بىرەۋلەردىڭ ەڭسەرە الماعان قاشىقتىعىنا ءبىز جەتتىك. «دەس بەرە قويماس...» دەگەندەرمەن دە يىق تىرەستىرىپ قالدىق. قاۋقارى مىقتى, تاجىريبەسى مولىراق وزگەلەردى دە مويىنداتتىق. ەلباسىنىڭ «تاۋەلسىزدىك ءداۋىرى» اتتى كىتابىن وقىپ وتىرعاندا تاۋەلسىزدىكتىڭ 26 جىلىنداعى ەلىمىزدىڭ باعىندىرعان بيىك بەلەستەرى مەن سول بيىككە جەتۋ جولىنداعى قيىندىقتار كوز الدىڭنان كينو لەنتاسىنداي ءتىزىلىپ وتكەندەي اسەر قالدىرادى. مەملەكەت باسشىسىنىڭ بۇل تۋىندىسى ء«ۇشىنشى جاڭعىرۋىن» جۇزەگە اسىرىپ جاتقان مەملەكەتتىڭ قالىپتاسۋىن, ويعا العان ىستەردىڭ قولعا الىنعان شارۋالارعا اينالعانىن, ساناسىن جاڭارتا وتىرىپ, جاڭا كوكجيەكتى اشۋعا بەكىنگەنىن, بەتبۇرىستى ساتتەردە ءتيىمدى شەشىمدەر قابىلدانعانىن, ورتاق ارمانمەن شابىتتانىپ, جاڭا مەجە بەلگىلەنگەنىن تانىتادى. قازاقستاندىق جولمەن ءجۇرىپ, باعىتتان تايماۋعا ىقپال ەتەتىن اسقاق رۋحتىلىق تا وسى كىتاپتان سەزىلەتىندەي. ءبىر سوزبەن ايتقاندا, تاعىلىمعا تولى بۇل ەڭبەكتى ەگەمەندىكتىڭ 26 جىلىنىڭ جىلناماسى دەۋگە بولادى.
2017 جىل. شيرەك عاسىردان استام ۋاقىت ءوتتى. جاڭا ۇرپاق ءوسىپ كەلەدى. حالىقتىڭ باسىنان كەشكەندەرىن ەسكە سالا وتىرىپ, بۇگىنگىمىز ءۇشىن ريزاشىلىق سەزىمىن قالىپتاستىرۋدا بۇل كىتاپتىڭ الار ورنى زور بولماق. 1991-ءدىڭ جەلتوقسانىندا, ءوز تىزگىنىمىز ءوز قولىمىزعا تيگەن تاريحي ساتتە ەلىن قۇتتى ومىرگە باستاعان, وزىمىزگە پانا, وزگەلەرگە قىزعانىش بولعان ەل ورداسى – استانانى تۇرعىزعان, تالاي جاننىڭ قاسىرەتىنە اينالعان سەمەي پوليگونىنىڭ ءۇنىن وشىرگەن ەلباسىنىڭ ەرەن ەڭبەگىن ەلى ەرەكشە باعالايدى. سۇراپىل سوعىسقا جاستىعىن قۇربان ەتكەن ارداگەرلەرگە قامقور, ەل ەرتەڭى بولار جاستارعا دەمەۋ بولا بىلگەن, ۇلتىمىزدىڭ ۇلى قۇندىلىقتارىن اسقاقتاتىپ, اتا-بابا ارمانىن ورىنداپ, قازاق ءتىلىن مەملەكەتتىك ءتىل ەتكەن پرەزيدەنتىمىزدى بارشا قازاقستاندىقتار ماقتان تۇتادى.
ءبىز ۋاقىتتىڭ اراعا سىزات تۇسىرۋىنە جول بەرمەۋىمىز كەرەك. ۇرپاقتار ساباقتاستىعىن قامتاماسىز ەتىپ, اعا بۋىن مەن سوڭىمىزدان ەرگەن بالدىرعانداردىڭ ساف التىننان كيىم كيگەن ساق بابالارىمىز بەن نانوتەحنولوگيالاردى مەڭگەرەر كەلەر ۇرپاقتىڭ اراسىن جالعار ۇزىك وسى كىتاپ بولار دەپ ويلايمىز. ءبىز ۇلتىمىزدىڭ ايقىندالعان ۇلى قۇندىلىقتارىن بويىمىزعا سىڭىرە وتىرىپ, زاماننىڭ تالابىنا جاۋاپ بەرۋىمىز شارت. «باستى قۇندىلىعىمىز – بەيبىتشىلىكتى قاستەرلەي بىلدىك», «جاڭالىقتىڭ جىلى لەبى جانە قايتا تۇلەگەن ءداستۇر», «بۇرىن-سوڭدى بولماعان زياتكەرلىك ورلەۋ» جانە وزگە دە بولىمدەردەن قۇرالعان ەلباسىنىڭ بۇل كىتابى ءبىزدىڭ تۇسباعدارىمىز بولماق.
«ون ادام جۇرگەن جەردە ءىز قالادى, ءجۇز ادام جۇرگەن جەردە – سوقپاق, مىڭ ادام جۇرگەن جەردە جول قالادى», دەيدى. توننىڭ ىشكى باۋىنداي بىرلىگى جاراسقان حالىق رەتىندە قازاقستاندىق جولدان ەش تايماۋعا ءتيىسپىز, ال ەلباسىنىڭ «تاۋەلسىزدىك ءداۋىرى» اتتى جاڭا كىتابى بەت تۇزەر قۇبىلامىز بولۋى كەرەك.
انار مىرزاعاليەۆا,
بيولوگيا عىلىمدارىنىڭ دوكتورى, س.امانجولوۆ اتىنداعى شقمۋ پرورەكتورى
وسكەمەن
