تەرروريزمدى ىمىراسىز باسۋعا مەملەكەتتىڭ مۇمكىندىگى جەتەدى

كەشە اقوردادا مەملەكەت باسشىسى نۇرسۇلتان نا­زار­باەۆ­تىڭ توراعالىعىمەن ءدىني ەكسترەميزم جانە تەرروريزممەن كۇرەس ماسەلەلەرى جونىندە كەڭەس بولىپ ءوتتى, دەپ حابار­لادى قازاقستان رەسپۋب­لي­كاسى پرەزيدەنتىنىڭ ءباسپاسوز قىزمەتى. كەڭەس جۇمىسىنا پرەمەر-مينيستر كارىم ءماسىموۆ, مەملەكەتتىك حاتشى قانات ساۋداباەۆ, پرەزيدەنت اكىمشىلىگىنىڭ باس­شى­سى اسلان مۋسين, جوعارعى سوت توراعاسى بەكتاس بەكنازاروۆ, پرەزيدەنتتىڭ كومەكشىسى – قاۋىپ­سىزدىك كەڭەسىنىڭ حاتشىسى مارات ءتاجين, باس پروكۋرور اسحات داۋىل­باەۆ, ۇلتتىق قاۋىپسىزدىك كوميتەتىنىڭ توراعاسى نۇرتاي ابىقاەۆ, «سىربار» سىرتقى بارلاۋ قىزمەتىنىڭ ديرەكتورى امانجول جانقۇليەۆ, قورعانىس ءمينيسترى ادىلبەك جاقسىبەكوۆ, ىشكى ىستەر ءمينيسترى قالمۇحانبەت قا­سىموۆ, ادىلەت ءمينيسترى راشيد تۇسىپبەكوۆ قاتىستى. كەڭەستى اشا وتىرىپ, مەملەكەت باسشىسى وتكەن سەنبى كۇنى تاراز قالاسىندا بىرقاتار ەرەكشە اۋىر قىلمىستار جاسالعانىن اتاپ ءوتتى. قىلمىسكەر قۇقىق قورعاۋ ورگاندارىنىڭ قىزمەتكەرلەرىنە قارۋلى شابۋىل جاسادى, سونىڭ سالدارىنان ۇقك-ءنىڭ ەكى قىز­مەتكەرى, ءۇش پوليتسيا قىزمەتكەرى جانە ەكى ازامات قازا تاپتى. پرەزيدەنت پوليتسەيلەر مەن وزگە قۇقىق قورعاۋ ورگاندارىنىڭ قىزمەتكەرلەرى وتانعا قىزمەت ەتۋدىڭ قالتقىسىز ۇلگىسى مەن ەرەن ەرلىك كورسەتكەنىن ايتتى. جول پوليتسياسىنىڭ جەكە باتالونى قىز­مەتكەرلەرى تاراپىنان جارا­قات­تانعان قىلمىسكەر, زالال­سىز­داندىرۋعا ارەكەت جاساۋ كەزىندە ءوزىن ءوزى جارىپ جىبەرگەن. سونىڭ سالدارىنان ونى ۇستاعان ۆزۆود كومانديرى, پوليتسيا كاپيتانى بايتاسوۆ قىلمىسكەردى دەنەسىمەن جاۋىپ, اسقان ەرلىك كورسەتتى. پوليتسيا قىزمەتكەرى جانقيارلىق ارقىلى قاراپايىم ادامداردىڭ وپات بولۋىنا جول بەرمەدى. – ەڭ الدىمەن, مەن قازا بول­عان­داردىڭ وتباسىلارى مەن تۋىس-تۋعاندارىنىڭ قايعىسىنا ورتاق­تا­سىپ, شىن جۇرەكتەن كوڭىل اي­تامىن. ءبىز ولاردىڭ قايعىلارىن بولىسەمىز. بۇلار وزدەرىنىڭ قىز­مەت­تىك بورىشىنا ادالدىق تا­نىت­تى, ازاماتتاردى لاڭكەستەن قور­عادى. ىشكى ىستەر مينيسترلىگىنە, وبلىستاعى جەرگىلىكتى اتقارۋ­شى ورگاندارعا قازا بولعان­دار­دىڭ وتباسىلارى مەن بالالارى ءۇشىن قاجەتتى نارسەنىڭ ءبارىن جاساپ, ولارعا جان-جاقتى كومەك كورسەتۋدى تاپسىرامىن, – دەدى مەم­لەكەت باسشىسى. قازا بولعان قۇقىق قورعاۋ ور­گاندارى قىزمەتكەرلەرىنىڭ وشپەس ەرلىك ىستەرى مەملەكەتتىك ناگرادالارمەن اتاپ وتىلەتىن بولادى. اتالعان جاعداي بويىنشا «تەرروريزم» جانە «ادام ءولتىرۋ» باپتارى بويىنشا قىلمىستىق ءىس قوزعالدى. ورىن العان بارلىق دەرەكتەرگە تەكسەرىس جۇرگىزۋ ءۇشىن ىشكى ىستەر ءمينيسترى قالمۇحانبەت قاسىموۆ باسشىلىق جاسايتىن ارناۋلى ۆەدومستۆوارالىق جەدەل-تەرگەۋ توبى قۇرىلدى. توپ جان-جاقتى تەرگەۋ جۇرگىزۋلەرى ءتيىس. نۇرسۇلتان نازارباەۆ تەرروريزم الەمنىڭ كوپتەگەن ەلدەرىندە, سو­نىڭ ىشىندە دامىعان ەۋروپادا ورىن الىپ وتىرعانىن جانە قا­زاق­ستان ودان سىرت قالمايتىنىن اتاپ ءوتتى. – قازاقستانعا قارسى جاسالعان تەرروريزمدى ىمىراسىز باسىپ-جان­شۋعا مەملەكەتتىڭ مۇمكىندىگى جەتەرلىك. مەملەكەتتىڭ قولىندا كۇش تە, قۋات تا, جىگەر دە بار. ءبىز لاڭكەستىكتى تۇبىرىمەن جوق قى­لا­مىز. مەن سونداي-اق بارلىق قا­زاق­ستاندىقتاردى قىراعىلىققا شا­قىرامىن. ەگەر لاڭكەستىككە قا­تىستى دەرەكتەر بايقالاتىن بولسا, ونى دەرەۋ ءتيىستى قۇقىق قورعاۋ ورگاندارىنا حابارلاۋ قاجەت. ءبىز دەرەكتەردى انىقتاپ, بارلىق با­عىت­تار بويىنشا جۇمىستى كۇ­شەي­تەمىز, – دەپ اتاپ ءوتتى پرەزيدەنت. كەڭەستە قۇقىق قورعاۋ ورگان­دارى باسشىلارىنىڭ ەسەپتەرى تىڭدالدى. كەڭەستىڭ قورىتىندىسى بوي­ىن­شا مەملەكەت باسشىسى ءبىر­قا­تار ناقتى تاپسىرمالار بەردى. سۋرەتتى تۇسىرگەندەر س.بوندارەنكو, ب.وتارباەۆ.