ء«بىلىم بەرۋ باعدارلامالارىنىڭ نەگىزگى باسىمدىعى وزگەرىستەرگە ۇنەمى بەيىم بولۋ جانە جاڭا ءبىلىمدى مەڭگەرۋ قابىلەتىن دامىتۋ بولۋعا ءتيىس. 2019 جىلدىڭ 1 قىركۇيەگىنە قاراي مەكتەپكە دەيىنگى ءبىلىم بەرۋ ىسىندە بالالاردىڭ ەرتە دامۋى ءۇشىن ءوز بەتىنشە وقۋ ماشىعى مەن الەۋمەتتىك داعدىسىن دامىتاتىن باعدارلامالاردىڭ بىرىڭعاي ستاندارتتارىن ەنگىزۋ قاجەت», دەدى ەلباسى.
مەملەكەت باسشىسى ورتا ءبىلىم بەرۋ سالاسىندا جاڭارتىلعان مازمۇنعا كوشۋ باستالعانىن, ول 2021 جىلى اياقتالاتىنىن ەسكە سالدى.
«بۇل – مۇلدە جاڭا باعدارلامالار, وقۋلىقتار, ستاندارتتار جانە كادرلار. پەداگوگتاردى وقىتۋ جانە ولاردىڭ بىلىكتىلىگىن ارتتىرۋ جولدارىن قايتا قاراۋ كەرەك بولادى. ەلىمىزدىڭ ۋنيۆەرسيتەتتەرىندەگى پەداگوگيكالىق كافەدرالار مەن فاكۋلتەتتەردى دامىتۋ قاجەت. ءبىلىم بەرۋدىڭ بارلىق دەڭگەيىندە ماتەماتيكا جانە جاراتىلىستانۋ عىلىمدارىن وقىتۋ ساپاسىن كۇشەيتۋ كەرەك. بۇل – جاستاردى جاڭا تەحنولوگيالىق قالىپقا دايىنداۋدىڭ ماڭىزدى شارتى», دەدى نۇرسۇلتان نازارباەۆ.
ول ءبىلىم بەرۋ مەكەمەلەرىنىڭ اراسىنداعى باسەكەلەستىكتى ارتتىرىپ, جەكە كاپيتالدى تارتۋ ءۇشىن قالا مەكتەپتەرىندە جان باسىنا قاتىستى قارجىلاندىرۋ ەنگىزىلەتىنىن ايتتى.
«بىزدەگى وقۋشىلاردىڭ جۇكتەمەسى تمد ەلدەرىنىڭ ىشىندە ەڭ جوعارى بولىپ وتىرعانىن جانە ەكونوميكالىق ىنتىماقتاستىق جانە دامۋ ۇيىمى ەلدەرىنە قاراعاندا ورتا ەسەپپەن ۇشتەن ءبىر ەسەدەن كوپ ەكەنىن ەسكەرىپ, ونى تومەندەتۋ كەرەك», دەدى مەملەكەت باسشىسى.
ول بارلىق وڭىرلەردەگى وقۋشىلار سارايلارىنىڭ بازاسىندا كومپيۋتەرلەردى, لابوراتوريالاردى جانە 3د-پرينتەرلەردى قوسا العاندا, بارلىق قاجەتتى ينفراقۇرىلىمدارى بار بالالار تەحنوپاركتەرى مەن بيزنەس-ينكۋباتورلارىنىڭ جەلىسىن قۇرۋ كەرەكتىگىن تاپسىردى. ەلباسىنىڭ ايتۋىنشا بۇل جاس ۇرپاقتى عىلىمي-زەرتتەۋ سالاسىنا جانە وندىرىستىك-تەحنولوگيالىق ورتاعا ۇتىمدى تۇردە كىرىستىرۋگە كومەكتەسەدى.
