پرەزيدەنت توبىل-تورعاي وڭىرىنە جىل سايىن ەگىن وراعى كەزىندە كەلەتىن, التىن جالاتقانداي استىق القاپتارىنا بارىپ, قولى كۇستەنگەن ديقاندار ەڭبەگىنە كۋا بولاتىن, ولارمەن كەزدەسىپ, ەمەن-جارقىن اڭگىمە قۇراتىن. بيىل ەلباسىنىڭ جولى قوستانايعا قوڭىر كۇزدە ءتۇستى. ەلىمىزدىڭ استىق دەرجاۆاسىنا اينالعان قوستاناي ءوڭىرى بيىل دا قامباعا 5 ميلليون توننادان ارتىق قىزىل ءدانىن قۇيىپ الىپ, ەتەك-جەڭىن جيناپ, تاپ-تۇيناقتاي بولىپ وتىرعان. ەلباسى بۇل ساپارىندا قوستاناي قالاسىنداعى وندىرىستىك جانە الەۋمەتتىك نىسانداردى ارالادى.
قوستاناي قالاسىن جيەكتەپ اعاتىن توبىل وزەنىنىڭ جاعاسىنا جاقىن اۋماقتا شوق-شوق قاراعاي, قايىڭ وسەدى. ۇشار باسىنا قاراعان كىسىنىڭ تاقياسى تۇسەتىن نۋ قاراعاي قىسى-جازى مۇلگىپ تۇرادى. وسى قاراعايدى ىرگەلەپ جۇرەتىن تاس جول ەلباسى كورتەجىن تەننيس ورتالىعىنا اكەلدى. بۇل سپورت كەشەنى وسىدان ەكى جىل بۇرىن تاپسىرىلعان بولاتىن. كولەمى 2763 شارشى مەتر, قۇرىلىسىنا بيۋدجەتتەن 788 ميلليون تەڭگە قاراجات جۇمسالدى. جاڭا ءتيپتى سپورت عيماراتىندا ءۇش جابىق, ءۇش اشىق تەننيس كورتى بار. وتكەن جىلدان بەرى ونىڭ اشىق جانە جابىق كورتتارىندا بىرنەشە رەت رەسپۋبليكالىق تۋرنيرلەر ءوتتى. ەلباسى كەلەدى دەگەننەن سپورت مەكتەبىنىڭ ديرەكتورى ليۋدميلا وكۋنەۆا باستاعان ۇجىمنىڭ, تەننيس ورتالىعىنداعى جاتتىقتىرۋشىلاردىڭ, جاس سپورتشىلاردىڭ كوڭىلى ەرەكشە الابۇرتقان. بالالار مەن جاسوسپىرىمدەر سپورت مەكتەبىندەگى ۇزدىك سپورتشىلاردىڭ ءبىرى 13 جاسار تەننيسشى ەكاتەرينا سيتنيكوۆا دا بۇل حابارعا قاتتى قۋانعان. اسىعا كۇتكەن ءسات تە كەلىپ جەتتى.
كاتيا نۇرسۇلتان نازارباەۆتى تەلەديداردان عانا كورگەن. ەلباسىمەن جاقىن تۇرىپ سويلەسۋ, قولىن الۋ ونىڭ بالا قيالىنىڭ جاي ەرتەگىسى سياقتاناتىن. تەننيس كورتىنا كىرىسىمەن نۇرسۇلتان نازارباەۆ اينالاعا ريزاشىلىقپەن قارادى. ات شاپتىرىم, جارىق, بيىك كورت. ول ءوزىن كۇتىپ تۇرعان سپورت مەكتەبىنىڭ ۇركەردەي ۇزدىك تەننيسشىلەرىنە جاقىندادى.
– قوستاناي تەننيستىڭ جابىق كورتىنا ءزارۋ بولاتىن. بۇل ءوڭىردىڭ قىسى ۇزاق, قاتال, جازى قىسقا. مۇندا بۇرىن قىس مەزگىلىندە جاتتىعۋ ءۇشىن ەشتەڭە بولمايتىن. مىنە, سەندەردە ەندى تەننيس كورتى, كۇشتىلىك سپورت تۇرلەرىنىڭ اكادەمياسى, جابىق مۇزايدىنى, فۋتبول ستاديونى – ءبارى بار. قىستا دا جاتتىعۋلار ۇزىلمەيدى. سپورت – كەرەمەت ءىس, ونىمەن بالا كەزدەن اينالىسىڭدار, سوندا ءومىر بويى دەنساۋلىقتارىڭ جاقسى بولادى, سپورتتان قول ۇزبەيتىن بولاسىڭدار, – دەدى نۇرسۇلتان نازارباەۆ. ەلباسى ءسوزىن اياقتاعاندا بالالاردىڭ الدىڭعى جاعىندا تۇرعان ەكاتەرينا سيتنيكوۆا نۇرسۇلتان نازارباەۆتىڭ كەلگەنىنە بالالاردىڭ بارلىعى وتە قۋانىشتى ەكەنىن جانە ءوزىنىڭ سپورتتاعى جەتىستىكتەرىن ايتىپ بەردى.
