فوتو: ەرلان ومار, «ەگەمەن قازاقستان»
جيىن ەلباسىنىڭ «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىن قولداۋ ماقساتىندا ۇيىمداستىرىلدى.
ءىس-شاراعا توراعالىق ەتكەن «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ بۇل ۇندەۋ قازاقستاننىڭ الەۋمەتتىك جاڭعىرۋىنداعى بەس باسىم باعىتتى ايقىنداپ بەرگەن بىرەگەي باعدارلامالىق قۇجات ەكەنىن ايتتى. سونداي-اق ەلباسى ۇسىنىستارى حالقىمىزدىڭ الەۋمەتتىك جاعدايىن جاقسارتۋعا ايرىقشا اسەرىن تيگىزەتىنىن اتاپ كورسەتتى.
«بۇكىل الەم بويىنشا مەملەكەتتىك الەۋمەتتىك باعدارلامالار كەيىنگە شەگەرىلىپ, ۇكىمەتتەر بۇرىنعى مىندەتتەرىنەن باس تارتىپ جاتقان اۋمالى-توكپەلى شاقتا مەملەكەت باسشىسى وسىنداي باتىل باستامالاردى قولعا الىپ وتىر. وسىلايشا ەلباسى كەزەكتى رەت قازاقستان ءۇشىن حالقىنىڭ الەۋمەتتىك جاعدايى ءاردايىم باسىم باعىت بولىپ سانالاتىنىن ءىس جۇزىندە دالەلدەپ بەردى», دەدى پارتيا توراعاسىنىڭ ءبىرىنشى ورىنباسارى.
سونداي-اق م.اشىمباەۆ قازىرگى تاڭدا حالىقتىڭ ەڭ باستى الەۋمەتتىك ماسەلەسى باسپانا ەكەنىنە توقتالىپ, مۇنى شەشۋ ءۇشىن اتقارىلىپ جاتقان جۇمىستاردى مىسالعا الدى. ماسەلەن بىلتىر رەكوردتىق دەڭگەيدە 11 ميلليون شارشى مەتردەن استام تۇرعىن ءۇي سالىنعان. ايتسە دە پارتيا توراعاسىنىڭ ورىنباسارى ءالى كۇنگە دەيىن كوپتەگەن قازاقستاندىقتىڭ پاتەرگە مۇقتاج ەكەنىن ايتىپ ءوتتى. سوندىقتان دا پرەزيدەنتتىڭ باستامالارىن جۇرتشىلىق قۋانا قابىلداۋدا.
پارتيا توراعاسىنىڭ ورىنباسارى ۇندەۋدە باسپانا ماسەلەسى, جالاقىسى تومەن ازاماتتاردىڭ سالىق جۇكتەمەسىن ازايتۋ, جوعارى ءبىلىمنىڭ قولجەتىمدىلىگى مەن ساپاسىن ارتتىرۋ, ستۋدەنت جاستاردى جاتاقحانامەن بارىنشا قامتاماسىز ەتۋ, شاعىن نەسيە كولەمىن ۇلعايتۋ, بىرنەشە قالاعا گاز تارتۋ ماسەلەلەرى ۇسىنىلىپ قانا قويماي, ولاردى ىسكە اسىرۋ تەتىكتەرى دە ناقتى كورسەتىلگەنىنە نازار اۋداردى.
«پرەزيدەنتتىڭ بارلىق باستاماسى جان-جاقتى ساراپتالىپ, زەردەلەنگەنىن جانە ولاردى جۇزەگە اسىرۋعا ناقتى قارجىلاي نەگىز بار ەكەنىن اتاپ وتكەن ءجون. سونىڭ ارقاسىندا قازاقستاندىقتار ەلباسى تاپسىرمالارىن جۇزەگە اسىرۋدىڭ ناتيجەلەرىن تاياۋ جىلدارى سەزىنە الادى. مەملەكەت باسشىسى بۇل ماڭىزدى باستامالاردىڭ جۇزەگە اسىرىلۋىن باقىلاۋدى «نۇر وتان» پارتياسىنا جۇكتەدى. وسىعان وراي ەلباسى تاپسىرماسى پارتيا جۇمىسىنىڭ الداعى ۋاقىتتاعى نەگىزگى مىندەتى بولادى», دەدى م.اشىمباەۆ.