«قازاقستاندىقتاردىڭ بولاشاعى – قازاق, ورىس جانە اعىلشىن تىلدەرىن ەركىن مەڭگەرۋىندە. ورىس ءتىلدى مەكتەپتەر ءۇشىن قازاق ءتىلىن وقىتۋدىڭ جاڭا ادىستەمەسى ازىرلەنىپ, ەنگىزىلۋدە. ەگەر ءبىز قازاق ءتىلى عۇمىرلى بولسىن دەسەك, ونى ءجونسىز تەرمينولوگيامەن قيىنداتپاي, قازىرگى زامانعا لايىقتاۋىمىز قاجەت. الايدا, سوڭعى جىلدارى الەمدە قالىپتاسقان 7 مىڭ تەرمين قازاق تىلىنە اۋدارىلعان. مۇنداي «جاڭالىقتار» كەيدە كۇلكىڭدى كەلتىرەدى. مىسالى, «عالامتور» (ينتەرنەت), «قولتىراۋىن» (كروكوديل), «كۇيساندىق» (فورتەپيانو) جانە تاعى سول سياقتىلار تولىپ جاتىر. وسىنداي اۋدارمالاردى نەگىزدەۋ تاسىلدەرىن قايتا قاراستىرىپ, تەرمينولوگيا تۇرعىسىنان قازاق ءتىلىن حالىقارالىق دەڭگەيگە جاقىنداتۋ كەرەك. لاتىن الىپبيىنە كوشۋ بۇل ماسەلەنى رەتتەۋگە مۇمكىندىك بەرەدى», دەدى ەلباسى.
مەملەكەت باسشىسى 2025 جىلعا دەيىن ءبىلىم بەرۋدىڭ بارلىق دەڭگەيىندە لاتىن الىپبيىنە كوشۋدىڭ ناقتى كەستەسىن جاساۋ قاجەتتىگىن اتاپ ءوتتى.
«ورىس ءتىلىن ءبىلۋ ماڭىزدى بولىپ قالا بەرەدى. 2016 جىلدان بەرى جاڭارتىلعان باعدارلاما بويىنشا ورىس ءتىلى قازاق مەكتەپتەرىندە 1-سىنىپتان باستاپ وقىتىلىپ كەلەدى. 2019 جىلدان 10-11-سىنىپتارداعى جاراتىلىستانۋ عىلىمىنىڭ جەكەلەگەن پاندەرىن وقىتۋدى اعىلشىن تىلىنە كوشىرۋ باستالاتىن بولادى. ناتيجەسىندە, ءبىزدىڭ بارلىق تۇلەكتەرىمىز ەلىمىزدە جانە جاھاندىق الەمدە ءومىر ءسۇرىپ, جۇمىس ىستەۋى ءۇشىن قاجەتتى دەڭگەيدە ءۇش ءتىلدى مەڭگەرەتىن بولادى. سوندا عانا ناعىز ازاماتتىق قوعام قۇرىلادى», دەدى مەملەكەت باسشىسى.
نۇرسۇلتان نازارباەۆ كەز كەلگەن ەتنيكالىق توپتىڭ وكىلى كەز كەلگەن جۇمىستى تاڭداي الادى, ءتىپتى پرەزيدەنت بولىپ سايلانۋعا دا مۇمكىندىگى بولاتىنىن ەسكە سالدى.
«قازاقستاندىقتار ءبىرتۇتاس ۇلتقا اينالادى. وقىتۋدىڭ مازمۇندىلىعى زاماناۋي تەحنيكالىق تۇرعىدان قولداۋ كورسەتۋ ارقىلى ۇيلەسىمدى تۇردە تولىقتىرىلۋعا ءتيىس. تسيفرلىق ءبىلىم بەرۋ رەسۋرستارىن دامىتۋ, كەڭ جولاقتى ينتەرنەتكە قوسۋ جانە مەكتەپتەرىمىزدى ۆيدەوقۇرىلعىلارمەن جابدىقتاۋ جۇمىستارىن جالعاستىرۋ قاجەت. جۇمىس بەرۋشىلەردى تارتۋ ارقىلى جانە حالىقارالىق تالاپتار مەن تسيفرلىق داعدىلاردى ەسكەرە وتىرىپ, تەحنيكالىق جانە كاسىپتىك ءبىلىم بەرۋ باعدارلامالارىن جاڭارتۋ كەرەك», دەدى ەلباسى.
