پرەزيدەنت جولداۋدا كيبەرقاۋىپسىزدىك ماسەلەسىنە باسا نازار اۋدارىپ, تسيفرلى تەحنولوگيالاردى ەنگىزۋ بارىسىندا اقپاراتتىق قاۋىپسىزدىك شارالارىن كۇشەيتۋگە شاقىردى. الداعى مىندەتتەر اياسىندا ەلباسى كيبەرقاۋىپسىزدىك شارالارى قازاقستاننىڭ ۇلتتىق قاۋىپسىزدىك ستراتەگياسىندا كورىنىس تابۋعا ءتيىس ەكەنىن اتاپ ءوتتى.
بۇگىنگى زامان – اقپارات زامانى. جاڭالىق اشۋ, جاڭالىقتى جەتكىزۋ, حاباردار بولۋ وندىرىستىك تەحنولوگيانى قارقىندى دامىتۋعا, ءوندىرىستى ۇلعايتۋعا, ءونىم شىعارۋدى ارتتىرۋعا, ونى جەتكىزۋ مەن وتكىزۋگە, سونداي-اق تابىس كوزىن كوبەيتۋگە مۇمكىندىك بەرەدى. سوندىقتان اقپارات – اسا كوپ رەسۋرستاردى, ونىڭ ىشىندە ەڭبەك كۇشى مەن وي-سانا ەڭبەگىن جۇمساماي-اق قارجىنى ۇنەمدەۋ مەن ودان ءارى كوبەيتۋ كوزىنە اينالدى. الەمدەگى الپاۋىت ەلدەردى بىلاي قويعاندا, ايگىلى كومپانيالاردىڭ وزدەرى جاڭادان شىعاتىن ونىمدەرىن قىزعىشتاي قورعاپ, قاشان رەسمي تۇردە تانىستىرىلمايىنشا جانە جاپپاي ساۋداعا شىعارىلمايىنشا قۇپيا ۇستايدى. ءتىپتى, جوعارى تەحنولوگيا سالاسىنداعى الداعى جوسپارلارى دا, كوزدەگەن مەجەلەرى دە, قول جەتكەن ناتيجەلەرى دە جۇرت كوزىنەن تاسادا بولادى. ونىڭ مىسالىن الەمدەگى ايگىلى اۆتوموبيل مەن تەلەديدار شىعاراتىن زاۋىتتار مەن كاسىپورىندار تاجىريبەسىنەن كۇندەلىكتى كورىپ تە ءجۇرمىز.
وتكەن عاسىردىڭ 30-40 جىلدارى كەڭەس وداعى قارۋ-جاراق, اسكەري تەحنيكا, بايلانىس قۇرالدارى جانە باسقا دا زاۋىتتارداعى تەحنولوگيالاردى قۇپيا ۇستاۋىنىڭ ارقاسىندا الەمدىك دەرجاۆاعا اينالدى. كوپتەگەن جاڭالىقشىل عالىمدار, ونەرتاپقىشتاردىڭ ءۇيى دە, جۇمىسى دا قاتاڭ كۇزەتىلىپ, ەسىمدەرى اتالمادى. سونداعى ماقسات – ۇزدىك تەحنولوگيانىڭ جالپاق جۇرتقا جاريا بولماۋى ەدى. ول مىندەت قاتاڭ ءتارتىپتىڭ ارقاسىندا ورىندالدى.
بۇگىنگى تاڭداعى كيبەرقاۋىپسىزدىكتى كۇشەيتۋدەگى باستى ماقسات تا وسى. عالىمدار مەن ونەرتاپقىشتاردىڭ, بەلسەندى ازاماتتاردىڭ ءوندىرىستى ۇلعايتۋعا, ونەركاسىپتى دامىتۋعا, شىعىندى ازايتۋعا, ءومىردى جاقسارتۋعا ارنالعان جاڭالىقتارى – ەلىمىزگە دە, ونىڭ اۆتورىنا دا پايدا اكەلۋگە ءتيىس ەكەنى بەلگىلى. ول ءۇشىن ازاماتتاردىڭ وتانشىلدىق, وتانسۇيگىشتىك قاسيەتتەرىمەن قوسا كيبەرقاۋىپسىزدىك شارالارىن كۇشەيتۋ اسا ماڭىزدى. ال جاستاردى وتانشىلدىققا تاربيەلەۋ – وتباسىنان, بالاباقشادان باستالۋى ءتيىس.
كيبەرقاۋىپسىزدىكتى نىعايتۋ – اسىرەسە, وتانىمىزدى قورعاۋ سالاسىندا اسا ماڭىزدى ەكەنى داۋسىز. قورعانىس سالاسى, ەڭبەك ونىمدىلىگى, ءوندىرىس قۋاتى, ۇنەم مۇمكىندىكتەرى كيبەرقاۋىپسىزدىكپەن تىكەلەي بايلانىستى. بۇل ماسەلەگە الپاۋىت كومپانيالارمەن قاتار شاعىن كاسىپورىندار دا نازار اۋدارۋى ءتيىس. سالا ماماندارى وسى تاقىرىپ بويىنشا ءتۇرلى جيىندار مەن باسقوسۋلار وتكىزىپ, مىندەتتەردى ناقتىلاۋعا اتسالىسۋى كەرەك. بەيقامدىق پەن ەنجارلىقتى قازىرگى زامان تالابى كوتەرمەيدى.
ەلباسى جولداۋدا «مەملەكەت پەن كومپانيالار جاڭا تەحنولوگيالاردى ەنگىزە وتىرىپ, ءوز اقپاراتتىق جۇيەلەرى مەن قۇرىلعىلارىنىڭ بەرىك قورعالۋىن قامتاماسىز ەتۋى كەرەك. بۇگىندە كيبەرقاۋىپسىزدىك ۇعىمى تەك اقپاراتتى عانا ەمەس, سونىمەن قاتار وندىرىستىك جانە ينفراقۇرىلىمدىق نىسانداردى باسقارۋ تەتىگىن قورعاۋ دەگەندى دە بىلدىرەدى», دەپ اتاپ وتكەن بولاتىن. سوندىقتان بۇل تاقىرىپ, اقپارات داۋىرىندە اسا ماڭىزدى ماسەلەلەردىڭ ءبىرى بولىپ وتىر.
نۇرجان نۇرسيپاتوۆ,
پارلامەنت سەناتىنىڭ دەپۋتاتى
