوميسسيا ماڭىزدى ءرول ويناپ وتىر.
سونىمەن قاتار مەملەكەت باسشىسى نۇرسۇلتان نازارباەۆتىڭ باستاماسىمەن 2009 جىلدان باستاپ ەلىمىزدىڭ وقۋ ورىندارىندا اۋعاندىق 1 مىڭ ستۋدەنتتى وقىتۋ بويىنشا مەملەكەتتىك باعدارلاما جۇزەگە اسۋدا. بۇل ماقساتقا 50 ملن اقش دوللارى بولىنگەن. قازىرگى تاڭدا شامامەن اۋعاندىق 750 ستۋدەنت قازاقستاندا ءتالىم الۋدا. 2016 جىلى شىلدە ايىندا قوسىمشا اۋعاندىق 100 ستۋدەنت كەزەكتى ىرىكتەۋدەن ءوتتى. بۇل مەملەكەتتىك باعدارلاما ودان ءارى دە جالعاسا بەرمەك. بۇعان قوسا ءبىزدىڭ ەلىمىز ءار جىلداردا اۋعانستانعا ازىق-ت ۇلىك جانە باسقا دا تاۋار تۇرلەرىمەن گۋمانيتارلىق كومەك كورسەتتى. سونداي-اق قازاقستان وسى ەلگە جول جوندەۋ, مەكتەپ, اۋرۋحانا سالۋ ماقساتىندا قارجىلاي جاردەم بەردى.
دايىنداعان
جولدىباي بازار,
«ەگەمەن قازاقستان»
