قىزىلجار وڭىرىندە دە «تۋعان جەر» باعدارلاماسى اياسىندا ءوسىپ-ونگەن ورتاسىن گۇلدەندىرۋگە بەلسەنە اتسالىسىپ جۇرگەن ازاماتتار از ەمەس. سولاردىڭ ءبىرى – وبلىستىق ءماسليحات دەپۋتاتى التىنبەك ساپاروۆ.
التىنبەك ساپاروۆ ەڭبەك جولىن جەكە كاسىپكەرلىكتەن باستاپ, كاسىبىن ۇلعايتقاننان كەيىن تۇرالاپ قالعان اۋىلىن كوركەيتۋگە بەل بۋدى. «نوعايباي» جشس-ءسىن قۇرىپ, ەگىنشىلىكپەن دە, مال وسىرۋمەن دە جۇيەلى اينالىسىپ كەلەدى. اۋىلداستارىن تۇراقتى جۇمىسپەن قامتاماسىز ەتىپ, بىرقاتار الەۋمەتتىك شارالاردى جۇزەگە اسىردى. سولاردىڭ بىرىنە سەرىكتەستىك قاراجاتىنا بەس ءۇي تۇرعىزىلىپ, جۋىردا پايدالانۋعا بەرىلگەنىن ايتۋعا بولادى. باسپانانىڭ كىلتى ءبىرىنشى بولىپ 9 ۇل-قىز ءوسىرىپ, 15 نەمەرە, 1 شوبەرە ءسۇيىپ وتىرعان مارات جانە ماقپۋزا نازاروۆتارعا سالتاناتتى تۇردە تابىس ەتىلدى. وتاعاسى وسىندا 42 جىل ەڭبەك ەتىپتى. كوكشەتاۋداعى اقان سەرى اتىنداعى ونەر كوللەدجىن ءبىتىرىپ, «ديپلوممەن-اۋىلعا!» باعدارلاماسى بويىنشا مادەنيەت ءۇيىنىڭ مەڭگەرۋشىسى قىزمەتىنە ورنالاسقان جاس مامان قالىمبەك ءنابيدىڭ دە قۋانىشىندا شەك بولمادى. كوكتەمگى قارعىن سۋدان جاپا شەككەن زەينەتكەر راقىش قىدىرمينا دا جايلى باسپاناعا يە بولدى.
– شەكاراعا جاقىن ورنالاسقان نوعايباي اۋىلىندا قازىر 130 ادام تۇرادى. جاڭا ۇيلەرگە جامبىل وبلىسىنان كوشىپ كەلگەن ەكى وتباسىنى قونىستاندىردىق. ونداعى ويىمىز – وقۋشىلار سانىن مولايتۋ ارقىلى جابىلىپ قالعان ورتا مەكتەپتى قايتا اشۋ. فەلدشەرلىك-اكۋشەرلىك پۋنكت سالۋدى دا ويلاستىرىپ وتىرمىز,– دەيدى ا.ساپاروۆ.
بۇل بىلىكتى باسشىنىڭ جەرلەستەرىنە كورسەتىپ وتىرعان كومەكتەرىنىڭ ءبىر مىسالى عانا. بيزنەستىڭ الەۋمەتتىك جاۋاپكەرشىلىگىن جەتە تۇسىنگەن ول بىلتىر دەمالىس-كوڭىل كوتەرۋ ورتالىعى مەن ءۇش تۇرعىن ءۇي سالىپ بەرگەن بولاتىن. التىنبەكتىڭ ارقاسىندا قاراقوعا – نوعايباي جول ۋچاسكەسى قالپىنا كەلتىرىلىپ, كوشەلەر اسفالتتالدى. ءار اۋلاعا ساپالى اۋىز سۋ جەتكىزىلدى.
شاعىن ەلدى مەكەندە فۋتبول الاڭى, بالالاردىڭ ويىن الاڭقايلارى, ەلەكتر قۋاتىن ۇنەمدەيتىن شامدار جۇمىس ىستەپ تۇر. بىرنەشە ءۇيدىڭ ىرگەتاسى قالانىپ, بيىل قونىستوي ودان ءارى جالعاساتىنىن دا اتاپ ءوتۋ كەرەك. سونداي-اق قاراقوعا مەكتەبىنە قاتىناپ وقيتىن بالالار ءۇشىن اۆتوبۋس ساتىپ الىنباق.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى,
م. جۇماباەۆ اۋدانى
