فوتو: تەمىربولات توقمامبەتوۆ
نەمىس تەحنولوگياسى بويىنشا ءىرى پانەلدى قابىرعالاردان سالىنعان 9 قاباتتى, 180 پاتەرلىك جاڭا ءۇيدى «بولاشاق-ت» كومپانياسى بار-جوعى 8 اي ىشىندە ءبىتىرىپ ۇلگەرگەن. ال كىرپىشتەن قالانعان 96 پاتەرلىك ەكىنشى ءۇيدى «دوموسترويتەل» وندىرىستىك كووپەراتيۆى سالعان. مۇنىڭ العاشقىسىنا 1,3 ملرد تەڭگە قاراجات كەتسە, ەكىنشى قۇرىلىس 830 ملن تەڭگەدەن استام قارجىعا باعالانعان.
- ەلباسى ن.ءا. نازارباەۆ جاقىندا عانا قازاقستان حالقىنا ارنالعان ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا تۇرعىن ءۇي-كوممۋنالدىق كەشەنگە, حالىقتىڭ تۇرعىن ءۇي قۇرىلىسىنا ەرەكشە كوڭىل اۋدارۋدى تاعى دا تاپسىردى. مىنە, ەلباسى قابىلداعان «نۇرلى جەر» باعدارلاماسى اياسىندا بۇگىن ءبىز 300-گە جۋىق پاتەردى جاڭا يەلەرىنە تابىستاعالى تۇرمىز. بۇل – ۇلكەن قۋانىش. بۇل – مەملەكەتتىڭ قامقورلىعى. بۇل مەملەكەتتىك باعدارلامالاردىڭ حالىق يگىلىگىنە جۇمىس ىستەپ جاتقانىنىڭ كورىنىسى, كوپتەن كۇتكەن قۋانىشتارىڭىز قۇتتى بولسىن! – دەدى پاتەر كىلتىن تابىستاۋعا ارنالعان سالتاناتتى شارادا باتىس قازاقستان وبلىسىنىڭ اكىمى التاي كولگىنوۆ.
ورالدا اۋا تەمپەراتۋراسى مينۋس 30 گرادۋسقا جۋىقتاپ تۇر. كۇننىڭ ايازىنا قاراماستان جينالعان حالىقتىڭ قۋانىشىندا شەك جوق, شاشۋ شاشىپ, تويلاپ جاتىر.
ءوڭىر باسشىسى التاي كولگىنوۆ, باتىس قازاقستان وبلىستىق ءماسليحاتىنىڭ حاتشىسى مالىك يمانقۇل, ورال قالاسىنىڭ اكىمى مۇرات مۇقاەۆ جاڭا پاتەر يەلەرىنە باسپانا كىلتتەرىن سالتاناتپەن تابىس ەتتى. سۋ جاڭا شاڭىراق كىلتىن الدىمەن العان كوپ بالالى وتباسىلار اتىنان ساۋلە راحمەتوۆا, الەكساندر ماحورين, قىرمىزى مەڭدەشەۆا مەملەكەت تاراپىنان كورسەتىلىپ جاتقان قامقورلىق ءۇشىن ەلباسىنا, ءوڭىر باسشىلىعىنا جانە قۇرىلىسشىلارعا العىس ايتتى.
قازبەك قۇتتىمۇرات ۇلى,
«ەگەمەن قازاقستان»
