ماراپاتقا ۇسىنىلدى

ەلىمىزدىڭ پوليتسيا قىزمەتكەر­لەرى قىل­مىسكەرلەردى ۇستاۋدا جان اياماي قىزمەت ىستەپ, ءوز مىندەتتەرىن ادال اتقارىپ كەلەدى. وعان قازىر دالەل كوپ. بىرقاتارى قىل­مىس­كەرلەردى ۇستاۋدا ەرلىكپەن قازا تاپتى. سوعان وراي قارۋ­لانعان قىلمىسكەردى قولعا ءتۇسىرۋ كەزىندە قايسارلىق پەن باتىرلىق تانىتقانى ءۇشىن جامبىل وب­لىسى ءىىد-ءنىڭ 7 قىزمەتكەرىن, ونىڭ ىشىندە ۇشەۋىن (مارقۇم بولعان) قا­زاقستان رەسپۋبليكا­سىنىڭ مەملەكەتتىك ناگرادالارى­مەن ماراپاتتاۋ تۋرالى ۇسىنىم­حات جىبەرىلدى, دەيدى ءىىم رەسمي وكىلى ن.وراز. قىز­مەتتىك مىندەتتەرىن ورىن­داۋ كەزىندە قايسارلىق پەن باتىرلىق كور­سەتكەنى ءۇشىن الماتى قالاسىنىڭ ءىىد پاترۋلدىك پوليتسيا پولكىنىڭ 2 قىز­مەتكەرى (مارقۇم بولعان) مەملەكەتتىك ناگراداعا ۇسىنىلدى. ۇستىمىزدەگى جىلدىڭ 10 ايى ىشىندە ءىىو-نىڭ 71 قىزمەتكەرى قازا بول­عان, ونىڭ ىشىندە 18 قىزمەت­كەر – قىزمەتتىك مىندەتىن ورىن­داۋ كەزىندە, 9 قىزمەتكەر  – قىل­مىس­كەرلەردى قولعا ءتۇسىرۋ كەزىندە. جىلدىڭ باسىنان باستاپ ءىىو-نىڭ 15 قىزمەتكەرى, ونىڭ ىشىندە ەكەۋى (مارقۇم بولعان) مەملەكەتتىك ناگرادالارمەن ماراپاتتالدى. سونىمەن بىرگە ىشكى ىستەر مينيسترلىگى ىشكى ىستەر ورگان­دارى­نىڭ بارلىق اۋماقتىق ءبولى­نىس­تەرىنە تارازدا جانە الماتىدا قازا بولعان پوليتسيا قىزمەتكەر­لەرىنىڭ وتبا­سىنا, سونداي-اق جارا­لانعانداردى ەمدەۋ ءۇشىن ما­تەريالدىق كومەك كورسەتۋ تۋرالى حات جولداعان. ىشكى ىستەر ورگان­دارىنىڭ جەكە قۇرامى قازا تاپقان قىزمەتكەرلەردىڭ وتباسى­لارىنا كومەك كورسەتۋ رەتىندە ءبىر كۇندىك جالاقىلارىن اۋدار­ماق­شى. بۇعان قوسا, قىزمەتتىك مىندەتىن ورىنداۋ كەزىندە قازا بولعان قىزمەتكەرلەردىڭ وتباسى­لا­رىنا جەرلەۋ ءۇشىن 3 ايلىق اقشالاي قارا­جات, ال التى اي وتكەننەن كەيىن (مۇراگەرلىك قۇقىعى كۇشىنە ەنگەن سوڭ) 60 ايلىق قاراجات ءبو­لىنەدى. جاراقات العان قىزمەت­كەر­لەرگە ولاردى وڭالتۋ ءۇشىن ءجار­دەماقى بولىنەدى, دەيدى رەسمي وكىل. ال ەلىمىزدە وتكەن اپتا ىشىندە عانا 3448 قىلمىس تىركەلىپ, «ءىزى سۋىماي» 2042 قىل­مىس جانە بۇرىن جاسالعان 581 قىلمىس, ونىڭ ىشىندە وتكەن جىلدار سا­ناتىنداعى 19 قىلمىس اشىلعان. ىزدەۋ جاريالانعان 88 قىل­مىس­كەر ىزدەستىرىلىپ, تابىلىپ, 5 قارۋ ءتار­كىلەنگەن. ەسىرتكىنىڭ زاڭسىز اي­نالى­مىنا بايلانىستى 42 قىل­مىس انىقتالدى, ونىڭ ىشىندە  18 ساتۋ فاكتىسى. 8,5 كەلىدەن اسا ەسىرتكى زاتى الىندى. ءما­سەلەن, الماتى وبلىسىنىڭ پوليتسەيلەرى تالعار قالاسى­نىڭ تۇرعىنى 34 جاستاعى كەلىنشەكتى ءولتىرۋ قىلمىسىن اشتى. پىشاق جاراقاتى بار ونىڭ ءمايىتى  قا­راشا ايىندا پاتەرىندە تا­بىلعان ەدى. جەدەل-ىزدەستىرۋ ءىس-شارالارى بارىسىندا قىلمىستى پايداقورلىق ماق­سات­تا جاساعان 27 جانە 30 جاستاعى ەكى تۇر­عىن قولعا ءتۇستى. ولار جاسىرىن ءجا­بىر­لەنۋ­شىنىڭ ۇيىنە كىرىپ, ۇر­لىق جاساپ جاتقاندا جابىرلەنۋشى ۇي­قى­سىنان ويانىپ كەتكەن. كۇدىك­تىلەر كەلىنشەكتى ءولتىرىپ, وقيعا ورنى­نان بوي تاسالاپ ۇلگىرگەن. سول سياقتى الماتى قالاسىندا قازان ايىنىڭ ورتاسىندا تۇرعىن ءۇيدىڭ بىرىندە زورلىق-زومبىلىق بەلگىلەرى بار 56 جاستاعى جەرگىلىكتى ايەل ادامنىڭ ءمايىتى تابىلعان بولا­تىن. ارنايى جانە جەدەل-ىزدەستىرۋ ءىس-شارالارىن ءوت­كىزۋ بارى­سىندا 48 جاستاعى جەرگىلىكتى تۇر­عىن ۇستالدى. قىلمىستىڭ ورىن الۋىنا ىشىمدىك ءىشۋ سالدارىنان جابىرلەنۋشى مەن كۇدىكتىنىڭ ارا­سىندا شىق­قان ۇرىس-كەرىس تۇرتكى بولعان. قىل­مىستىڭ ءىزىن جاسىرۋ ءۇشىن كۇ­دىكتى ءمايىتتى ءۇيدىڭ جەرتولەسىنە جاسىرىپ تاستاعان. الەكساندر تاسبولاتوۆ.