ءماجىلىس دەپۋتاتتارى – «نۇر وتان» پارتياسى فراكتسياسىنىڭ مۇشەلەرى قىزىلوردا وبلىسىنا جۇمىس ساپارى بارىسىندا سىرداريا اۋدانىندا بولدى.
قۋانىش سۇلتانوۆ, باقتىقوجا ىزمۇحامبەتوۆ, اباي تاسبولاتوۆ, مۇحتار ەرمان, بالايىم كەسەباەۆا, ابزال ەراليەۆ, گەننادي شيپوۆسكيح اۋىسىمىنا 250 ادامدى قابىلدايتىن ورتالىق ەمحانانىڭ جۇمىسىمەن تانىسىپ, دەنساۋلىق ساقتاۋ سالاسى قىزمەتكەرلەرىمەن كەزدەستى. امبۋلاتوريالىق ەمحانا «150 دارىگەرلىك امبۋلاتوريا, ەمحانا جانە فەلدشەرلىك-اكۋشەرلىك پۋنكتتەر قۇرىلىسى» باعدارلاماسىنا سايكەس سالىنعان.
كەزدەسۋ بارىسىندا مەديتسينا قىزمەتكەرلەرى دەنساۋلىق ساقتاۋ سالاسىن دامىتۋ باعىتىندا جاسالىپ جاتقان يگى ىستەرگە ريزاشىلىقتارىن ءبىلدىرىپ, وزدەرىنىڭ زەينەتكەرلىك جاسىن قايتا قاراۋ تۋرالى ۇسىنىستارىن ايتتى.
اتالعان كەزدەسۋدەن كەيىن ءماجىلىس دەپۋتاتتارى اۋدانداعى بىرقاتار كاسىپكەرلىك نىساندار مەن الەۋمەتتىك-مادەني مەكەمەلەردىڭ جۇمىسىمەن تانىستى.
ەرجان بايتىلەس,
«ەگەمەن قازاقستان»
قىزىلوردا
* * *
پارلامەنت سەناتىنىڭ دەپۋتاتى ولگا پەرەپەچينا سولتۇستىك قازاقستان جانە قوستاناي وبلىستارىنداعى 183 ەلدى مەكەندى تازا اۋىز سۋمەن قامتاماسىز ەتىپ وتىرعان «قازسۋشار» رەسپۋبليكالىق مەملەكەتتىك كاسىپورنىنىڭ «ەسىل سۋ» بولىمشەسىندە بولدى.
كاسىپورىن قىزمەت كورسەتەتىن ايماقتاعى 2920 شاقىرىم سۋ قۇبىرىنىڭ باسىم كوپشىلىگىندە اپاتتىق جاعداي ورىن الىپ وتىر. ۇزىندىعى 1800 شاقىرىم بولاتىن قۇبىر بولىكتەرىنە جەدەل جوندەۋ جۇمىستارىن جۇرگىزۋ ءۇشىن 48 ملرد تەڭگە ءبولۋ كەرەك. كاسىپورىن باسشىلىعى سۋ قۇبىرىن جاڭارتۋعا رەسپۋبليكالىق بيۋدجەتتەن قارجى بولۋگە كومەكتەسۋ ءۇشىن سەناتورعا ءوتىنىش ايتتى.
و.پەرەپەچينا, سونداي-اق پەتروپاۆل قالاسىنداعى ماشينا جاساۋ كوللەدجىنىڭ ۇجىمىمەن دە كەزدەستى. وقۋ مەكەمەسىندە دۋالدى جۇيە نەگىزىندە بىلىكتى ماماندار دايارلاۋ جونىندەگى جوبا تابىستى جۇزەگە اسىپ كەلەدى. بۇل جوبا ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىنداعى ءتورتىنشى باسىمدىقتى ىسكە اسىرۋعا – ادام كاپيتالى ساپاسىن جاقسارتۋعا باعىتتالعان.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
* * *
وبلىسقا كەلگەن پارلامەنت ءماجىلىسىنىڭ «نۇر وتان» پارتياسى فراكتسياسىنىڭ دەپۋتاتتارى قوستانايداعى «سارىارقااۆتوپروم» جانە «اگروماشحولدينگ» ماشينا جاساۋ زاۋىتتارىنىڭ ءوندىرىس الاڭىندا بولدى.
