ونىڭ ايتۋىنشا, حولدينگ باعدارلامانىڭ نەگىزگى وپەراتورى بولىپ تابىلادى جانە نەگىزگى بەس باعىتتىڭ تورتەۋىن جۇزەگە اسىرادى.
«ولار – جەرگىلىكتى اتقارۋشى ورگانداردىڭ تۇرعىن ءۇي قۇرىلىس جيناق جۇيەسى ارقىلى كرەديتتىك تۇرعىن ءۇي سالۋى, بۇعان دەيىن قابىلدانعان باعدارلامالار بويىنشا («نۇرلى جول», ءودب-2020) قۇرىلىستىڭ اياقتالۋى, حالىققا ارنالعان يپوتەكانىڭ قولجەتىمدىلىگىن ارتتىرۋ, جەكە قۇرىلىس سالۋشىلاردى قۇرىلىسقا ىنتالاندىرۋ. حولدينگتىڭ بەس ەنشىلەس ۇيىمى – «دامۋ» كدق» اق, «قازاقستاننىڭ تۇرعىن ءۇي قۇرىلىس جيناق بانكى» اق, «قازاقستان يپوتەكالىق كومپانياسى» يۇ» اق, «بايتەرەك دەۆەلوپمەنت» اق جانە «تۇرعىن ءۇي قۇرىلىسىنا كەپىلدىك بەرۋ قورى» اق «نۇرلى جەر» باعدارلاماسىن ىسكە اسىرۋعا قاتىسادى», دەدى ق.وسكەنباەۆ.
سونىمەن قاتار ول تۇرعىن ءۇي قۇرىلىس جيناعى جەلىسى بويىنشا تۇرعىن ءۇي قۇرىلىس جيناق بانكى جۇيەسىندە 492 ملرد تەڭگە جيناق سوماسىنداعى 1 023 شارت بار ەكەنىن تىلگە تيەك ەتتى.
«ولاردىڭ ىشىندە 32 مىڭ شارتتا سالىنعان كرەديتتىك تۇرعىن ءۇي ساتىپ الۋ ءۇشىن قاجەتتى جيناقتىڭ 30 پايىزى بار. 2017 جىلعا قارىز بەرۋ 181 ملرد تەڭگە كولەمىندە جوسپارلانىپ, جالپى سوماسى 256 ملرد تەڭگەنى قۇرايتىن 37 مىڭ قارىز بەرىلگەن. بۇل جوسپاردىڭ 141 پايىزى. وسىلايشا, 2017 جىلى بەرىلگەن يپوتەكالىق تەڭگەنىڭ تورتتەن ءۇشىن قازاقستاننىڭ تۇرعىن ءۇي قۇرىلىس جيناق بانكى ۇسىنعان», دەدى ول.
وسكەنباەۆ قۇرىلىستىڭ اياقتالۋ باعىتى بويىنشا بۇعان دەيىن قابىلدانعان باعدارلامالار شەڭبەرىندە جوسپارلانعان 554,3 مىڭ شارشى مەتردىڭ ورنىنا پايدالانۋعا 560,1 مىڭ شارشى مەتر تاپسىرىلعانىن جەتكىزىپ, ءۇي قۇرىلىسى جوسپارى ارتىعىمەن ورىندالعانىن باياندادى.
«يپوتەكانىڭ قولجەتىمدىلىگىن ارتتىرۋ باعىتى بويىنشا, 2017 جىلعى مامىردان باستاپ جاڭا باسپانا ساتىپ الۋ ءۇشىن حالىققا ەكىنشى دەڭگەيدەگى بانكتەر بەرەتىن يپوتەكالىق قارىزداردى سۋبسيديالاۋ تەتىگى ىسكە قوسىلدى. قارجى وپەراتورى بولىپ قازاقستان يپوتەكالىق كومپانياسى بەكىتىلگەن. ول يپوتەكانىڭ 16 پايىزىنان جىلدىق 6 پايىزعا دەيىنگى كولەمىن سۋبسيديالايدى. ناتيجەسىندە تۇتىنۋشى ءۇشىن سىياقىنىڭ تۇپكىلىكتى مولشەرلەمەسى جىلدىق 10 پايىزدان اسپايدى. اعىمداعى جىلى جالپى سوماسى 15 ملرد تەڭگە بولاتىن, 1 مىڭ يپوتەكالىق قارىزدى سۋبسيديالاۋ جوسپارلانۋدا», دەدى ق.وسكەنباەۆ.
راۋان قايدار,
«ەگەمەن قازاقستان»
