Falcon Heavy فلوريدانىڭ كەننەدي عارىش ورتالىعىنداعى ۇشىرۋ كەشەنىنەن عارىشقا ءساتتى كوتەرىلدى. بۇل - الەمدەگى ەڭ قۋاتتى جانە ەڭ كوپ جۇك كوتەرە الاتىن زىمىران. اتالعان زىمىران وربيتاعا وزىمەن 64 توننا جۇك كوتەرە الادى, ال مارسقا 17 توننالىق جۇكتى جەتكىزۋگە مۇمكىندىگى بار. Space X كومپانياسى وكىلدەرى «وسكە تۇسەتىن وسىنشاما سالماق پەن قىسىمدى ەسكەرسەك, Falcon Heavy بولاشاقتا ادامداردى مارسقا اپارا الادى» دەپ ايتقان بولاتىن. سونىمەن بىرگە, اۋە كەمەسىنىڭ بورتىنا يلون ماسكتىڭ Tesla Roadster سپورتتىق كولىگى ورناتىلىپ, سكافاندر كيگەن قۋىرشاق ادام وتىرعىزىلعان.
زىمىران اۋەگە ۇشىرىلعان سوڭ, شامامەن سەگىز مينۋتتان كەيىن ونىڭ ەكى جاعىنداعى ۇدەتكىش بلوگى جەرگە ورالىپ, كاناۆەرال مۇيىسىنە جاقىن اۋە كۇشتەرى ستانتسياسىنا قونعان بولاتىن. سونىمەن قاتار, Space X كومپانياسى زىمىراننىڭ ۇدەتكىش بلوكتارىن ەكىنشى رەت عارىشقا ۇشىرۋدى جوسپارلاپ وتىر. ەگەر بۇل ويداعىداي جۇزەگە اسسا, وندا عارىشقا ۇشۋ مەن جۇك جەتكىزۋ باعاسى ارزانداۋى مۇمكىن.
2017 جىلدىڭ مامىر ايىندا SpaceX Falcon Heavy اۋىر زىمىران تاسىعىشىنىڭ ورتالىق بلوگىن سىناقتان وتكىزگەن بولاتىن.
