تەرەزەلەردى قىراۋ باسىپ, اياز ءار اينەككە وزىنە ءتان شەبەرلىكپەن كوركەمدەپ, ءبىر-بىرىنە ۇقسامايتىن ورنەكتەر سالادى. بەينە-ءبىر قارلى حانىمنىڭ مۇزدان سالىنعان سارايى تۇرعانداي. بۇل مەزگىلدە ادامدار تابيعاتتىڭ قۇپياسىن, ەرەكشە ءبىر ۇمتىلىس ساتتەرىن تاماشالايدى. «اياز سالعان ورنەكتەر» جوباسىنىڭ داستۇرگە اينالىپ جالعاسۋى دا وسى سۇلۋلىقتىڭ اسەرى.
جۋىردا شىمكەنت قالالىق بالالار كوركەمسۋرەت مەكتەبىنىڭ يۋنەسكو كلۋبىنا 10 جىل تولۋ مەرەكەسىنە وراي, «ون جىلعا – ون ءىس-شارا!» اياسىندا «اياز سالعان ورنەكتەر» اتتى وبلىستىق بالالار شىعارماشىلىق سۋرەت بايقاۋى ءوتتى. كورمەگە 221 بالانىڭ 300-دەن استام ءارتۇرلى تەحنيكامەن جاسالعان جۇمىستارى قويىلدى. بۇل سۇلۋ كورىنىستەرىمەن كوز تارتارلىق سۋرەتتەردىڭ اۆتورلارى – 5 پەن 17 جاس ارالىعىنداعى ونەرلى جاس دارىندار. «ساق» كينوستۋدياسىنىڭ ديرەكتورى نۋريددين پاتتەەۆ پەن سۋرەتشىلەر وداعىنىڭ مۇشەسى سەرىك جورابەكوۆ جانە وقو «جاستار رەسۋرستىق ورتالىعىنىڭ» «تالانتتى جاستاردى قولداۋ» ءبولىمىنىڭ ينسپەكتورى وسپان قۇدايبەرگەن ۇلىنىڭ قىراعى كوزىنەن ءوتىپ, 28 بالا جەڭىمپاز اتاندى. جەڭىمپاز جاس سۋرەتشىلەرىمىزگە «ساق» كينوستۋدياسىنىڭ اتىنان ن.پاتتەەۆ مىرزا بالالاردىڭ ءسۇيىپ كورەتىن «تومپاق» ءفيلمىنىڭ باس كەيىپكەرى بەينەلەنگەن فۋتبولكالاردى سىيلىققا تارتتى. ءىس-شارا بارىسىندا بالالار كوركەمسۋرەت مەكتەبىنىڭ «التىن جۇرەك» بەلسەندىلەر توبىنىڭ تىلشىلەرى, مەكتەپىشىلىك «ورلەۋ» گازەتىنىڭ كەزەكتى باسىلىمىنا ماتەريالدار جيناقتاپ , كەلگەن قوناقتارمەن سۇحباتتاستى. «اياز سالعان ورنەكتەر» اتتى وبلىستىق سۋرەت بايقاۋىنىڭ قورىتىندى كەزەڭى وڭتۇستىك قازاقستان وبلىسىنداعى العاشقى يۋنەسكو كلۋبى شىمكەنت قالالىق بالالار كوركەمسۋرەت مەكتەبى دايىنداعان قىزىقتى توسىن سىيلار مەن ءتۇرلى شەبەرلىك سىنىپتارعا جالعاستى.
گۇلنارا كۋليەۆا
شىمكەنت
