شاراعا جينالعان زيالى قاۋىم وكىلدەرى مەن ءتىل جاناشىرلارىنا اتالمىش باسقوسۋدىڭ ءمان-ماڭىزى جايلى تۇسىندىرگەن كوميتەت توراعاسى قۋات بوراش, ەلباسى نۇرسۇلتان نازارباەۆتىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىنىڭ جەتىنشى باعىتىندا اتاپ وتىلگەندەي, ادامي كاپيتالدىڭ وزەكتىلىگى جانە سونىمەن قاتار تەرمينولوگيا تۇرعىسىنان قازاق ءتىلىن حالىقارالىق دەڭگەيگە جاقىنداتۋ ماسەلەسىن جۇزەگە اسىرۋ ءۇردىسى نەگىزىندە كەزەكتى جيىن وتكىزىلىپ وتىرعانىن جەتكىزدى. وسى ورايدا «كەڭەسىپ پىشكەن تون كەلتە بولماس» دەگەندەي, ورتاق پىكىر, ورامدى ويلارعا جول اشىپ, كوپشىلىكپەن كەلەلى كەڭەس قۇرۋدىڭ قاجەتتىلىگىنە توقتالدى.
دوڭگەلەك ۇستەلدىڭ نەگىزگى بايانداماشىسى ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ باسشىسى ەربول تىلەشوۆتىڭ پىكىرىنەن تۇيگەنىمىز, مەملەكەتتىك ءتىلدى دامىتۋدىڭ 2011-2020 جىلدارعا ارنالعان باعدارلاماسىنا سايكەس, قازىرگى تاڭدا قوعامعا قاجەت وقۋ-ادىستەمەلىك جانە تانىمدىق كىتاپتار شىعارۋ ماسەلەسى ءساتتى ءجۇرىپ جاتىر ەكەن.
ياعني بۇعان دەيىن جوعارىداعى باعدارلاماعا ۇمىتكەر رەتىندە ورتالىققا ءارتۇرلى تاقىرىپتاردى قامتىعان 400-گە تارتا شىعارما كەلىپ تۇسكەن. وسى تۋىندىلاردى فيلولوگ-عالىم جانتاس جاقىپوۆ باستاعان ساراپتامالىق توپ قاراپ شىعىپ, سۇرىپتالىپ الىنعان 70 كىتاپقا ءباتۋاسىن بەرگەن.
ماقۇلدانعان شىعارمالار نەگىزىنەن سوزدىكتەر, بالالار ادەبيەتى, ءتىل ۇيرەنۋ قۇرالدارى, تانىمدىق تۋىندىلار جانە اۋدارما كوركەم ادەبيەتتەر.
جوعارىداعى جيىن بارىسىندا جاڭادان جارىق كورگەن 36 كىتاپتىڭ تانىستىرىلىمى بولدى. وسىلاردىڭ ىشىندەگى باستى قۇندىلىق ۇلت ۇستازى احمەت بايتۇرسىنوۆتىڭ تۇلعالىق ەنتسيكلوپەدياسى مەن ادەبيەتشى عالىم اسقار ەگەۋباەۆتىڭ اۋدارماسىمەن جارىق كورگەن ماحمۇد قاشقاريدىڭ ءۇش تومدىعىنىڭ ەكىنشى باسىلىمى. سونىمەن بىرگە ءارتۇرلى سالالىق سوزدىكتەر, اراب-پارسى لەكسيكاسى, قىرعىز جازۋشىسى شىڭعىس ايتماتوۆتىڭ بۇعان دەيىن قازاق تىلىنە اۋدارىلماعان «تاۋ قۇلاعان» اتتى تۋىندىسى, الاش قايراتكەرى تەلجان شونانوۆتىڭ بەس تومدىعى, بالالارعا ارنالعان «الاش قوزعالىسى» اتتى تانىمدىق وقۋلىق پەن الاش يدەياسىن قولداعان اقىنداردىڭ جىر جيناعى, بەلگىلى تۇركولوگ ق.سارتقوجا ۇلىنىڭ «تاس كىتاپتىڭ قۇپياسى» اتتى تۋىندىسى, ءتىلشى عالىم ءا.جۇنىسبەكتىڭ قازاق ءتىلىنىڭ ارتيكۋلياتسيالىق بازاسى تولىق تالدانعان ء«تول ءالىپبي – ءتول جازۋ ماسەلەلەرى» اتتى ەڭبەگى بار.
ەكىنشى ءبىر قۋانارلىق جاعداي, جارىق كورگەن كىتاپتاردىڭ ەلەكتروندى نۇسقاسى جيناقتالعان سD نۇسقاسى قوسا ۇسىنىلىپ وتىرسا, الداعى كۇندەرى ۇلتتىق ارنادان ءار جۇما سايىن ءتىل دامىتۋعا ارنالعان «ەنشى» اتتى جاڭا جوبا كورەرمەنگە جول تارتپاق. جوبا قازاقتىڭ ۇمىت بولعان سالت-داستۇرلەرى, ۇلتتىق ويىندار, تۇرمىستىق مادەنيەتىن دارىپتەۋمەن قاتار ءتىل ءبىلىمى, مادەنيەت, تانىم, ءداستۇرىمىزدى ناسيحاتتاۋعا ارنالعان دەيدى شارانى ۇيىمداستىرۋشىلار. سونىمەن قاتار 15 سەريالى ء«سوز قازىناسى» اتتى انيماتسيالىق فيلم دە كەشىكپەي «بالاپان» ارناسى ارقىلى كورەرمەنگە ۇسىنىلماق.
بەكەن قايرات ۇلى,
«ەگەمەن قازاقستان»
سۋرەتتى تۇسىرگەن
ورىنباي بالمۇرات,
«ەگەمەن قازاقستان»
