«بىرىنشىدەن, سەنىم شارالارى بۇكىل ادامزاتقا جاڭا جويقىن سوعىس قاتەرى تونگەن XX عاسىردىڭ ەكىنشى جارتىسىندا جاپپاي جويىلۋ قاۋپىنىڭ الدىن الۋ كەزىندە ءوزىن-ءوزى اقتادى. بۇۇ جارعىسىندا «بىزدىك باستى مىندەتىمىز ‒ كەلەر ۇرپاقتى سوعىس ورتىنەن قۇتقارۋ» دەپ جازىلعان», دەي كەلە ەلباسى قازاقستاننىڭ بۇۇ جۇيەسىندەگى شيرەك عاسىر ىشىندە قارقىندى دامۋ جولىنان وتكەنىن اتاپ ءوتتى. ء«بىز يادرولىق ارسەنال بويىنشا الەمدەگى ءتورتىنشى ەلدەر تاراتپاۋ جونىندەگى قوزعالىستىڭ كوشباسشىسىنا اينالدىق. يادرولىق قارۋدان جانە يادرولىق دەرجاۆا مارتەبەسىنەن باس تارتۋ ءبىزدىڭ سانالى ءارى شىنايى تاڭداۋىمىز جانە قازاقستاننىڭ بارشا حالقى قولداپ, الەمدىك قوعامداستىق لايىقتى باعاسىن بەرگەن ەرىكتى قادامىمىز بولدى. بۇگىندە ەلىمىز يادرولىق قاۋىپسىزدىك سالاسىنداعى بارلىق ىرگەلى حالىقارالىق كەلىسىمدەردىڭ قاتىسۋشىسى بولىپ وتىر. ءبىز يادرولىق قارۋى جوق مەملەكەت رەتىندەگى مارتەبەمىزدى زاڭدى تۇردە بەكىتتىك», دەدى ەلباسى.
نۇرسۇلتان نازارباەۆتىڭ ايتۋىنشا, سەنىم شارالارىنىڭ بۇكىل پلانەتا كولەمىندە بەيبىتشىلىك نىعايتۋدىڭ اسا ماڭىزدى ەلەمەنتى رەتىندە كۇن تارتىبىنەن تۇسىرمەۋدىڭ ەكىنشى سەبەبى - ءوزارا سەنىم احۋالى حالىقارالىق ىنتىماقتاستىقتىڭ جاڭا مودەلىن قالىپتاستىرۋعا سەپتىگىن تيگىزە الادى. «ماگاتە-ءنىڭ تومەن بايىتىلعان ۋران بانكىنىڭ اشىلۋى ‒ وسى ىنتىماقتاستىقتىڭ جارقىن مىسالى ءارى ونىڭ جۇزەگە اسۋىنىڭ كورىنىسى. قازاقستان يادرولىق قارۋدى تاراتپاۋ رەجىمىن نىعايتۋعا وسىلايشا كەزەكتى ۇلەس قوستى», دەدى مەملەكەت باسشىسى.
«ۇشىنشىدەن, قازاقستاننىڭ يادرولىق قارۋسىز جولى وزگە ەلدەرگە ۇلگى ءارى تاجىريبە تۇرعىسىنان كومەك بولار ەدى. ءبىز تاۋەلسىز ەل بولىپ, مەملەكەتىمىزدى نىعايتتىق. يادرولىق قارۋدان باس تارتىپ جانە يادرولىق دەرجاۆالاردان شابۋىل جاساماۋ كەپىلدىگىن الىپ, جوعارعى بەدەلگە يە بولدىق. وسى رەتتە, سولتۇستىك كورەيا باسشىلىعىن ءبىزدىڭ جولىمىزبەن جۇرۋگە شاقىرامىز», دەدى پرەزيدەنت. مەملەكەت باسشىسىنىڭ اتاعان ءتورتىنشى سەبەبى - عىلىمي-تەحنولوگيالىق پروگرەستىڭ قازىرگى مۇمكىندىكتەرى جانە جاھاندانۋدىڭ شىنايى بولمىسى جاپپاي قىرىپ-جويۋ قارۋلارىن تاراتپاۋ مىندەتىن ادامزاتتىڭ امان ساقتالىپ قالۋ ماسەلەسىنە اينالدىرىپ وتىر.