بۇدان كەيىن ءسوز العان «اق جول» پارتياسىنىڭ توراعاسى, ءماجىلىس دەپۋتاتى ازات پەرۋاشەۆ «پرەزيدەنتتىڭ بەس الەۋمەتتىك باستاماسىندا» ەڭ باستى نازاردا قاراپايىم تۇرعىنداردىڭ مۇددەسى تۇرعانىن اتاپ كورسەتتى. ياعني وسى باعدارلاما حالىقتىڭ تۇرمىسىن جاقسارتىپ, ولارعا قاجەتتى, وزەكتى ماسەلەلەردىڭ ءتيىمدى شەشىمىن تابۋدى ماقسات ەتەدى. ا.پەرۋاشەۆ «اق جول» پارتياسى مەن ونىڭ دەپۋتاتتىق فراكتسياسى دا ۇندەۋدى قولداپ, ونداعى مىندەتتەردى ىسكە اسىرۋعا ءوز ۇلەسىن قوسۋعا ءازىر ەكەنىن مالىمدەدى.
«مىنا نارسەگە نازار اۋدارعىم كەلىپ وتىر. شاعىن نەسيەلەۋ كولەمىن ارتتىرۋ, پايىزدىق جانە سالىقتىق جەڭىلدىك ارقىلى كاسىپكەرلىكتى كوتەرمەلەۋگە تالپىنۋ قۇرىلىس سالاسىن دامىتىپ, جاڭا جۇمىس ورىندارىن اشۋعا كومەكتەسەدى. ياعني وسىنىڭ بارلىعى تۇپتەپ كەلگەندە قاراپايىم حالىققا پايدالى بولماق. مۇنىڭ تاعى ءبىر مىسالىن تابىسى تومەندەرگە سالىناتىن سالىقتىڭ مولشەرىن ون ەسەگە ازايتۋ جونىندەگى شەشىمنەن دە بايقاۋعا بولادى», دەدى «اق جول» پارتياسىنىڭ توراعاسى.
قازاقستاننىڭ كوممۋنيستىك حالىقتىق پارتياسىنىڭ حاتشىسى, ءماجىلىس دەپۋتاتى جامبىل احمەتبەكوۆ مەملەكەت باسشىسىنىڭ باستامالارى ءاردايىم ناقتى ءارى ەل ەكونوميكاسىنىڭ مۇمكىندىگىنە ساي ەسەپتەلەتىنىن ايتتى. سونىمەن قاتار ەلباسىنىڭ بىرەر كۇن بۇرىنعى ۇندەۋىندە كوتەرىلگەن باسپانا, جالاقى ماسەلەلەرى, سول سياقتى ءبىلىم بەرۋ مەن ونىڭ ساپاسىن ارتتىرۋ قازاقستاننىڭ كوممۋنيستىك حالىقتىق پارتياسى ۇستانىمىمەن سايكەس كەلەتىنىن جەتكىزدى.
«اۋىل» حالىقتىق-دەموكراتيالىق پاتريوتتىق پارتياسىنىڭ توراعاسى, سەناتور ءالي بەكتاەۆ مەملەكەت باسشىسىنىڭ ۇندەۋىن تاريحي وقيعاعا بالادى. سەناتور الەۋمەتتىك باستامالار اۋىل تۇرعىندارىنا تىكەلەي قاتىستى بولعاندىقتان, ەلباسىنىڭ ۇندەۋىن «اۋىل» پارتياسى دا قولدايتىنىن مالىمدەدى.
بۇدان سوڭ دەموكراتيالىق كۇشتەردىڭ «قازاقستان-2050» جالپىۇلتتىق كواليتسياسى مۇشەلەرى, ەلدەگى جەتەكشى پارتيالار باسشىلارى, پارلامەنت دەپۋتاتتارى ءسوز الىپ, «پرەزيدەنتتىڭ بەس الەۋمەتتىك باستاماسىنا» بايلانىستى ءوز ويلارىن ورتاعا سالىپ, پىكىرلەرىمەن ءبولىستى.
ءىس-شارا سوڭىندا ەلىمىزدىڭ بارشا ازاماتتارىن قازاقستاننىڭ الەۋمەتتىك جاڭعىرۋى جولىنداعى باتىل قادام دەپ باعالانعان قۇجاتقا قولداۋ بىلدىرۋگە, ونداعى باستامالاردى جۇزەگە اسىرۋ جۇمىستارىنا بەلسەندى قاتىسۋعا شاقىرعان ۇندەۋ قابىلداندى.
اباي اسانكەلدى ۇلى,
«ەگەمەن قازاقستان»
