ءتورت جىلدان بەرى جۇمىس ىستەپ تۇرعان قازاندىق 65 باسپانانى جىلۋمەن قامتاماسىز ەتەدى. 2016 جىلى اشىلعان حوككەي كورتى بالالار ءۇشىن ناعىز سپورت الاڭقايىنا اينالعان. سىيىمدىلىعى 10 مىڭ توننانى قۇرايتىن استىق قابىلداۋ كاسىپورنى گەرماندىق قوندىرعىلارمەن جابدىقتالعان.
ىرگەلى اۋىلدىڭ تىنىس-تىرشىلىگىمەن تانىسقان پارلامەنت ءماجىلىسىنىڭ دەپۋتاتتارىنا ايتار ءوتىنىش-تىلەكتەر از بولعان جوق. ماسەلەن, «پرومەتەي اگرو» جشس-ءنىڭ ديرەكتورى يۋري شول اۋىل شارۋاشىلىعى مينيسترلىگىنىڭ تۇقىم شارۋاشىلىعى كارتاسىنا ەنگىزىلگەن 10 جىلدان استام ۋاقىتتان بەرى قولدانىلىپ كەلە جاتقان تۇقىمدار سورتتارىن سۋبسيديالاماۋ تۋرالى ۇسىنىسىمەن كەلىسپەيتىنىن جەتكىزدى. وڭىرلەردىڭ كليماتى, توپىراق قۇنارلىلىعى ارقيلى كەلەتىندىكتەن, جەرگىلىكتى جاعدايدى جەتە ەسكەرگەن ءجون. تەرىسكەيدىڭ قاتال اۋا رايىنا اۋدانداستىرىلعان سورتتار كوپ جىل بويى جاقسى ءونىم بەرىپ كەلەدى. ءبىر سورتتى جەرسىندىرۋ كوپ ۋاقىتتى قاجەت ەتەدى, دەدى اۋىل شارۋاشىلىق مامانى. حالىق قالاۋلىسى سەرگەي زۆولسكي كارتا ماقساتى استىق شىعىمدىلىعىن ارتتىرۋدى كوزدەيتىنىن, ناقتى شەشىم ءالى قابىلدانباعانىن, بۇل باستامانى اگرارشىلار قولداپ وتىرماعانىن ايتتى.
اگروقۇرىلىم جەتەكشىلەرىمەن وتكەن كەزدەسۋدە ەگىنشىلىك سالاسىنداعى تۇيتكىلدەر جان-جاقتى ءسوز ەتىلدى. ەلىمىزدە تراكتورلاردىڭ 46, كومباينداردىڭ 70 پايىزى ەسكىرگەن.مينيسترلىكتىڭ تەحنيكالىق جاڭعىرتۋعا ارنالعان كارتاسىندا ينۆەست سۋبسيديالار ارقىلى ماشينا-تراكتور پاركىن جاڭالاۋدىڭ جەڭىلدىكتى جولدارى قاراستىرىلعان. كوكشەتاۋ ماشينا جاساۋ زاۋىتىندا «اكروس» كومبايندارىن قۇراستىرىپ, وتاندىق تەحنيكالارعا باسىمدىق بەرىلەتىن بولادى.
ماجىلىسمەن ۆلاديسلاۆ كوسارەۆتىڭ ايتۋىنشا قوسالقى شارۋاشىلىقتار كووپەراتيۆ قۇرامىنا ەنسە, ۇتارى مول بولماق. جينالعان ءونىمدى بىرىگىپ وتكىزۋگە, سانىن دا, ساپاسىن دا كوبەيتۋگە مۇمكىندىكتەر تۋدىرىلادى. اۋىلدىقتار جۇمىسپەن قامتىلادى. ءوندىرىس وشاقتارى قۇرىلادى.
كادر تاپشىلىعىنا بايلانىستى ساۋالعا ءماجىلىس دەپۋتاتى يۋري تيموششەنكو بىلاي دەپ جاۋاپ بەردى: «ەلىمىزدە تەگىن كاسىپتىك-تەحنيكالىق ءبىلىم بەرۋ باعدارلاماسى قابىلدانعان. جوباعا قاتىسۋ ارقىلى جۇمىسشى ماماندىعىن الام دەۋشىلەرگە جول اشىق. بۇل ورايدا جۇمىس بەرۋشىلەر مامانداردىڭ الەۋمەتتىك ماسەلەلەرىن شەشۋگە مۇددەلى بولۋلارى ءتيىس.
پارلامەنت ءماجىلىسىنىڭ دەپۋتاتتارى جۇرتشىلىقتىڭ ءوتىنىش-تىلەكتەرىن زەيىن قويا تىڭداپ, ءتيىستى ورىندارعا جەتكىزۋگە ۋاعدالاستى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى
ەسىل اۋدانى