حالىق قالاۋلىلارى زاۋىتتاردىڭ تسەحتارىنداعى اۆتوموبيلدەردى قۇراستىرۋ جۇمىستارىنىڭ دانەكەرلەۋ, بوياۋ, قۇراستىرۋ جانە تاعى باسقا جۇمىستارىنان تۇراتىن تولىق ۇدەرىسىمەن تانىستى. «سارىارقااۆتوپروم» زاۋىتىندا بۇگىندە بىرقاتار الەمدىك برەندتەر شىعارىلادى.
دەپۋتاتتار كەلەسى كەزەكتە «اگروماشحولدينگ» زاۋىتىندا قۇراستىرىلاتىن اۋىلشارۋاشىلىق تەحنيكالارىن كوردى. بۇل زاۋىت بەلارۋستىڭ اۋىلشارۋاشىلىق تەحنيكالارىن وندىرەتىن اتاقتى «گومسەلماش» زاۋىتىنىڭ ءونىمىن قازاقستاندا قۇراستىرۋ قۇقىنا يە بولعان جالعىز ءوندىرىس ورنى ەكەنىن ايتۋ ءلازىم.
قۇرامىندا ي.ارونوۆا, ا.راۋ, ا.سۋسلوۆ, ۆ.ولەينيك, ي.كليمەنكو, س.قۇسايىنوۆ بار ماجىلىسمەندەر ساپارلارى بارىسىندا «نۇرلى جەر» مەملەكەتتىك باعدارلاماسىن جۇزەگە اسىرىپ جاتقان قوستاناي اۋدانىنداعى «سەۆەرنىي» شاعىن تۇرعىن اۋدانىندا بولدى.
ءنازيرا جارىمبەت,
«ەگەمەن قازاقستان»
قوستاناي
* * *
پارلامەنت سەناتىنىڭ دەپۋتاتتارى مۇراتباي جولداسباەۆ پەن ابدالى نۇراليەۆ بايزاق اۋدانىندا بولدى. حالىق قالاۋلىلارى اۋداندا ەلباسى جولداۋىنان تۋىنداعان مىندەتتەردىڭ جۇزەگە اسىرىلۋ بارىسىمەن تانىستى.
دەپۋتاتتار بولعان قوستوبە اۋىلدىق وكرۋگىنە قاراستى تالاس اۋىلىنداعى «مامبەتوۆا ك» جەكە كاسىپورنى شۇجىق جانە نان ونىمدەرىن وندىرەدى. اتالعان كاسىپورىندا 40 ادام جۇمىسپەن قامتىلىپ, ەكى اۋىسىمدا جۇمىس ىستەيدى. كاسىپورىن باسشىسى راۋشان مامبەتوۆانىڭ ايتۋىنشا, وندىرىلەتىن ءتاتتى توقاشتارعا وبلىستىڭ بارلىق اۋداندارىمەن قاتار, الماتى جانە بايقوڭىر قالالارىنان تاپسىرىس بەرۋشىلەر كوپ ەكەن. سەناتورلار كاسىپورىن جۇمىسىنا وڭ باعا بەردى.
بۇدان كەيىن سەنات دەپۋتاتتارى كوكتال اۋىلىندا سالىنىپ جاتقان ماي وڭدەۋ تسەحىنا باردى. اتالعان كاسىپورىن «بيزنەستىڭ جول كارتاسى-2020» باعدارلاماسى بويىنشا جەڭىلدەتىلگەن نەسيەگە قول جەتكىزىپ, 74 ميلليون تەڭگەگە قۇرال-جابدىقتار ساتىپ العان. جاس كاسىپكەر بولات ەسەنباەۆ دەپۋتاتتارعا ەندى ءوندىرىس ورنى تولىق ىسكە قوسىلسا, 50 جاڭا جۇمىس ورنى اشىلاتىنىن جەتكىزدى.
