3 قاراشادا ءدارى-دارمەكتەردى ساتىپ الۋ بويىنشا تەندەرگە قاتىسۋعا نيەت بىلدىرگەن الەۋەتتى ءونىم بەرۋشىلەردىڭ وتىنىمدەرىن اشۋ ءراسىمى ءوتتى. تەندەر اياسىندا تۇرعىندارعا تەگىن بەرىلۋى ءتيىس ءدارى-دارمەكتەر مەن مەدبۇيىمداردىڭ 484 ۇستانىمى كورسەتىلدى. بۇلار ۆاكتسينالار, تۋبەركۋلەزگە قارسى پرەپاراتتار, قانت ديابەتى, ۆيرۋستى گەپاتيت جانە باسقا دا الەۋمەتتىك ماڭىزى بار اۋرۋلاردى ەمدەۋگە, ياعني ەمى تەگىن مەديتسينالىق كومەكتىڭ كەپىلدەندىرىلگەن كولەمىنە كىرەتىن پرەپاراتتار.
«سق-فارماتسيا» باسقارما توراعاسىنىڭ مىندەتىن اتقارۋشى اسەمگۇل ەرجانوۆا ساتىپ الىناتىن ءدارى-دارمەكتەردىڭ كولەمىن مەديتسينالىق ۇيىمداردىڭ وزدەرى مالىمدەگەنىن, ال تەگىن ءدارى-دارمەكپەن قامتاماسىز ەتۋ ءۇشىن ءدارى-دارمەكتەر ءتىزىمىن دەنساۋلىق ساقتاۋ مينيسترلىگى بەكىتكەندىگىن اتاپ ءوتتى.
«بىرىڭعاي ديستريبيۋتوردىڭ بۇل تىزىمىنە, ءاربىر پرەپاراتقا شەكتى ساتىپ الۋ باعاسى كورسەتىلە وتىرىپ, بارلىعى 1137 دارىلىك زاتتار مەن مەديتسينالىق ماقساتتاعى بۇيىمداردىڭ اتاۋلارى قوسىلدى. 2018 جىلعا الدىن الا بەرىلگەن وتىنىمدەر بويىنشا بارلىعى 178 ملرد تەڭگە كولەمىندە ساتىپ الۋ جوسپارلانعان. قازىر تەندەر جالپى سوماسى 82,4 ملرد تەڭگەنى قۇرايتىن 489 اتاۋلارعا جاريالاندى», - دەپ ءتۇسىندىردى اسەمگۇل ەرجانوۆا. «بىرىڭعاي ديستريبيۋتوردىڭ تىزىمىندەگى قالعان پوزيتسيالار - بۇل نە قازىردىڭ وزىندە وتاندىق فارماتسەۆتيكالىق وندىرۋشىلەر وندىرەتىن, ولارمەن بىزدە ۇزاق مەرزىمدى شارتتار جاسالعان, نە قازاقستاندا انالوگى جوق, ولاردان ءدارى-دارمەكتەردى تىكەلەي ساتىپ الۋدى جوسپارلاپ وتىرعان شەتەلدىك ءوندىرىستىڭ دارىلىك زاتتارى», - دەپ تولىقتىردى اسەمگۇل ەرجانوۆا.
ەندى دەنساۋلىق ساقتاۋ مينيسترلىگى فارماتسيا كوميتەتى قىزمەتكەرلەرى, بىرىڭعاي ديستريبيۋتوردىڭ قىزمەتكەرلەرى جانە دەنساۋلىق ساقتاۋدىڭ ءتۇرلى سالالارىنىڭ ساراپشىلارى قۇرامىنا كىرەتىن تەندەرلىك كوميسسيا 10 كۇن بويى الەۋەتتى ءونىم بەرۋشىلەردەن كەلىپ تۇسكەن تەندەرلىك وتىنىمدەردى زەرتتەپ, ولاردىڭ زاڭناما تالاپتارىنا, ال مالىمدەلگەن پرەپاراتتاردىڭ - تەحنيكالىق ەرەكشەلىك تالاپتارىنا سايكەستىگى تەكسەرەدى. كوميسسيا ءوز ەسكەرتپەلەرىن بىلدىرگەننەن كەيىن, الەۋەتتى ءونىم بەرۋشىلەردىڭ بەس كۇن ىشىندە ولاردى جويۋعا مۇمكىندىكتەرى بار. بۇل تەندەرلىك پروتسەدۋرالاردىڭ اشىقتىعىن قامتاماسىز ەتەدى. تەك وسىدان كەيىن عانا الەۋەتتى ءونىم بەرۋشىلەر باعانى تومەندەتۋ اۋكتسيونىنا قاتىسۋعا مۇمكىندىك الادى جانە ونىڭ بارىسىندا ەل اۋرۋحانالارىنا تەگىن ءدارى-دارمەك جەتكىزەتىن فارمكومپانيالار انىقتالادى. تەندەرگە قاتىسۋ ءۇشىن بارلىعى 40 فارمكومپانيا ءوتىنىم بەردى.
ءۇردىستىڭ اشىقتىعىن قوسىمشا قامتاماسىز ەتۋ ماقساتىندا تەندەرلىك راسىمدەرگە قاتىسۋ ءۇشىن ءىىم, باس پروكۋراتۋرا, قر ۇقك, ەسەپ كوميتەتى, «نۇر وتان» پارتياسى وكىلدەرىنە شاقىرۋ جىبەرىلدى. قر ءىىم مەديتسينالىق ۇيىمدارىنىڭ جانە بەيىندى قاۋىمداستىقتاردىڭ وكىلدەرى راسىمدەرگە باقىلاۋشى رەتىندە قاتىسۋعا كەلىستى. وتىنىمدەردى اشۋ ءراسىمى «سق-فارماتسيا» جشس سايتىندا جانە فەيسبۋك-اككاۋنتىندا ونلاين رەجىمدە كورسەتىلدى.