– مەن 2016 جىلى رەسپۋبليكالىق تۋرنيردە ءۇشىنشى ورىن, بيىلعى وتكەن رەسپۋبليكالىق ەكى تۋرنيردە دە ەكىنشى ورىندى يەلەندىم. تەننيستى وتە جاقسى كورەمىن. وسكەندە ەلىمىزدىڭ نامىسىن قورعايتىن بولامىن, الەمدىك جارىستاردا قازاقستاننىڭ تۋىن جەلبىرەتۋدى ارماندايمىن جانە سوعان قول جەتكىزەمىن, – دەدى كاتيا باتىلدانا سويلەپ. ارمانى اسقاق ءناپ-نازىك قىزدى ەلباسى ءوز پەرزەنتىندەي مەيىرلەنە باۋىرىنا قىستى.
– تەلەديداردا كورگەنىمدە ەلباسىنىڭ كوزىنشە ەشقانداي سويلەۋگە بولمايدى دەپ ويلايتىنمىن. ال ول بىزبەن كەزدەسكەندە قىسىلعان جوقپىن, ويتكەنى ول كىسىنىڭ ءجۇزى وتە مەيىرىمدى ەكەن, مەنى قۇشاقتاپ, ارقامنان قاققاندا تۋرا اتام سەكىلدى بولدى, – دەيدى كاتيا. ەلباسى بالالارعا ءوزىنىڭ دە تەننيسپەن اينالىسقانىن ايتتى. ەلباسىنىڭ: «مەن دە تەننيسپەن اينالىستىم. دەنساۋلىعى مىقتى جانە ءبىلىمدى ادام عانا ومىردە جەتىستىكتەرگە قول جەتكىزەدى. سوندىقتان جاستار سپورتپەن اينالىسۋى, دوستاسۋى كەرەك» دەگەن ءسوزى بالالاردىڭ كوكەيىندە جاتتالىپ قالاتىنى كۇمانسىز.
اكەسىنىڭ اعاسى, اۋلەتىندەگى بار بالا «اتا» دەپ اتايتىن گەننادي ۆەدياەۆ كاتيانىڭ التى جاسىندا قولىنان جەتەكتەپ, تەننيس سەكتسياسىنا اپارعان. دارىگەر گەننادي پەتروۆيچتىڭ ءوزى دە سپورتشى, جەتپىستەن اسسا دا سۇيىكتى ماماندىعى دارىگەرلىكتى دە, سۇيىكتى ءىسى ۆولەيبولدى دا تاستاعان جوق. تەننيس كىشكەنتاي كاتياعا دا ەرەكشە ۇناپ, التى جىلدان بەرى سپورت مەكتەبىنىڭ ۇزدىك شاكىرتىنە اينالدى. مەكتەپتە دە بەلسەندى, جاقسى وقيدى.
سول كۇنى ەلباسىنىڭ تەننيس كورتىنا بارعانىن, بالالارمەن ارادا بولعان اڭگىمەسىن, ونىڭ الدىندا كاتيانىڭ جانە جاس تەننيسشىلەر سانجار بۇقانوۆتىڭ, ديانا ءشارىپوۆانىڭ سويلەگەنىن بۇقارالىق اقپارات قۇرالدارى ارقىلى بۇكىل ەل ەستىپ, ءبىلدى.
– قۋانعاننان جىلاي بەرىپپىن. قىزىمنىڭ ۇستازدارى, جاتتىقتىرۋشىلارى, تۋىستار, دوس-جاراندار بىرىنەن كەيىن ءبىرى تەلەفون سوعىپ, قۇتتىقتاپ جاتىر. ءتىپتى رەسەيدەگى تۋىستارىمىز بەن تانىستارىمىز دا تەلەفون شالدى عوي. كىشكەنتاي بالاپانىم كاتياعا قانات بىتكەندەي بولدى. قازىر جاتتىعۋىنا دا, ساباعىنا دا بۇرىنعىدان دا ىجداعاتتى بولىپ الدى. ول ەلباسى الدىنداعى ءسوزىن ومىردە ورىنداۋدى ارماندايدى, – دەيدى كاتيانىڭ اناسى ەلەنا. سيتنيكوۆتەر ەلباسىنىڭ جاس تەننيسشىلەرمەن سۇحباتتاسىپ تۇرعان جانە كاتيانى باۋىرىنا تارتقان ءساتى بەينەلەنگەن سۋرەتتەردى ۇلكەيتىپ, رامكاعا سالىپ, تورىنە ءىلىپ تە ۇلگەردى.
ەلباسىنىڭ كەلۋ ءساتىن بەينەلەيتىن سۋرەتتەر تەننيس ورتالىعىنا دا ءىلىنىپتى. جاتتىعۋعا كەلگەن سپورتشىلار مەن تەننيس اۋەسقويلارى وعان قاراعان سايىن قوستاناي تەننيسىنىڭ جارقىن بولاشاعى ساۋلە شاشقانداي بولادى.
ءنازيرا جارىمبەت,
«ەگەمەن قازاقستان»
قوستاناي
