«مەملەكەت جاستارعا العاشقى ماماندىقتى بەرەدى. ۇكىمەت بۇل مىندەتتى ورىنداۋعا ءتيىس. ورتا مەكتەپ پەن كوللەدجدەر جانە جوعارى وقۋ ورىندارى ۇزدىك وقىتۋشىلارىنىڭ ۆيدەوساباقتارى مەن ۆيدەولەكتسيالارىن ينتەرنەتتە ورنالاستىرۋ كەرەك. بۇل بارلىق قازاقستاندىقتارعا, ونىڭ ىشىندە شالعايداعى ەلدى مەكەن تۇرعىندارىنا وزىق ءبىلىم مەن قۇزىرەتتىلىككە قول جەتكىزۋگە جول اشادى», دەدى ەلباسى.
ول جوعارى ءبىلىم بەرۋ ىسىندە جاساندى ينتەللەكتپەن جانە «ۇلكەن دەرەكتەرمەن» جۇمىس ىستەۋ ءۇشىن اقپاراتتىق تەحنولوگيالار بويىنشا ءبىلىم العان تۇلەكتەر سانىن كوبەيتۋ كەرەك ەكەنىن ايتتى.
«وسىعان وراي مەتاللۋرگيا, مۇناي-گاز حيمياسى, اگروونەركاسىپ كەشەنى, بيو جانە IT-تەحنولوگيالار سالالارىن زەرتتەۋ ىسىندە باسىمدىق بەرەتىن جوعارى وقۋ ورنى عىلىمىن دامىتۋ كەرەك. قولدانبالى عىلىمي-زەرتتەۋلەردى اعىلشىن تىلىنە بىرتىندەپ كوشىرۋدى جۇزەگە اسىرۋ تالاپ ەتىلەدى. جوعارى وقۋ ورىندارى شەتەلدەردىڭ جەتەكشى ۋنيۆەرسيتەتتەرىمەن, عىلىمي ورتالىقتارىمەن, ءىرى كاسىپورىندارىمەن جانە ترانسۇلتتىق كورپوراتسيالارىمەن بىرلەسكەن جوبالاردى بەلسەندى تۇردە جۇزەگە اسىرۋى قاجەت», دەدى نۇرسۇلتان نازارباەۆ.
مەملەكەت باسشىسى جەكە سەكتوردىڭ بىرلەسكەن قارجىلاندىرۋعا اتسالىسۋى بارلىق قولدانبالى عىلىمي-زەرتتەۋ ازىرلەمەلەرى ءۇشىن مىندەتتى تالاپ بولۋعا ءتيىس ەكەنىن ايتتى.
«جاس عالىمدارىمىزعا عىلىمي گرانتتار اياسىندا كۆوتا ءبولىپ, ولاردى قولداۋدىڭ جۇيەلى ساياساتىن جۇرگىزۋىمىز كەرەك. ءبىلىم بەرۋ سالاسىنا ءوزىنىڭ ينۆەستيتسيالىق جوبالارى مەن ەكسپورتتىق الەۋەتى بار ەكونوميكانىڭ جەكە سالاسى رەتىندە قارايتىن كەز كەلدى. جوعارى وقۋ ورىندارىنا ءبىلىم بەرۋ باعدارلامالارىن جاساۋعا كوبىرەك قۇقىق بەرىپ, ولاردىڭ اكادەميالىق ەركىندىگىن زاڭنامالىق تۇرعىدان بەكىتۋ كەرەك», دەدى مەملەكەت باسشىسى.
ول وقىتۋشىلاردىڭ قايتا دايارلىقتان وتۋىنە كۇش سالىپ, جوعارى وقۋ ورىندارىنا شەتەلدىك مەنەدجەرلەردى تارتىپ, الەمدىك ۋنيۆەرسيتەتتەردىڭ كامپۋستارىن اشۋ قاجەت ەكەنىن اتاپ ءوتتى.
«ۇلتتىڭ الەۋەتىن ارتتىرۋ ءۇشىن مادەنيەتىمىز بەن يدەولوگيامىزدى ودان ءارى دامىتۋىمىز كەرەك. «رۋحاني جاڭعىرۋدىڭ» ءمان-ماڭىزى دا ناق وسىندا. ءوزىنىڭ تاريحىن, ءتىلىن, مادەنيەتىن بىلەتىن, سونداي-اق زامانىنا لايىق, شەت تىلدەرىن مەڭگەرگەن, وزىق ءارى جاھاندىق كوزقاراسى بار قازاقستاندىق ءبىزدىڭ قوعامىمىزدىڭ يدەالىنا اينالۋعا ءتيىس», دەلىنگەن مەملەكەت باسشىسىنىڭ قازاقستان حالقىنا جولداۋىندا.
