قازىرگى تاڭدا اۋىل ايەلدەرىنىڭ جەر جانە ءوندىرىس رەسۋرستارىنا, قارجىلاندىرۋعا, الەۋمەتتىك قىزمەتتەرگە, سونداي-اق لايىقتى قىزمەت مۇمكىندىكتەرىنە دەگەن قولجەتىمدىلىكتەرى اناعۇرلىم كەم. اۋىل شارۋاشىلىق جۇمىس كۇشىن شامامەن 43% ايەلدەر قۇرايدى, ال اۋىلدىق ايەلدەر مەن ەركەكتەردىڭ ەڭبەك اقىلارىنىڭ مولشەرىندەگى ايىرماشىلىق جەكەلەگەن ەلدەردە 40%-عا دەيىن جەتەدى (قازاقستاندا – 31,4%).
قازاقستانداعى «بۇۇ-ايەلدەر» قۇرىلىمىنىڭ وكىلى يلەين كونكيەۆيچتىڭ ايتۋىنشا, «بارلىق ايەلدەردىڭ قۇقىقتارى مەن مۇمكىندىكتەرىنىڭ تەڭدىگىن قامتاماسىز ەتۋ ءۇشىن گەندەرلىك اسپەكتىلەردى ەسكەرەتىن ينۆەستيتسيالاردى, ساياساتتى, باعدارلامالاردى جانە بيۋدجەتتەردى مەملەكەتتىك دەڭگەيدە باسى مەتۋ ماڭىزدى. مەملەكەتتىك رەفورمالار ايەلدەر مەن قىزداردىڭ قۇقىقتارىن نىعايتۋعا جانە وندىرىستىك رەسۋرستار مەن نارىقتارعا قولجەتىمدىلىگىن قامتاماسىز ەتۋى ءتيىس, سونداي-اق اۋىلدىق ايەلدەرگە لايىقتى جۇمىس ورىندارى مەن قىزمەتتەرىن قۇرۋعا ىقپال ەتۋى كەرەك».
2017 جىلى «بۇۇ-ايەلدەر» قۇرىلىمىنىڭ قولداۋىمەن وتكەن زەرتتەۋ اياسىندا قازاقستانداعى اۋىلدىق ايەلدەردىڭ ەكونوميكالىق مۇمكىندىكتەرىنىڭ كەڭەيۋىنە كەدەرگى تۋدىراتىن نەگىزگى توسقاۋىلدار قارجىلاندىرۋداعى قيىندىقتار, قاجەتتى ماشىقتار مەن قۇزىرەتتىلىكتىڭ بولماۋى, كاسىپتى جۇرگىزۋ سالاسىنداعى ارنايى بىلىمگە قاتىستى شەكتەلگەن قولجەتىمدىلىك جانە تورەشىلدىك بولىپ تابىلادى. سونىمەن قاتار, ءداستۇرلى مادەني ۇستانىمداردىڭ دا بەلگىلى ءبىر اسەرى بار. ايەلدەرگە قاتىستى گەندەرلىك تاپتاۋرىندار مەن الەۋمەتتىك ەرەجەلەر كوپ جاعدايدا اۋىلدىق ايەلدەردىڭ ەكونوميكالىق بەلسەندىلىگى جانە الەۋەتىن جۇزەگە اسىرۋ جولىندا كەمسىتۋشىلىك تاجىريبەلەر مەن پسيحولوگيالىق توسقاۋىلداردى تۋدىرادى.
سوڭعى جىل بۇكىل الەمدەگى ادامداردىڭ اناعۇرلىم تەڭ قۇقىقتى بولاشاققا ۇمتىلاتىنىن بارىنشا جاقسى كورسەتتى. بۇعان قوعامنىڭ نازارىن ءتۇرلى گەندەرلىك اسپەكتىلەرگە اۋدارۋعا شاقىراتىن كوپتەگەن نارازىلىق مارشتارى مەن اقپاراتتىق كامپانيالار كۋا, سوندىقتان گەندەرلىك تەڭدىكتى قامتاماسىز ەتۋ, ايەلدەر مەن قىزداردىڭ قۇقىقتارى مەن مۇمكىندىكتەرىن كەڭەيتۋ كەز كەلگەن ەلدىڭ تۇراقتى دامۋىنىڭ ەڭ ماڭىزدى شارتتارىنىڭ ءبىرى.
