بيۋرو جۇمىسىن اشقان سەنات توراعاسى ءتورتىنشى ونەركاسىپتىك رەۆوليۋتسيا قارساڭىنداعى مۇلدەم جاڭا جاعدايدا ەلىمىزدى ودان ءارى دامىتۋدا ساپالى زاڭنامالىق قامتاماسىز ەتۋدىڭ ماڭىزدى ەكەنىن اتاپ ءوتتى.
ەلباسى جولداۋى مەملەكەتىمىزدىڭ جاڭا الەمگە بەيىمدەلۋىنە قاتىستى اسا وزەكتى ساۋالدارعا تولىقتاي جاۋاپ بەرەدى, - دەدى ق.توقاەۆ. «پرەزيدەنت ىقتيمال سىن-قاتەرلەر مەن قاۋىپتى ەسكەرە وتىرىپ, بولاشاق الەم قۇرىلىمىنداعى ىرگەلى وزگەرىستەرگە جان-جاقتى ءازىر بولۋعا شاقىردى. سوندىقتان ءبىز وسى جاعدايلارعا تولىق دايىندىقپەن بەت بۇرۋىمىز قاجەت», - دەپ كورسەتتى سەنات توراعاسى. وسى ورايدا ق.توقاەۆ جولداۋداعى مەملەكەت باسشىسى بەلگىلەگەن نەگىزگى مىندەتتەردىڭ ورىندالۋىن زاڭنامالىق جاعىنان قامتاماسىز ەتۋ بويىنشا كەشەندى ءىس-شارالار قابىلداۋعا قاتىستى سەنات الدىنا مىندەتتەر قويدى.
پارلامەنت جوعارى پالاتاسىنىڭ توراعاسى ەلباسى ءبىرىنشى كەزەكتە قابىلداۋدى بەلگىلەگەن زاڭدارعا ارىپەستەرىنىڭ نازارىن اۋداردى.
ەڭ الدىمەن قابىلدانۋى ءتيىس زاڭداردىڭ قاتارىندا ۆەنچۋرلىك قارجىلاندىرۋ, بيزنەستى رەتتەۋگە قاتىسۋدى ازايتۋ, تابيعي مونوپوليالار, جوعارى وقۋ ورىندارىنىڭ اكادەميالىق ەركىندىگى ماسەلەلەرىن زاڭنامالىق جاعىنان رەتتەۋ مىندەتتەرى بار.
سەنات توراعاسى ەلباسىنىڭ بانكتەردەن وففشورلىق كومپانيالارعا قارجى شىعارعانى ءۇشىن جاۋاپكەرشىلىكتى كۇشەيتۋ, جەكە تۇلعالاردىڭ بانكروتتىعى جانە ەلەكتروندىق ەڭبەك بيرجاسى تۋرالى جاڭا زاڭدار قابىلداۋ تۋرالى تاپسىرماسىن ەسكە سالدى. «تاعى ءبىر باستى مىندەت - «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستىڭ جاڭا ءماتىنىن, قابىلداۋ جانە ەكولوگيالىق كودەكسكە ۋاقىت تالابىنا سايكەس وزگەرتۋ ماسەلەلەرىن قاراۋ قاجەت»,- دەدى ق.توقاەۆ.
توراعا ەل دامۋىنىڭ جاڭا كەزەڭىنە قاجەتتى زاڭداردى ساپالى ءارى دەر كەزىندە قابىلداۋعا پارلامەنت سەناتىنىڭ الەۋەتى جەتكىلىكتى ەكەنىنە سەنىم ءبىلدىردى.
