«لوكوموتيۆ قۇراستىرۋ زاۋىتى» اق 100-ءشى تەپلوۆوزدى قۇراستىرىپ شىعاردى. وتاندىق لوكوموتيۆ شىعارۋ ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا ءجۇزەگە اسىرىلۋدا. «قتج» ۇك» اق-تىڭ ەنشىلەس كاسىپورنى «لوكوموتيۆ قۇراستىرۋ زاۋىتى» اق ەلىمىزدەگى اۋىر ماشينا جاساۋ سالاسىنىڭ قارلىعاشى بولىپ تابىلادى.
ءنومىرى 0100-ءشى تەپلوۆوز 18 ءتۇرلى سىناقتان سۇرىنبەي ءوتتى. ەندى وعان «قازاقستان تەمىر جولى» ۇلتتىق كومپانياسى» اق-تىڭ ەلۋ شاقىرىمدىق ماگيسترالدىق جەلىسىندە سىناقتان ءوتۋ قالدى. بۇل سىناقتان دا سۇرىنبەي وتسە, اقتوعاي ستانساسىنىڭ لوكوموتيۆ پايدالانۋ دەپوسىنىڭ پاركى قۇرامىنا كىرەدى. ءسويتىپ, اقتوعاي – سەمەي باعىتىندا جۇك پويىزىن الىپ جۇرەتىن بولادى.
قازاقستانداعى اۋىر ماشينا جاساۋ سالاسىنىڭ تۇڭعىشى «قتج» ۇك» اق-تىڭ ەنشىلەس كاسىپورنى «لوكوموتيۆ قۇراستىرۋ زاۋىتى» اق 2009 جىلعى شىلدەنىڭ 3-ىندە ىسكە قوسىلعان بولاتىن. ەلىمىزدە العاشقى لوكوموتيۆتى قۇراستىرۋ بەس ايدان استام ۋاقىتتى العان بولسا, قازىر زاۋىت قابىرعاسىنان ايىنا تەززا ۇلگىسىندەگى جۇك لوكوموتيۆىنىڭ 6-8-ءى شىعارىلادى. مۇنداي كورسەتكىشتى تۇراقتى ۇستاپ تۇرۋ ءۇشىن زاۋىت ەڭبەككەرلەرى ءۇش اۋىسىمدا تاۋلىك بويى تەر توگەدى.
بۇگىندە كاسىپورىندا وتاندىق تەمىر جول كولىگى ماشيناسىن شىعارىپ قانا قويماي, قازاقستاندىق ءونىم تۇرلەرىن دە كوبىرەك تارتۋعا دەن قويىلۋدا. مۇندا قاراشانىڭ ورتاسىنا قاراي وتاندىق ءونىمدى يگەرۋدىڭ ەكىنشى كەزەڭىنە كوشپەك. وسىلايشا قازاقستاندىق تاۋارلار مەن قىزمەت تۇرلەرىن ساتىپ الۋ كورسەتكىشى 2012 جىلدىڭ ءۇشىنشى توقسانىنا دەيىن 32 پايىزعا جەتكىزىلمەك.
ءابدىراحمان قىدىربەك,
استانا.
