«قازىرگى دەنساۋلىق ساقتاۋ ءىسى قىمباتقا تۇسەتىن ستاتسيونارلىق ەمگە ەمەس, نەگىزىنەن اۋرۋدىڭ الدىن الۋعا باعىتتالۋعا ءتيىس. سالاماتتى ءومىر سالتىن ناسيحاتتاي وتىرىپ, قوعامدىق دەنساۋلىقتى باسقارۋ ءىسىن كۇشەيتۋ كەرەك. جاستاردىڭ رەپرودۋكتيۆتى دەنساۋلىعىن قورعاۋعا جانە نىعايتۋعا ەرەكشە نازار اۋدارۋ كەرەك», دەدى ەلباسى.
ول تيىمدىلىگى از جانە مەملەكەت ءۇشىن شىعىنى كوپ ديسپانسەرلىك ەم قولدانۋدان نەگىزگى سوزىلمالى اۋرۋلارعا الىستان دياگنوستيكا جاساپ, سونداي-اق وسى سالانى امبۋلاتورلىق ەمدەۋ ارقىلى باسقارۋعا كوشۋ قاجەت ەكەنىن ايتتى. «بۇل تاجىريبە الەمدە بۇرىننان بار. ونى باتىل ءارى بەلسەندى تۇردە ەنگىزۋ كەرەك», دەدى مەملەكەت باسشىسى.
نۇرسۇلتان نازارباەۆ ونكولوگيالىق اۋرۋلارمەن كۇرەسۋ ءۇشىن كەشەندى جوسپار قابىلداپ, عىلىمي ونكولوگيالىق ورتالىق قۇرۋ قاجەتتىگىن تاپسىردى. «حالىقارالىق وزىق تاجىريبە نەگىزىندە اۋرۋدى ەرتە دياگنوستيكالاۋدىڭ جانە قاتەرلى ىسىكتى ەمدەۋدىڭ جوعارى تيىمدىلىگى قامتاماسىز ەتىلۋگە ءتيىس», دەدى.
مەملەكەت باسشىسى سونداي-اق, كارديولوگيا, بوساندىرۋ جانە وكپە اۋرۋىمەن كۇرەسۋ كەزىندە اتقارعان ىستەرىمىز سياقتى جۇمىستاردى دا جۇرگىزۋ كەرەكتىگىن تاپسىردى.
«دەنساۋلىق ساقتاۋ سالاسى حالىقتىڭ, مەملەكەتتىڭ جانە جۇمىس بەرۋشىنىڭ ورتاق جاۋاپكەرشىلىگىنە نەگىزدەلگەن مىندەتتى الەۋمەتتىك مەديتسينالىق ساقتاندىرۋ جۇيەسىنە كەزەڭ-كەزەڭىمەن كوشەتىن بولادى. ونى ەنگىزۋدىڭ قاجەتتىلىگى ەشقانداي كۇمان تۋعىزبايدى. الايدا, دەنساۋلىق ساقتاۋ مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگى ىسكە اسىرماعان دايىندىق جۇمىستارىن تىڭعىلىقتى جۇرگىزۋ تالاپ ەتىلەدى», دەدى نۇرسۇلتان نازاباەۆ.
ول مەملەكەتتىڭ مىندەتتەرىن ناقتى بەلگىلەي وتىرىپ, تەگىن مەديتسينالىق كومەكتىڭ كەپىلدىك بەرىلگەن كولەمىنىڭ جاڭا مودەلىن ازىرلەۋ قاجەتتىگىن اتاپ ءوتتى. «حالىق مەملەكەت تاراپىنان كەپىلدىك بەرىلمەگەن قىزمەتتەردى مىندەتتى الەۋمەتتىك مەديتسينالىق ساقتاندىرۋ جۇيەسىنىڭ قاتىسۋشىسى رەتىندە نەمەسە ەرىكتى مەديتسينالىق ساقتاندىرۋ, سونداي-اق بىرلەسە تولەۋ ارقىلى الا الادى», دەدى.
سونىمەن قاتار, اقپاراتتىق جۇيەلەردى بىرىكتىرۋ, موبيلدىك تسيفرلىق قوسىمشالاردى قولدانۋ, ەلەكتروندىق دەنساۋلىق پاسپورتىن ەنگىزۋ, «قاعاز قولدانبايتىن اۋرۋحاناعا» كوشۋ ارقىلى مەديتسينالىق كومەكتىڭ قولجەتىمدىلىگى مەن تيىمدىلىگىن ارتتىرۋ قاجەتتىگىن تاپسىردى.
«مەديتسينادا اۋرۋلاردى دياگنوستيكالاۋ مەن ەمدەۋدىڭ تيىمدىلىگىن ايتارلىقتاي ارتتىراتىن گەنەتيكالىق تالداۋ مەن جاساندى ينتەللەكت تەحنولوگيالارىن ەنگىزۋگە كىرىسۋىمىز كەرەك. مەديتسينالىق كادرلارمەن قامتاماسىز ەتۋ جانە ولاردى ساپالى دايارلاۋ ماڭىزدى ماسەلە بولىپ سانالادى. بۇگىندە بىزدە نازارباەۆ ۋنيۆەرسيتەتىنىڭ بىرەگەي مەديتسينا مەكتەبى بار. وندا بىرىكتىرىلگەن ۋنيۆەرسيتەت كلينيكاسى جۇمىس ىستەيدى. بۇل تاجىريبە بارلىق مەديتسينالىق جوعارى وقۋ ورىندارىنا تاراتىلۋعا ءتيىس», دەدى مەملەكەت باسشىسى.
ەلباسى وسى جانە باسقا دا شارالاردى ىسكە اسىرۋ ءۇشىن «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستىڭ جاڭا رەداكتسياسىن ازىرلەۋدى قاجەتتىگىن اتاپ ءوتتى.
