اتاپ-اتاپ ايتقاندا, تالاي ەلدىڭ ارزان نەسيەگە قولى جەتپەي تۇرعاندا, ونى 7 پايىزعا تۇسىرەمىن دەگەنى وتە قۇپتارلىق جاعداي بولدى. جانە 25 جىلعا بەرىلەدى دەگەن ءسوز, بۇكىل كاسىپكەرلەرىمىزدىڭ قولىن شەشكەن سياقتى. ءتىپتى وسى باستامادان قازىردىڭ وزىندە قاناتتانىپ, شاعىن جانە ورتا بيزنەسىن باستاپ كەتۋگە تاۋەكەلگە بارعىسى كەلەتىندەر بىردەن كوبەيەدى. بۇل جاڭا كاسىپكەرلەرگە جول اشىپ بەرەتىن جاڭا مۇمكىندىك, ەڭ باستى باعدارلاما دەپ ايتۋعا بولادى.
وسىدان كەيىن قازاقستاندى 2022 جىلعا دەيىن تولىق گازبەن قامتاماسىز ەتۋ جوسپارى جۇزەگە اسىرىلعالى وتىر. وسى ۋاقىتقا دەيىن ەلىمىز كوگىلدىر وتىنمەن تولىق قامتاماسىز ەتىلگەن دەپ ويلايتىندار بار. شىن مانىندە گازدى پايدالانىپ وتىرعاندار 50 پايىز عانا ەكەن. ونىڭ ءوزىنىڭ انىق جوسپارى جاسالۋى, گاز قۇبىرلارى قاي قالادان قاي قالاعا قاراي جۇرەدى, ناقتى قالاي ىسكە اسادى, وسىنىڭ ءبارى وزەكتى.
مەملەكەت باسشىسى 2025 جىلعا قاراي كومىر وتىنىنان ارىلۋىمىز كەرەك دەدى. ويتكەنى ول ءبىزدىڭ اۋامىزدى بىلعاپ جاتىر. استانانىڭ وزىندە دە كومىر وتىندى پايدالاناتىندار كوپ. قىسقاسى, كومىردەن ءبىرجولاتا باس تارتىپ, ياكي بولماسا ساپاسىن ارتتىرساق جاقسى بولار ەدى.
ەلباسىنىڭ ءبىر ءسوزى ۇناپ قالدى. ءوزىمىز دە سولاي ويلاپ كەلدىك قوي. سارىارقانىڭ سارى جەلى ەلوردامىزدىڭ ءتۇتىنىن تازارتىپ وتىرادى دەۋشى ەدىك. سويتسەك, ولاي بولماي شىقتى. سارىرقانىڭ سارى جەلى كولىكتەردەن بۋداقتاعان كوك ءتۇتىندى قۋىپ ۇلگەرە المايدى ەكەن. ەندى وسىدان قۇتىلاتىن بولدىق.
اسىرەسە, تەمىرتاۋ قالاسىنىڭ ەكولوگياسىن جاقسى بىلەمىز. اپپاق قاردىڭ ۇستىنە قارا بوياۋ جاعىلعانداي اۋاسى لاس. حالىق قالاي كۇن كورىپ وتىر؟
وسىنىڭ بارلىعىنان دا پرەزيدەنت حاباردار. ەلباسى ەندى وسى تۇتىننەن قۇتىلۋدىڭ انىق جوسپارىن جاساپ بەردى. پارلامەنتتىڭ قوس پالاتاسى وسىنى قولدادى. ءبىز دە قوس قولداپ قولداپ وتىرمىز. جانە وسى ماسەلەدەن قۇتىلۋدىڭ جاڭا جولدارى, جاڭا تاسىلدەرى اتاپ كورسەتىلدى.
سول سياقتى ستۋدەنت جاستاردىڭ جاتاقحانا ماسەلەسىن 2022 جىلعا قاراي تولىق شەشىپ بولامىز دەگەنى جۇزەگە اساتىن بولسا, قازاقستان ەڭسەسى بيىك ەلدىڭ بىرىنە اينالار ەدى. مەن وسىعان قاتتى قۋاندىم.
ال ادەبيەت پەن مادەنيەتتىڭ اڭگىمەسى بۇرىننان دا ايتىلىپ كەلەدى. الدىڭعى جولداۋلاردىڭ بارىندە قامتىلدى. الايدا الدىمەن حالىقتىڭ ءال-اۋقاتى, الدىمەن ەكونوميكا كوش باستاۋى كەرەك.
ءبىز ءوز باعدارىمىزدى الەۋمەتتىك مەملەكەت رەتىندە قايتا قاراستىرۋىمىز قاجەت. ول ءۇشىن جالاقىسى تومەن ادامدى سالىقتان ءبىرجولاتا بوساتۋ نەمەسە ايلىق كولەمىنە قاتىستى كولەمىن ازايتۋ كوپ ادامعا دەمەۋ بولادى. مۇنداي جەڭىلدىكتەر تالاي جاننىڭ تىكتەلۋىنە سەپتەسەدى. قۋانعان دا, قولداعان دا باستامانىڭ تاعى ءبىرى وسى!
ايتقانداي, ەلباسى وقۋ ورىندارى, ءبىلىم سالاسىنا قاتىستى قوردالانعان ماسەلەلەردى رەتتەۋدى انىق تاپسىردى. ويتكەنى ءبىلىم سالاسى مەن ۇلتتىق عىلىم اكادەمياسىنىڭ اينالاسىندا داۋ كوپ. قازاق عىلىمى ءۇش جىلدا ءبىر-اق رەت بەرىلەتىن گرانتقا قاراپ قالدى دەگەن ءسوزدىڭ جانى بار. عالىمداردى شۋلاتا بەرمەۋ ءۇشىن وسىنىڭ ءبارىن قايتا قارايتىن كەز ابدەن كەلدى. ارتىق, ورىنسىز ايتىلا بەرەتىن داۋ-دامايعا توقتاۋ سالۋ ءۇشىن عىلىم مەن ءبىلىم سالاسىنا قوسىمشا گرانت بەرۋ ماسەلەسى تۇبەگەيلى شەشىلەتىن بولدى.
سوندىقتان بۇل سالانىڭ دا كوڭىلىن كونشىتىپ, قاجەتتىلىكتەرىن قاناعاتتاندىراتىن ىرگەلى باستامالار قولعا الىندى.
ەڭ باستىسى, حالىقتىڭ الدىندا جاريا ەتىلگەن ۇندەۋ تولىعىمەن جۇزەگە اسادى دەپ سەنەمىز. ۇكىمەتكە دە ناقتى تاپسىرمالار بەرىلدى. قالعان ءۇمىتىمىز ەندى – ۇكىمەتتە!
دۋلات يسابەكوۆ,
مەملەكەتتىك سىيلىقتىڭ لاۋرەاتى, جازۋشى-دراماتۋرگ
الماتى