بيۋرو وتىرىسىندا پرەزيدەنت جولداۋىن ىسكە اسىرۋ جونىندەگى سەناتتىڭ ءىس-شارالار جوسپارى بەكىتىلدى. جوسپاردىڭ كۇن تارتىبىنە سەناتتىڭ تۇراقتى كوميتەتتەرىنىڭ ايماقتاردا كوشپەلى وتىرىستىرىن «كاسىپتىك ءبىلىم بەرۋ ساپاسىن زاڭنامالىق تۇرعىدان قامتاماسىز ەتۋدىڭ وزەكتى ماسەلەلەرى», «سوتتار مەن قۇقىق قورعاۋ ورگاندارىن تسيفرلاندىرۋدى قۇقىقتىق قامتاماسىز ەتۋ», «استانا اينالاسىنداعى ازىق-ت ۇلىك بەلدەۋى: جاي-كۇيى جانە پەرسپەكتيۆالارى» تاقىرىبى بويىنشا دوڭگەلەك ۇستەلدەر جانە باسقا دا وتىرىستار وتكىزۋ ەنگىزىلدى. بۇدان بولەك, جول ءجۇرىسى قاۋىپسىزدىگى, كولىك-لوگيستيكا ينفراقۇرىلىمىنىڭ تيىمدىلىگىن ارتتىرۋ جانە تەمىرجول ماشينا جاساۋدى ودان ءارى دامىتۋ, لاتىن الىپبيىنە كوشۋ جانە قازاق تىلىندەگى تەرمينولوگيا سالاسىنداعى زاڭنامانى جەتىلدىرۋ, «قازاقستان كيبەرقالقانى» كيبەرقاۋىپسىزدىك تۇجىرىمداماسىن ىسكە اسىرۋ, جەمقورلىققا قارسى ستراتەگيانى جۇزەگە اسىرۋ ماسەلەلەرى بويىنشا مۇددەلى مەملەكەتتىك ورگاندار باسشىلىعىمەن كەزدەسۋ قاراستىرىلعان.
سەناتتىڭ تۇراقتى كوميتەتتەرىنە ولاردىڭ قىزمەتى پرەزيدەنت جولداۋىندا قويىلعان مىندەتتەردى ناقتى ىسكە اسىرۋعا تىكەلەي بايلانىستى بولۋى قاجەتتىگى تاپسىرىلدى.
بيۋرو سەنات دەپۋتاتتارىنىڭ وڭىرلەرگە ساپارلارىنىڭ قورىتىندىلارى جونىندە تۇراقتى كوميتەتتەر توراعالارىنىڭ اقپاراتىن تىڭدادى.
ق.توقاەۆ ءوز ءسوزىن تۇيىندەي كەلە, مەملەكەت باسشىسىنىڭ جولداۋىن حالىققا جەتكىزۋ بويىنشا ايماقتاردا جۇرگىزىلگەن جۇمىستى ودان ءارى جالعاستىرۋدى تاپسىردى.
توراعا كەزدەسۋلەردە ايتىلعان سىندارلى ۇسىنىستاردى, وڭىرلەردەگى كوتەرىلگەن ماسەلەلەردى ەڭسەرۋ جولدارىن زاڭ شىعارۋ جۇمىسىندا ەسكەرۋدى ۇسىندى. «دەپۋتاتتار زاڭنامادا ايقىندالعان قۇزىرەتتەرىن بارىنشا پايدالانىپ, كوتەرىلگەن ماسەلەلەردىڭ وڭتايلى شەشىم تابۋىنا جان-جاقتى ىقپال ەتۋلەرى ءتيىس» ,- دەپ قورىتىندىلادى ق.توقاەۆ.
وتىرىس بارىسىندا كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنە جوعارعى سوت سۋديالارىن قىزمەتتەن بوساتۋ تۋرالى قازاقستان رەسپۋبليكاسى پرەزيدەنتىنىڭ ۇسىنۋىنا قاتىستى قورىتىندى دايارلاۋ تاپسىرىلدى. بيۋرو مۇشەلەرى سونداي-اق, 25 قاڭتاردا وتەتىن كەزەكتى سەناتتىڭ وتىرىسىنىڭ كۇن ءتارتىبىن كەلىستى.
سەناتورلار جوعارعى سوت سۋديالارىن قىزمەتتەن بوساتۋ تۋرالى; قازاقستان مەن ازەربايجان ۇكىمەتتەرى اراسىنداعى حالىقارالىق اۆتوموبيل قاتىناسى تۋرالى كەلىسىمدى راتيفيكاتسيالاۋ تۋرالى; قازاقستان مەن ءۇندىستان اراسىنداعى قوسارلانعان سالىق سالۋدى بولدىرماۋ جانە تابىس پەن كاپيتالعا سالىناتىن سالىقتارعا قاتىستى سالىق سالۋدان جالتارۋعا جول بەرمەۋ تۋرالى كونۆەنتسياعا جانە حاتتاماعا وزگەرىستەر مەن تولىقتىرۋلار ەنگىزۋ تۋرالى ۇكىمەتارالىق حاتتامانى راتيفيكاتسيالاۋ تۋرالى زاڭ جوبالارى قارايتىن بولادى.
