كوپتەگەن تالانتتى بالالار پاندىك وليمپيادالاردا توپ جارىپ, ۇستازدارىنان تەرەڭ تاعىلىم مەن ءتالىم-تاربيە العانىن كورسەتىپ ءجۇر. ال بالالاردى مۇنداي جەتىستىكتەرگە جەتكىزۋ ۇستازداردىڭ تىنىمسىز ەڭبەگىنىڭ ارقاسىندا عانا ىسكە اساتىنى بەلگىلى.
ۇرپاق تاربيەسىندە ىزدەنىمپاز ىسىمەن ارىپتەستەرىنە ۇلگى بولىپ جۇرگەن ۇستازدىڭ ءبىرى – شىمكەنت قالاسىنداعى № 75 مەكتەپتىڭ باستاۋىش سىنىپ مۇعالىمى قالبيبى اليەۆا. قالبيبىنىڭ ۇستازدىق ەتكەنىنە 34 جىلدىڭ ءجۇزى بولىپتى. ۇلتتىق تاربيەنىڭ قاينار بۇلاعى بولىپ سانالاتىن مەكتەپتە ءبىلىم بەرۋدى ۇلكەن مارتەبە سانايتىن ۇستاز, باستاۋىش سىنىپ تاربيەسىنىڭ جوعارى سىنىپتاردان ەرەكشەلىكتەرىن جەتىك مەڭگەرگەن. مۇعالىم مەكتەپتىڭ جۇرەگى بولسا, بالا مەكتەپتىڭ ايناسى. ۇستازدار ءوز ەڭبەگىنىڭ جەمىسىن اينادان كورگەندەي بالا بويىنان كورە الادى. وسى قاعيدانى تەرەڭ ۇستانعان قالبيبى ءار بالانىڭ پسيحولوگياسىمەن جەكە جۇمىس ىستەيدى. قازىرگى بالالار وتكەن عاسىردىڭ بالالارىنا مۇلدە ۇقسامايدى. ويلارىن اشىق ايتادى, ءتىپتى قايمىقپاي مۇعالىمگە سىن دا ايتا الادى. سونداي ساتتە ۇستاز بالا جۇرەگىنەن ورىن الاتىن ونەگە كورسەتە ءبىلۋى كەرەك. ايتپەسە بالانى تاربيەسىنە باعىندىرا المايدى. قالبيبى وسىنداي ادىستەمەلەردى جەتىك مەڭگەرگەندىكتەن بۇگىندە ارىپتەستەرىنە ۇلگى بولىپ كەلەدى. ءبىر قىزىعى, قالبيبى ساباققا قاجەتتى كورنەكى قۇرالدىڭ ءبارىن ءوز قولىمەن جاسايدى.
ادىستەمە دەگەنىمىز ۇستاز بويىنا بىردەن ورناي قويمايدى. جىلدار بويعى ءىس-تاجىريبەنىڭ ارقاسىندا ۇستازدىق بولمىسقا سىڭەدى. ق.اليەۆانىڭ ۇستازدىق بەت-بەينەسى ۇزاق جىلعى ەڭبەكتىڭ ارقاسىندا قالىپتاستى. 34 جىلعى ۇستازدىق قىزمەتتە كوپتەگەن شاكىرتتەرى پاندىك وليمپيادالىق بايقاۋلارعا قاتىسىپ, جۇلدەلى ورىندار الىپ, مەرەيىن اسقاقتاتتى. ءوزى دە 2011 جىلى شىمكەنت قالالىق «كەمەڭگەر ەلباسى – ىرىسى ەلىمنىڭ» پەداگوگيكالىق مارافونىنا, 2012 جىلى رەسپۋبليكالىق «ۇزدىك پەداگوگ زەرتتەۋشى» اتتى عىلىمي-ادىستەمەلىك بايقاۋىنا, 2016 جىلى حالىقارالىق مونوپاندىك جارىسقا سول جىلى رەسپۋبليكالىق «پروسۆەششەنيە» اقپاراتتىق-ادىستەمەلىك ورتالىعىنىڭ جۇلدەلى ديپلومدارىنا يە بولعان. اۆتورلىق باعدارلاماسى, ادىستەمەلىك ماتەريالدارى رەسپۋبليكالىق جۋرنالداردا جارىق كورگەن. باستاۋىش سىنىپ مۇعالىمى قالامقاس كەرىمبەكوۆا ەكەۋى بىرىگىپ, ءتىل دامىتۋ كۋرسى بويىنشا 2-4-سىنىپتارعا ارناپ شىعارعان ادىستەمەلىك قۇرال شىمكەنت قالالىق ءبىلىم ءبولىمىنىڭ عىلىمي-ادىستەمەلىك ورتالىعىندا بەكىتىلىپ, قولدانىسقا ەنگىزىلگەن. «ۇلاعاتتى ۇستاز» توسبەلگىسىنىڭ يەسى.
قالبيبى «مەكتەپتە بالالارعا ساباق بەرۋدەن رۋحاني ءلاززات الامىن», دەيدى. مەكتەپ تابالدىرىعىن ءتۇرلى دەڭگەيدە اتتايتىن بالالاردى ساپالى بىلىممەن سۋسىنداتۋ وڭاي جۇمىس ەمەس. مۇعالىم ءوز ىسىنە جان-تانىمەن بەرىلىپ ەڭبەك ەتسە عانا, جاقسى ناتيجەگە قول جەتكىزەتىنىنە كۇمان جوق.
ۇستازداردىڭ ءتۇرلى رەفورمالاردى, يننوۆاتسيالىق ادىستەمەلەردى قابىلداي وتىرىپ, زامان تالابىنا ساي ءبىلىم بەرۋى دە كۇردەلى ۇردىسكە اينالىپ وتىر. بالا ۇستازدى سىنايتىن دارەجەگە جەتكەن زاماندا ءبىلىم مەن تاربيە بەرۋ ساباق سايىن ۇستارانىڭ جۇزىمەن ءجۇرىپ وتۋمەن تەڭ. ايتسە دە وتكىر پسيحولوگيالىق قارىم-قاتىناستى باستان وتكەرىپ ءبىلىم بەرەتىن قالبيبىنىڭ ءومىرى بالالارمەن بىتە قايناسىپ كەتكەن. وعان بالانىڭ جەكە باسىنا ايتقان سىنى دا, ساباق بارىسىنداعى لوگيكالىق تاپقىرلىعى دا قىزىق. بالانى «دوسىم», مەكتەپتى «رۋحاني ءۇيىم» دەپ سانايتىن پاراساتتى ۇستازدىڭ رۋحاني بەينەسى وسىداي.
دىلداگۇل نۇرماحانبەت,
جۋرناليست
شىمكەنت
