azattyq.org
وسىعان وراي, تومەندەگى ماسەلەنىڭ وزەكتىلىگىن اتاپ ءوتۋ قاجەت دەپ سانايمىن. بۇگىنگى كۇنى رەسپۋبليكامىزدىڭ كوپتەگەن قالالارىندا «اپاتتىق» جاعدايدا دەپ تانىلعان ۇيلەر بارشىلىق. «اپاتتىق» دەپ تانىلعان ۇيلەردىڭ تۇرعىندارى جەرگىلىكتى اتقارۋشى ورگانداردا تۇرعىن-ءۇي الۋ كەزەگىنە تىركەلگەن.
قولدانىستاعى زاڭناماعا سايكەس, جەرگىلىكتى اتقارۋشى ورگاندارعا اپاتتى جاعدايدا دەپ تانىلعان ۇيلەردە تۇرىپ جاتقان ازاماتتاردىڭ وتباسىلارىن تۇرعىن ۇيمەن قامتاماسىز ەتۋ مىندەتى جۇكتەلگەن. بىراق بۇل ماسەلەنى شەشۋدە قولدانىستاعى زاڭناما ءالى تولىق شەشىم جاساي المايدى. ويتكەنى اپاتتى جاعداي دەپ تانىلعان ۇيدەگى ازاماتتار تۇرعىن ءۇي الۋ كەزەگىنە ءارتۇرلى مەزگىلدە تىركەلگەن. ەگەر اپاتتى ءۇي كۇتپەگەن جەردەن جارامسىز بولىپ, ىستەن شىقسا تۇرعىنداردىڭ ءبارى بىردەي ءۇي الا الماي, جارتىسى باسپاناسىز قالادى. مىسالى, قوس قاباتتى تۇرعىن ۇيدە 18 وتباسى تۇرىپ جاتىر دەلىك. ولاردىڭ تۇرعىن ۇيگە تىركەلۋ كەزەگى ءارتۇرلى, ءبىرىنشى تىركەلگەن وتباسىلاردى تۇرعىن ۇيمەن قامتاماسىز ەتۋ مۇمكىندىگى بولسا, سوڭعى تىركەلگەن وتباسىنىڭ كەزەگى 10 جىلدان سوڭ كەلۋى مۇمكىن. تۇرعىندار ون جىلدى كۇتە المايدى عوي, دەمەك اپاتتىق تۇرعىن ۇيدەگى ازاماتتاردىڭ بارلىعىن ءبىر مەزەتتە تۇرعىن ۇيمەن قامتاماسىز ەتۋ قاجەت.
سوندىقتان مەن پرەمەر-مينيستر باقىتجان ساعىنتاەۆتىڭ اتىنا اپاتتىق جاعدايداعى ۇيلەردى جويۋ ماقساتىندا, تۇرعىن ءۇي قۇرىلىسىن «نۇرلى جەر» تۇرعىن ءۇي قۇرىلىسى باعدارلاماسىنىڭ ءبىر باعىتى رەتىندە ەنگىزۋ تۋرالى قولدانىستاعى زاڭناماعا ءتيىستى وزگەرىستەر قاراستىرۋدى ۇسىنىپ, دەپۋتاتتىق ساۋال جولدادىم.
ەربولات مۇقاەۆ,
سەنات دەپۋتاتى
