بۇگىن استانادا فۋتبولدان ۇلتتىق قۇرامانىڭ باس جاتتىقتىرۋشىسىن تانىستىرۋ ءراسىمى ءوتتى. ءباسپاسوز ءماسليحاتىنا قاتىسقان قازاقستان فۋتبول فەدەراتسياسىنىڭ باس حاتشىسى ازامات ايتقوجين جۋرناليستەرگە بۇعان دەيىن ەلوردانىڭ «استانا» كومانداسىن جاتتىقتىرىپ, جوعارى ناتيجە كورسەتە بىلگەن بولگار مامانى ستانيمير ستويلوۆ ۇلتتىق قۇرامانىڭ باس جاتتىقتىرۋشى قىزمەتىنە تاعايىندالعانىن مالىمدەدى.
وسىعان دەيىن قفف باس حاتشىسى ازامات ايتحوجين قۇراما تىزگىنىن ەشقانداي رەسەيلىك باپكەرلەر ۇستامايتىنىن, ۇلتتىق قۇراماعا تالعات بايسۋفينوۆ پەن «استانا» كلۋبىنىڭ باس جاتتىقتىرۋشىسى ستانيمير ستويلوۆ كەلۋى مۇمكىن ەكەندىگىن ايتقان بولاتىن. ءسويتىپ, تاڭداۋ سوڭعىسىنا تۇسكەن ەكەن.
ء«بىز ەشقانداي رەسەيلىك باپكەرلەرمەن كەلىسسوز جۇرگىزگەن جوقپىز. بىزدە فۋتبولدان قازاقستان ۇلتتىق قۇراماسىنىڭ باس جاتتىقتىرۋشىسى بولۋعا ءتورت ۇمىتكەردىڭ ءتىزىمى بولدى. اتاپ ايتقاندا, قازاقستاندىق تالعات بايسۋفينوۆ جانە قازاقستاندىق كوماندامەن جۇمىس ىستەگەن بولگاريالىق ستانيمير ستويلوۆتى ەرەكشە قاراستىرعانىمىزدى جاسىرمايمىن. سونداي-اق تىزىمدە شەتەلدىك جاتتىقتىرۋشىلار دا بولدى. بىراق ءبىز ستانيمير ستويلوۆتى ۇلتتىق قۇراماعا لايىقتى جاتتىقتىرۋشى دەپ تاپتىق», دەدى باس حاتشى.
ءباسپاسوز جيىنىندا «استانا» فۋتبول كلۋبىنىڭ ەمەس, ۇلتتىق قۇرامانىڭ باس جاتتىقتىرۋشى رەتىندە ءسوز العان ستانيمير ستويلوۆ ەندىگى كەزەكتە قازاقستان فۋتبولىنىڭ دامۋىنا بار كۇش-جىگەرىن سالاتىنىن ايتتى.
«كەشە قازاقستان فۋتبول فەدەراتسياسىنىڭ پرەزيدەنتىمەن جولىعىپ, ۇلتتىق قۇراما توڭىرەگىندەگى بىرقاتار ماسەلەلەردى تالقىلاپ الدىق. مەن بۇعان دەيىن قازاقستاننىڭ كومانداسىن جاتتىقتىرىپ, بيىك بەلەسكە كوتەرگەن بولسام, ەندىگى كەزەكتە بار كۇشىمدى ۇلتتىق قۇراماعا سالامىن. قازاقستاندىق جانكۇيەرلەر بۇعان دەيىن تەڭ ويىنعا قۋانعان بولسا, ەندى تەك جەڭىسكە قۋاناتىن بولادى دەپ ۇمىتتەنەمىن», دەيدى س.ستويلوۆ.
ايتا كەتەيىك, بۇعان دەيىن ۇلتتىق قۇرامانى رەسەيلىك مامان الەكساندر بوروديۋك جاتتىقتىرعان بولاتىن. ول قازاقستان قۇراماسىنىڭ باس جاتتىقتىرۋشىسى بولىپ وتكەن جىلدىڭ 27 اقپانىندا تاعايىندالىپ, ءۇش جىلدىق كەلىسىمشارتقا وتىرعان بولاتىن. ءبىر جىلدىڭ ىشىندە بوروديۋك ۇلتتىق قۇرامامەن جەتى ويىن وتكىزىپ, بەر رەت تەڭ ويناپ, جەتى رەت قارسىلاسقا ەسە جىبەرگەن. وسىنداي ءساتسىز ناتيجەسى ءۇشىن ۇلتتىق قۇراما ونىڭ قىزمەتىنەن باس تارتقان ەدى.
ستانيمير ستويلوۆتىڭ قازاقستان ۇلتتىق قۇراماسىمەن العاشقى ويىنىن 23 ناۋرىزدا بۋداپەشتە ۆەنگريا قۇراماسىمەن جولداستىق كەزدەسۋدە وتكىزەدى.
