اماندىق-ساۋلىق سۇراسقان سوڭ, تانىسىپ, جاسىل كىتاپتىڭ بايانىن ايتتى. اپكەمىزدىڭ ەسىمى – بۇحارگۇل ەكەن.
– اتام ابدىحالىق موللا 1884 جىلى قازىرگى قاراعاندى وبلىسى شەت اۋدانى كيىكتى, مويىنتى وڭىرىندە دۇنيە ەسىگىن اشىپتى. اتادان بەس اعايىندى ەكەن. ءبارى ءدىن جولىنا تۇسكەن قالپە, مولدا بولعان كىسىلەر. ون التى جاسقا تولعان شاعىندا ارعى اتامىز دۇيسەن قالپە قاراتاۋ دەگەن جەردەگى مەدرەسەگە وقۋعا بەرىپتى. ون ءبىر جىل سوندا وقىپ, ەلگە قايتىپتى. مولدالىق قۇرىپ جۇرگەن شاعىندا 1930 جىلى نكۆد سوڭىنا ءتۇسىپ, التى اي قىستا تاۋدى پانا قىپ, كۇن كەشىپتى. اقىرى قۋعىن توقتامايتىن بولعان سوڭ, كەرەگەتاس تاۋىنىڭ ءبىر ۇڭگىرىنە قۇران كىتاپتارىن تىعىپ, ءوزى قىرعىزستانعا ءوتىپ كەتەدى. سوندا ءۇبىرلى-ءشۇبىرلى بولىپ, 1963 جىلى تۋىپ-وسكەن ەلىنە ورالادى. باياعى تىعىپ كەتكەن كىتاپتارىن 30 جىلدان سوڭ تاۋىپ, الادى. قازىر سول كىتاپتار عابدۋلحاميد باۋىرىمىزدىڭ ۇيىندە. اتامىز ولەڭ جازعان ەكەن. سونى جيناقتاپ شىعارعان ەدىك. ەگەمەندىكتى اڭساعان اتامىزدىڭ تىلەگى ەل اماندىعى, بوستاندىق تاڭى بولاتىن. سول كىتابىن سىزدەرگە اكەپ وتىرمىن, – دەدى.
سودان بەرى ەكى ايعا جۋىق ۋاقىت وتكەنىن بايقاماي قالدىق پا, الدە كۇندەلىكتى جۇمىستىڭ قاۋرىتتىعىمەن قاپەرگە المادىق پا, ۋاقىت سىرعىپ وتە شىعىپتى. ەل ىشىندە ولەڭ جازاتىن اقساقالدارىمىز كوپ-اق. بۇرىن دا جازعان اتالارىمىز از بولماپتى.
ولەڭدەرىن پاراقتاپ وتىرعاندا اۆتوردىڭ جان دۇنيەسىن سەزىنبەي وتە شىعۋ مۇمكىن بە؟ سوناۋ عاسىردىڭ قويناۋىندا قالعان قۇپياسى باسىم قاسىرەتتى جىلداردىڭ سۇرقيا كەلبەتىن كوز الدىمىزعا كەلگەنىمەن, تولىق سەزىنە الماي ارە-سارە كۇي كەشەسىڭ. مىنا ومىردە تاۋەلسىزدىككە ەشتەڭە جەتپەيتىنىن عانا ءتۇسىنىپ ۇلگەرەسىڭ. ابدىحالىق مولدانىڭ:
بوداندىقتان كوز اشپاعان قازاعىم,
سان عاسىردا كوردىڭ ءومىر ازابىن.
اۋەل باستان باس-باسىڭا بي بولعان,
قازاعىما قۇردى جاۋلار تۇزاعىن,
– دەگەن سوزدەرگە قازىر كوركەمدىك جاعىنان كوپ ءمىن ايتا العانىمىزبەن, سول كەزدە وسى ءسوزدى قانشالىقتى اڭسارمەن, جان اۋىرتىپ جازعانىن ويلادىق پا؟! «قاشان ەگەمەن ەل بولامىز؟» دەگەن ءبىر كەزدەگى مازالى سۇراق – بۇگىن ءبىزدىڭ باقىتىمىز. ەگەمەنبىز! ەلمىز! تار جولدا, تايعاق كەشۋمەن كۇنى وتكەن ابدىحالىق مولدانىڭ كەلبەتى كوز الدىمىزعا جيىنتىق بەينەدەي كورىندى. ازاتتىقتى اڭساعان, سول جولدا جاپا شەككەن ەرلەرىم, رۋحتارىڭ شات بولسىن!
باعاشار تۇرسىنباي ۇلى,
«ەگەمەن قازاقستان»
