«ەڭبەك نارىعىنىڭ تيىمدىلىگىن قامتاماسىز ەتىپ, ءاربىر ادامنىڭ ءوز الەۋەتىن ىسكە اسىرا الۋى ءۇشىن جاعداي جاساۋدىڭ ماڭىزى زور. بارلىق نەگىزگى ماماندىق بويىنشا زاماناۋي ستاندارتتار ازىرلەۋ قاجەت. بۇل ستاندارتتاردا جۇمىس بەرۋشىلەر مەن بيزنەسمەندەر ەڭبەككەرلەردىڭ ءبىلىمى, قابىلەتى مەن قۇزىرەتىنىڭ قانداي بولۋى قاجەتتىگىن ناقتى بەلگىلەيدى. كاسىبي ستاندارتتاردىڭ تالاپتارىن ەسكەرىپ, ءبىلىم بەرۋدىڭ جاڭا باعدارلامالارىن ازىرلەۋ قاجەت نەمەسە قازىرگى باعدارلامالاردى جاڭارتۋ كەرەك», دەدى ەلباسى.
مەملەكەت باسشىسى ءوزىن-ءوزى جۇمىسپەن قامتىعاندار مەن جۇمىسسىزدار ەكونوميكالىق ءوسىمنىڭ رەزەرۆى سانالاتىنىن ايتتى.
«مەن ءوزىن-ءوزى جۇمىسپەن قامتىعاندار ماسەلەسىن قاراستىرۋ جونىندە بىرنەشە رەت تالاپ قويعانمىن. ەڭبەك جانە حالىقتى الەۋمەتتىك قورعاۋ مينيسترلىگى بۇل ىسكە جاۋاپسىزدىق تانىتىپ, ءاتۇستى قاراپ وتىردى. ادامداردى ناتيجەلى جۇمىسقا تارتۋ ءۇشىن كوبىرەك مۇمكىندىك بەرىپ, ولاردىڭ جەكە كاسىبىن باستاۋىنا نەمەسە جاڭا ماماندىق الىپ, جۇمىسقا ورنالاسۋىنا جاعداي جاساۋ كەرەك», دەدى نۇرسۇلتان نازارباەۆ.
مەملەكەت باسشىسى «اتامەكەن» ۇلتتىق كاسىپكەرلەر پالاتاسىنىڭ بيزنەستى ۇيرەتۋ جونىندەگى جۇمىستارى قولداۋعا تۇرارلىق, ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسى اياسىندا ونىڭ قۇرالدارىن نىعايتا وتىرىپ, حالىقتىڭ وسى ساناتتارىن كەڭىنەن تارتۋ قاجەتتىگىن اتاپ ءوتتى.
ء«وزىن-ءوزى جۇمىسپەن قامتىعانداردى تىركەۋ ۇدەرىسىن مەيلىنشە جەڭىلدەتىپ, ولارعا مەملەكەت الدىنداعى مىندەتتەرىن ادال اتقارۋ ءتيىمدى بولاتىنداي جاعداي تۋعىزۋ قاجەت. قازاقستاندىقتاردىڭ جاڭا جۇمىس ورنىن سالىستىرمالى تۇردە تەزىرەك يەلەنۋگە, سونىڭ ىشىندە ەلىمىزدىڭ باسقا دا ەلدى مەكەندەرىنەن جۇمىس تابۋعا مۇمكىندىگى بولۋعا ءتيىس», دەدى نۇرسۇلتان نازارباەۆ.
ول بىرىڭعاي ەلەكتروندىق ەڭبەك بيرجاسىن كەڭ اۋقىمدا ەنگىزۋ قاجەت ەكەنىن, وندا بوس جۇمىس ورىندارى مەن جۇمىس ىزدەۋشىلەر تۋرالى بارلىق اقپارات جيناقتالۋعا تيىستىگىن اتاپ ءوتتى.
«ازاماتتار ۇيلەرىنەن شىقپاي-اق كاسىبي باعدارلى تەست تاپسىرىپ, وقۋ كۋرستارى مەن مەملەكەتتىك قولداۋ شارالارى تۋرالى ءبىلىپ, ءوزىن قىزىقتىراتىن جۇمىس تابا الاتىن بولادى. ەڭبەك كىتاپشالارىن دا ەلەكتروندىق فورماتقا كوشىرگەن ءجون. ەلەكتروندىق ەڭبەك بيرجاسى تۋرالى زاڭدى 2018 جىلعى 1 ساۋىرگە دەيىن قابىلداۋ قاجەت», دەدى مەملەكەت باسشىسى.
نۇرسۇلتان نازارباەۆ الەۋمەتتىك ساياسات ازاماتتاردى تولىققاندى ەكونوميكالىق ومىرگە تارتۋ ارقىلى جۇزەگە اسىرىلاتىن ايتتى.
«قازىر زەينەتاقى جۇيەسى تولىقتاي ەڭبەك وتىلىنە بايلانىستىرىلعان. كىم كوپ جۇمىس ىستەسە, سول كوپ زەينەتاقى الاتىن بولادى. وسىعان وراي, بارشا قازاقستاندىقتار وزدەرىنىڭ اتقاراتىن جۇمىستارىن زاڭداستىرۋعا زور ءمان بەرۋى كەرەك. الەۋمەتتىك ساقتاندىرۋ جۇيەسىندە دە ەڭبەك ءوتىلى مەن وتەماقى مولشەرى اراسىنداعى ءوزارا بايلانىس كۇشەيتىلەتىن بولادى», دەدى نۇرسۇلتان نازارباەۆ.
ول 2018 جىلدان باستاپ حالىقتىڭ الەۋمەتتىك تۇرعىدان از قامتىلعان توبىنا اتاۋلى الەۋمەتتىك كومەك كورسەتۋدىڭ جاڭا تارتىبىنە كوشكەنىمىزدى ەسكە سالدى.
«ونىڭ شەگى ەڭ تومەنگى كۇنكورىس دەڭگەيىنىڭ 40 پروتسەنتىنەن 50 پروتسەنتىنە دەيىن كوتەرىلدى. ەڭبەككە قابىلەتتى الەۋمەتتىك تۇرعىدان از قامتىلعان ازاماتتار ءۇشىن بەرىلەتىن قارجىلاي كومەك ولار جۇمىسپەن قامتۋ شارالارىنا قاتىسقان جاعدايدا عانا قولجەتىمدى بولادى. ەڭبەككە قابىلەتسىز ازاماتتارعا مەملەكەتتىك قولداۋ كورسەتۋ شارالارى كۇشەيتىلەدى», دەلىنگەن مەملەكەت باسشىسىنىڭ جولداۋىندا.
