وتىز جىل قاڭىراپ تۇرعان عيمارات ەدى...

ءبىر جىلدا پايدالانۋعا بەرىلدى جاقىندا تاراز قالاسىنىڭ كور­كىنە كورىك قوساتىن اسەم عي­ماراتتىڭ اشىلۋ سالتاناتىنا قا­تىستىق. قازىرگى زامان تالابىنا ساي ساۋلەتتىك سالتاناتپەن بوي كوتەرگەن عيماراتقا وبلىستىق ءبىلىم, مادەنيەت, كاسىپكەرلىك جانە ونەركاسىپ باسقارمالارى مەن ارداگەرلەر كەڭەسى باستاعان 12 مەكەمە ورنالاساتىن بولادى. قۇرى­لى­سى وسىدان 30 جىل بۇرىن قو­ناق ءۇي كەشەنى رەتىندە باستالىپ, 1989 جىلى ءارتۇرى سەبەپتەرمەن مۇلدە توقتاپ قالعان نىساننىڭ ەندىگى ۋاقىتتا اكىمشىلىك ءۇيى رەتىندە پايدالانۋعا بەرىلۋىنە وب­لىس اكىمى قانات بوزىمباەۆتىڭ تاپ­سىرماسى ۇيىتقى بولدى. ياعني, تارازدىقتاردىڭ كوز قۋا­نى­شىنا اينالعان نىسان جۇمى­سىنىڭ وي­داعىداي اتقارىلۋىنا ەربول امان­تاەۆ باسقاراتىن «رەم­ەنەر­گو» جشس مۇدەلىلىك تا­نىت­سا, ولار­عا تاپسىرىس بەرۋشى وب­لىس اكىمدىگىنىڭ قۇرىلىس, جو­لاۋ­شىلار كولىگى جانە اۆتوموبيل جول­دارى باسقارماسى بولىپ تابىلادى. عي­ماراتتىڭ قۇنى 592 786, 970 مىڭ تەڭگەگە باعالاندى. قۇرىلىسشىلار بۇل قارجىنى ءبىر جىل ىشىندە تو­لىقتاي يگەرىپ شىقتى. – بيىل وبلىس بويىنشا بار­لىق سالالاردا 48 عيمارات جاڭا­دان بوي كوتەردى. 730 شاقى­رىمنان استام جول جوندەلدى. 5 ەلدى مەكەنگە تازا اۋىز سۋ بەرىلىپ, 25 اۋىلعا گاز تارتىلدى. بۇنىڭ بارلىعى ەلدەگى ەكونوميكالىق ءوسۋدىڭ جانە وڭىرىمىزدە ونەر­كاسىپتىڭ وتە قارقىندى دامۋىنىڭ ارقاسىندا مۇمكىن بولىپ وتىر, – دەدى تاراز قالاسىنىڭ ءتورى – تولە بي كوشەسىنىڭ بويىنا ورنالاسقان اكىمشىلىك عيماراتىنىڭ اشىلۋ سالتاناتىنا قاتىسقان وبلىس اكىمى قانات بوزىمباەۆ. جاڭا اكىمشىلىك عيماراتىنىڭ پايدالانۋعا بەرىلۋى وسىندا قو­نىستانعان مەكەمەلەردەگى مەملەكەتتىك قىزمەتكەرلەردىڭ كوڭىل كۇيىن كوتەرىپ, ونداعى ماتە­ريال­دىق-تەحنيكالىق بازانىڭ جاق­سار­تا تۇسۋىنە دە سەپتىگىن تيگىزدى. كوسەمالى ساتتىباي ۇلى. جامبىل وبلىسى.