قازىرگى كەزدە قازاقستاندا سالىق پەن ءتۇرلى تولەمدەردىڭ 30-دان استام ءتۇرى بار. ە. مامىتبەكوۆتىڭ ايتۋىنشا, وتاندىق سالىق كودەكسى اسا اۋقىمدى ءارى باسقا مەملەكەتتەردىڭ سالىق زاڭناماسىمەن سالىستىرعاندا تۇسىنىكسىزدەۋ. وسىعان بايلانىستى سەناتور ايماقتار مەن قالالاردىڭ مۇمكىندىكتەرىن ەسكەرە وتىرىپ, سالىق سالۋ دەڭگەيىن تومەندەتۋ جايىندا ايتتى جانە سالىق اكىمشىلەندىرۋلەرىن وڭايلاتۋ قاجەتتىگىن اتاپ ءوتتى.
ە. مامىتبەكوۆ ماسەلە سالىقتاردىڭ سانىن ازايتۋدا ەمەس, كورپوراتيۆتىك تابىس سالىعى مەن قوسىمشا قۇن سالىعىن ارالاستىرىپ قولدانۋ ارقىلى شەشىلەدى, دەپ سانايدى. ونىڭ پىكىرىنشە, سالىق سالۋ بيزنەستى ىنتالاندىرۋى ءتيىس.
كەدەن قىزمەتىنىڭ جۇمىسىن جاڭعىرتۋدىڭ كەلەشەگى دە تالقىلاندى. ە. مامىتبەكوۆ جاڭا كەدەن كودەكسىنىڭ كۇشىنە ەنۋىنە وراي ەركىن ەكونوميكالىق ايماقتاردىڭ بەيىمدەلۋى ءۇشىن كەدەن ورگاندارى ءتيىستى نۇسقاۋلار ازىرلەۋ قاجەتتىگىنە نازار اۋداردى. دەپۋتات تاۋارلاردى راسىمدەۋ مەرزىمىن تاۋلىكتەن ءتورت ساعاتقا دەيىن قىسقارتۋعا كەدەن ورگاندارى ءازىر بولۋعا ءتيىس ەكەنىن اتاپ ءوتتى.
جۇزدەسۋ بارىسىندا ەلوردانىڭ الەۋمەتتىك-ەكونوميكالىق ءومىرى تۋرالى باسقا دا ماسەلەلەر كوتەرىلدى. اتاپ ايتقاندا, ءماسليحات دەپۋتاتى زاۋرە ءجۇسىپوۆا بالالاردى مەكتەپكە دەيىنگى مەكەمەلەردە وقىتۋ جانە تاربيەلەۋ جۇمىستارىن مەملەكەتتىك تىلدە جۇرگىزۋدى ەنگىزۋ تۋرالى ۇسىنىس ايتتى. كەزدەسۋ قورىتىندىسى بويىنشا بۇل باستامانى رەسپۋبليكا دەڭگەيىندەگى قوعامدىق تالقىلاۋعا شىعارۋ ۇسىنىلدى.
