«يندۋستريالاندىرۋ جاڭا تەحنولوگيالاردى ەنگىزۋدىڭ كوشباسشىسىنا اينالۋى ءتيىس. ونىڭ ناتيجەلەرى مۇناي باعاسى كۇرت تومەندەگەن 2014-2015 جىلدارداعى داعدارىستا نەگىزگى تۇراقتاندىرۋشى فاكتورلاردىڭ ءبىرى بولدى. سول سەبەپتى جوعارى ەڭبەك ونىمدىلىگى بار قايتا وڭدەۋ سەكتورىنا دەگەن باعدارىمىز وزگەرگەن جوق», دەلىنگەن جولداۋدا.
سونىمەن قاتار يندۋستريالاندىرۋ 4.0 جاڭا تەحنولوگيالىق قالىپتىڭ بارلىق مۇمكىندىكتەرىن پايدالانا وتىرىپ, مەيلىنشە يننوۆاتسيالىق سيپاتقا يە بولۋعا ءتيىس.
«كاسىپورىندارىمىزدى جاڭعىرتۋعا جانە تسيفرلاندىرۋعا باعىتتالعان, ءونىمنىڭ ەكسپورتقا شىعۋىن كوزدەيتىن جاڭا قۇرالداردى ازىرلەپ, سىننان وتكىزۋ قاجەت. بۇلار, ءبىرىنشى كەزەكتە, تەحنولوگيالاردىڭ ترانسفەرتىن ىنتالاندىرۋعا ءتيىس. ەلىمىزدىڭ بىرنەشە ونەركاسىپتىك كاسىپورنىن تسيفرلاندىرۋ جونىندەگى پيلوتتىق جوبانى ىسكە اسىرىپ, بۇل تاجىريبەنى كەڭىنەن تاراتۋ كەرەك. تسيفرلىق جانە باسقا دا يننوۆاتسيالىق شەشىمدەردى ازىرلەۋشىلەردىڭ ءوز ەكوجۇيەسىن دامىتۋى اسا ماڭىزدى ماسەلەگە اينالىپ كەلەدى. ول ءبىزدىڭ نازارباەۆ ۋنيۆەرسيتەتى, «استانا» حالىقارالىق قارجى ورتالىعى, IT-ستارتاپتاردىڭ حالىقارالىق تەحنوپاركى سياقتى يننوۆاتسيالىق ورتالىقتاردىڭ توڭىرەگىندە قالىپتاسۋعا ءتيىس», دەدى ەلباسى.
مەملەكەت باسشىسى «الاتاۋ» يننوۆاتسيالىق تەحنولوگيالار پاركىنىڭ قىزمەتىن ۇيىمداستىرۋدى تۇبەگەيلى قايتا قاراۋ قاجەت ەكەنىن اتاپ ءوتتى.
«ناقتى سەكتوردىڭ جاڭا تەحنولوگيالارعا دەگەن سۇرانىستى ىنتالاندىرۋى جانە ۆەنچۋرلىق قارجىلاندىرۋدىڭ جەكە نارىعىنىڭ قىزمەتى يننوۆاتسيالىق ەكوجۇيە جەتىستىكتەرىنىڭ نەگىزگى فاكتورلارى بولىپ سانالادى. بۇل ءۇشىن ءتيىستى زاڭناما قاجەت», دەدى نۇرسۇلتان نازارباەۆ.
بۇدان بولەك, IT جانە ينجينيرينگتىك قىزمەت كورسەتۋدى دامىتۋ ەرەكشە ماڭىزعا يە بولىپ وتىر.
«ەكونوميكانى تسيفرلاندىرۋ تابىس اكەلگەنىمەن, جۇمىس كۇشىنىڭ كوپتەپ بوساپ قالۋ قاۋپىن دە تۋدىرادى. بوسايتىن جۇمىس كۇشىن ەڭبەكپەن قامتۋ ءۇشىن كەلىسىلگەن ساياساتتى الدىن الا تياناقتاۋ كەرەك. ءبىلىم بەرۋ جۇيەسىن, كوممۋنيكاتسيا مەن ستاندارتتاۋ سالالارىن جاڭا يندۋستريالاندىرۋ تالاپتارىنا بەيىمدەۋ قاجەت بولادى. 2018 جىلى «تسيفرلىق ءداۋىر» ونەركاسىبىن قالىپتاستىرۋعا ارنالعان يندۋستريالاندىرۋدىڭ ءۇشىنشى بەسجىلدىعىن ازىرلەۋگە كىرىسۋ كەرەك», دەلىنگەن جولداۋدىڭ ءبىرىنشى مىندەتىندە.