حاميت ەسامان,
«ەگەمەن قازاقستان»
جامبىل وبلىسى
* * *
وڭىرگە كەلگەن ءماجىلىس دەپۋتاتتارى ايزادا قۇرمانوۆا مەن ايگۇل نۇركينا جەرگىلىكتى تۇرعىندارمەن كەزدەستى.
وبلىس ورتالىعىنداعى «نۇر وتان» پارتياسىنىڭ وبلىستىق فيليالى كەڭسەسىندە وتكەن كەزدەسۋدە قالا تۇرعىندارىنىڭ تەگىن بەرىلۋى ءتيىس دارىلەردى ءدارىحانالاردان الا الماۋى نەمەسە باسقا دارىمەن الماستىرىپ بەرۋ جاعدايلارى ءسوز بولدى.
ونىڭ ءمانىسىن وبلىستىق دەنساۋلىق ساقتاۋ باسقارماسىنىڭ ماماندارى تۇسىندىرۋگە تىرىستى. ال دەپۋتاتتار تەگىن بەرىلۋى ءتيىس ءدارى-دارمەكتەردىڭ تۇرعىندارعا قولجەتىمدى بولۋى الدىمەن بارلىق ماسەلە جەرگىلىكتى جەردە ناقتى شەشىمىن تابۋىمەن تىكەلەي بايلانىستى ەكەندىگىن اتاپ كورسەتتى.
ءماجىلىس دەپۋتاتتارى ارتۋر پلاتونوۆ پەن مەيرام پىشەمباەۆ «پاۆلودار» سەق اۋماعىنداعى «گيسسەنحاۋس» جشس اليۋميني قوسپاسىن وندىرەتىن كاسىپورىننىڭ ەڭبەك ۇجىمىمەن كەزدەستى. ايتا كەتەيىك, قازاقستان مەن رەسەيدىڭ بىرلەسكەن جوباسى رەتىندە ىسكە قوسىلعان نىساننىڭ ينۆەستيتسيالىق كولەمى 6,7 ملرد تەڭگەنى قۇرايدى.
فاريدا بىقاي,
«ەگەمەن قازاقستان»
پاۆلودار
* * *
پارلامەنت سەناتىنىڭ دەپۋتاتى دۇيسەنعازى مۋسين جۇمىس ساپارى بارىسىندا جارما اۋدانىنىڭ جۇرتشىلىعىمەن جۇزدەسىپ, ەلباسىنىڭ «100 ناقتى قادام» ۇلت جوسپارى, «نۇرلى جول», «رۋحاني جاڭعىرۋ» باعدارلامالارى جايىندا باياندادى.
پارلامەنت ءماجىلىسىنىڭ دەپۋتاتتارى شافحات وتەمىسوۆ, ولگا شيشيگينا, ەۆگەني كوزلوۆ وسكەمەندە و.رىپاكوۆا اتىنداعى جەڭىل اتلەتيكا مانەجىنىڭ, №1 قالالىق اۋرۋحانانىڭ جۇمىسىمەن تانىسىپ, وبلىستىق سوت ۇجىمىمەن كەزدەسۋ وتكىزدى. سونىمەن قاتار سەمەيدەگى سپورت اكادەمياسىندا بولىپ, «سەمەي ورمانى» مەملەكەتتىك ورمان تابيعي رەزەرۆاتى ۇجىمىمەن جۇزدەستى جانە پارلامەنتتىڭ اتقارىپ جاتقان جۇمىستارى تۋرالى بايانداپ, ورمانشىلاردى تولعاندىرعان ماسەلەلەرگە قۇلاق ءتۇرىپ, ۇسىنىس-پىكىرلەرىن تىڭدادى.
پارلامەنت ءماجىلىسىنىڭ دەپۋتاتى نۇرتاي سابيليانوۆ اياگوز, ءۇرجار جانە تارباعاتاي اۋداندارىنىڭ تۇرعىندارىمەن كەزدەستى.
ازامات قاسىم,
«ەگەمەن قازاقستان»
شىعىس قازاقستان وبلىسى
