اتالعان جوعارى وقۋ ورنىنىڭ عالىمدارى فيزيكا كابينەتىنە ارنالعان زەرتحانالىق قۇرال-جابدىقتاردى ازىرلەۋگە بەل بۋىپتى. بۇل تىكەلەي وندىرىسپەن اينالىسپايتىن ءبىلىم ورداسى تۇگىل, ارنايى مامانداندىرىلعان مەكەمە-كاسىپورىندار دا «قالپاقپەن سوعىپ» الا المايتىن كۇردەلى ءارى كۇرمەۋى قيىن ماسەلە. وسىنى ەسكەرگەن وڭىرلىك ۋنيۆەرسيتەت جاڭاشىلدارى اتالعان جوبانى بەلارۋس ەلىنىڭ يانكا كۋپالا اتىنداعى گرودنو مەملەكەتتىك ۋنيۆەرسيتەتىمەن جانە «اكتيۋبرەنتگەن» اق-پەن بىرلەسە وتىرىپ, ىسكە اسىرۋدى ۇيعارىپتى. شىنتۋايتىنا كەلگەندە, بۇگىنگى رەسپۋبليكا مەكتەپتەرىندە فيزيكا پانىنە ارنالعان زەرتحانالىق قۇرال-جابدىقتاردىڭ بىرقاتارى ەسكىرىپ, پايدالانىلۋ مۇمكىندىگى تومەندەپ بارادى. جۇبانوۆ اتىنداعى جوعارى وقۋ ورنىندا جوبا تولىقتاي جاساقتالعان جاعدايدا بۇل ولقىلىقتىڭ ورنىن تولتىرۋعا جول اشىلارى انىق. سونىمەن بىرگە جەرگىلىكتى ۋنيۆەرسيتەتتەگى ءوندىرىس ورنى وقۋشىلاردىڭ ءتۇرلى سىناقتار مەن تاجىريبەلەردى وڭتايلى ءارى ءتيىمدى تۇردە جۇرگىزۋلەرىنە سەپتىگىن تيگىزبەك.
اتالعان جوعارى وقۋ ورنىنىڭ رەكتوراتى باستاماشى بولا بىلگەن ەكىنشى ءبىر وندىرىستىك جوبانىڭ دا بالاماسى جوق دەۋگە بولادى. ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ پرورەكتورى راحىم بەكنازاروۆتىڭ مالىمدەۋىنشە, بۇل جوبا وندىرىستىك قالدىقتاردى وڭدەپ, ودان حروم الۋدى كوزدەيدى. وسى ەرەكشە تەحنولوگيالىق ءۇردىستى جولعا قويۋ ءۇشىن تەمىر بالقىتۋ پەشى ساتىپ الىنعان. ونىڭ قۇنى 85 ميلليون تەڭگەنى قۇرايدى, باعاسى جوعارى يننوۆاتسيالىق قۇرال-جابدىق «تراكتور» جشس اۋماعىنا ورنالاستىرىلعان. ءسويتىپ الداعى كەزدە جۇبانوۆ ۋنيۆەرسيتەتىندەگى تەحنيكا فاكۋلتەتىنىڭ «مەتاللۋرگيا» كافەدراسى بۇل جوبانىڭ باسى-قاسىندا بولماق. ونى جۇزەگە اسىرۋ ماقساتىندا جوعارى وقۋ ورنى مەن «قازحروم» اق اراسىندا كەلىسىمشارت جاسالعان. سوعان سايكەس, وسى كاسىپورىننىڭ وندىرىسىنەن شىققان قالدىقتاردى ۋنيۆەرسيتەت عالىمدارى مەن ستۋدەنتتەرى وڭدەپ, بۇدان حروم الۋدى جوسپارلاپ وتىر. ولاردىڭ مۇمكىندىكتەرى ءبىر ايدىڭ ىشىندە 10 توننا قالدىقتى وڭدەۋگە ەسەپتەلگەن.
تەمىر قۇسايىن,
«ەگەمەن قازاقستان»
اقتوبە
