ەلباسىنىڭ ناۋرىزدىڭ بەسىنشى جۇلدىزىندا جاريا ەتىلگەن بەس باستاماسىنىڭ بارىنە دە حالىق قويار باعا «بەستىك» بولاتىنى كۇمانسىز. الدىمەن ايرىقشا ايتاتىن جاڭالىق – «7 – 20 – 25» دەپ اتالعان يپوتەكالىق نەسيە باعدارلاماسى. مۇنىڭ ءمانىسى – بىرىنشىدەن, ەندىگى جەردە يپوتەكالىق نەسيەنىڭ قازىرگە دەيىنگى 14-16 پايىزدىڭ ورنىنا 7 پايىزدان اسپايتىندىعى, ەكىنشىدەن, ەندىگى جەردە ءۇي قۇرىلىسىنا سالىناتىن باستاپقى ۇلەستىڭ قازىرگە دەيىنگى 30, ال كەي جەردەگى 50 پايىزدىڭ ورنىنا 20 پايىزدان اسپايتىندىعى, ۇشىنشىدەن, ەندىگى جەردە نەسيەنى تولەۋدىڭ مەرزىمى قازىرگە دەيىنگى 10-15 جىلدىڭ ورنىنا 25 جىلعا دەيىن ۇزارتىلعانى. باعالاي بىلگەن ادامعا بۇل ۇلكەن جەڭىلدىك. ال سالىقتىق جۇكتەمەنىڭ ازايتىلۋى ءتىپتى تاڭدانارلىقتاي. تۇرمىس دەڭگەيى تومەن ادامدارعا 2019 جىلدىڭ 1 قاڭتارىنان باستاپ قازىرگە دەيىنگى 10 پايىزدىڭ ورنىنا نەبارى 1 پايىز سالىق سالىناتىن بولىپ وتىر. بۇل – ەلباسىنىڭ ەكىنشى باستاماسى. ءۇشىنشى باستامانىڭ كولەمى دە قايران قالدىرارلىقتاي. نەگە دەسەڭىز, جوعارى وقۋ ورىندارىنا بولىنەتىن قازىرگى 54 مىڭ گرانتقا تاعى دا تۇتاستاي 20 مىڭ گرانت قوسىلعالى وتىر, ونىڭ 11 مىڭى باكالاۆرياتتاعىلارعا, سونىڭ ىشىندە جاڭا ەكونوميكا قاتتى قاجەت ەتەتىن قات ماماندىقتارعا بولىنبەكشى. ءتورتىنشى باستاما بويىنشا شاعىن نەسيە بەرۋدى كوبەيتۋ كوزدەلگەن. بەسىنشى باستاما بويىنشا ەلدى گازداندىرۋ جۇمىسى جاڭاشا قارقىن الماقشى. قىزىلوردانىڭ قاراوزەگىنەن تارتىلاتىن گاز قۇبىرى جەزقازعانعا, قاراعاندىعا, تەمىرتاۋعا, ودان استاناعا جەتكىزىلمەكشى. بۇل جۇمىس 2,7 ميلليون ادام تۇراتىن ارقا ءوڭىرىن گازبەن قامتاماسىز ەتىپ, ەلدىڭ ەكولوگيالىق احۋالىن جاقسارتپاقشى. تەك استانانىڭ وزىندە اۋاعا تارايتىن قاۋىپتى شىعارىندىنىڭ كولەمى 6 ەسە ازايماقشى.
مىنە, ەڭ سىعىمداپ ايتقاننىڭ وزىندە بۇل بەس باستامانىڭ ەلدى جاڭا بەلەستەرگە شىعاراتىن اسا اۋقىمدى شارۋا ەكەندىگى ايقىن كورىنىپ تۇر.
جاقسىلىقتار جالعاسا بەرگەي!
ساۋىتبەك ابدراحمانوۆ,
ءماجىلىس دەپۋتاتى
