قىزىلوردا وبلىسىنىڭ اكىمى ق. كوشەرباەۆ جاڭا ەمدەۋ مەكەمەسىنىڭ اشىلۋ سالتاناتىنا قاتىسىپ, دارىگەرلەر مەن كەنت تۇرعىندارىن جاڭا اۋرۋحانانىڭ اشىلۋىمەن قۇتتىقتادى.
«قازىرگى تاڭدا ەلباسى نۇرسۇلتان ءابىش ۇلى نازارباەۆتىڭ ساليقالى ساياساتىنىڭ ارقاسىندا ەلىمىزدىڭ دەنساۋلىق ساقتاۋ سالاسى جۇيەلى تۇردە دامۋدا, قازاقستاننىڭ تۇكپىر-تۇكىپىرىندە وزىق تەحنولوگيالارمەن جابدىقتالعان جاڭا مەديتسينالىق مەكەمەلەر اشىلۋدا. بۇگىن, مىنە, 150 ورىندىق اۋرۋحانا اشىلدى. بۇدان بولەك, بيىل وسى اۋرۋحانا جانىنان 250 ورىندىق ەمحانا سالۋدى كوزدەپ وتىرمىز. قازىر ەمحانا قۇرىلىسىن سالۋ بويىنشا قۇجاتتارى ازىرلەنۋدە», - دەدى وبلىس اكىمى.
ايماق باسشىسى اۋرۋحانا ۇجىمىنىڭ جۇمىسىنا ساتتىلىك تىلەپ, جاڭا «جەدەل جاردەم» كولىگىنىڭ كىلتىن تابىستادى.
سونداي-اق, اۋرۋحانا ءۇشىن قۇنى 400 ملن. تەڭگە تۇراتىن انگيوگراف مەديتسينالىق قوندىرعىسى مەملەكەتتىك-جەكەمەنشىك ارىپتەستىك اياسىندا الىنۋدا. بۇل قوندىرعى جەدەل جانە ساپالى وتا جاساۋعا سەپتىگىن تيگىزىپ, قازالى, قارماقشى, ارال اۋداندارى مەن بايقوڭىر قالاسىنىڭ تۇرعىندارىنا قىزمەت كورسەتەتىن بولادى
اۋداندىق اۋرۋحانانىڭ اشىلۋىنا قاتىسقان قر پارلامەنتى ءماجىلىسىنىڭ دەپۋتاتتارى باقتىقوجا ىزمۇحامبەتوۆ, اباي تاسبولاتوۆ, مۇحتار ەرمان جانە گەننادي شيپوۆسكيح پەن اۋداندىق دەنساۋلىق ساقتاۋ سالاسىنىڭ ارداگەرى وراق كەۋباسوۆ قازالىلىقتاردى قۋانىشتارىمەن قۇتتىقتادى.
سونداي-اق, وبلىس اكىمى اۋداندىق سوت جاڭا عيماراتىنىڭ اشىلۋىنا قاتىستى. عيمارات ىشىندە سۋديا مەن حاتشىلاردىڭ كەڭسەلەرى, سوت ءماجىلىسى زالدارى مەن مۇراعات, كەڭسە جانە قىزمەتتىك بولمەلەر ورنالاسقان.
تۇستەن كەيىن ايماق باسشىسى ايتەكە بي كەنتى مەن قازالى قالاسىنىڭ 2018 جىلعى دامۋ جوسپارى ماسەلەلەرى بويىنشا جيىن وتكىزىپ, جەرگىلىكتى قوعامداستىق وكىلدەرىمەن كەزدەسىپ, اۋدان جانە وبلىستىڭ وزەكتى ماسەلەلەرىن تالقىلادى.
مالىمەت ءۇشىن: سوڭعى 5 جىلدا قىزىلوردا وبلىسىندا 57 مەديتسينالىق نىسان, ونىڭ ىشىندە ارال, قازالى جانە شيەلى اۋداندارىنداعى ورتالىق اۋرۋحانالار اشىلدى. 2018 جىلىنىڭ قاڭتار ايىنان باستاپ بايقوڭىر قالاسىندا 15 مىڭ قازاقستاندىققا قىزمەت كورسەتەتىن ەمحانا جۇمىسىن باستادى.
سونىمەن قاتار, الداعى 3 جىلدا تاعى دا 100 دەنساۋلىق ساقتاۋ نىسانى سالىنباق. ودان بولەك, 2015 جىلى مەديتسينالىق نىسانداردىڭ جابدىقتالۋ كورسەتكىشى 43 پايىز بولسا, 2017 جىلى 76,5 پايىزدى قۇرادى, ال اعىمداعى جىلى 90 پايىزعا جەتەدى دەپ جوسپارلانۋدا.
