قازاق ۇلتتىق ونەر ۋنيۆەرسيتەتى ءبىرىنشى كۋرس ستۋدەنتتەرىن قابىلداۋ كەشىن وتكىزدى.
سالتاناتتى شاراعا قازاقستاننىڭ ەڭبەك سىڭىرگەن ءارتىسى, پروفەسسور تۇرار الىپباەۆ, بىرقاتار ونەر ادامى, ستۋدەنتتەر, ارنايى شاقىرىلعان قوناقتار قاتىستى.
مەرەكەلى جيىننىڭ اشىلۋىندا تۇرار الىپباەۆ ستۋدەنتتەرگە ارناپ جىلى لەبىزىن ءبىلدىردى. سونداي-اق, ول قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجاەۆانىڭ قۇتتىقتاۋ ءسوزىن وقىپ بەردى.
حاتتا: ء«بىرىنشى كۋرس ستۋدەنتتەرى, بۇل سىزدەر ءۇشىن ەرەكشە ءسات. بۇگىن سىزدەر ەلىمىزدىڭ ەڭ ۇزدىك ۋنيۆەرسيتەتتەرىنىڭ بىرىنە قابىلدانىپ وتىرسىزدار. سالتاناتتى تۇردە ستۋدەنتتىك بيلەتكە يە بولعالى تۇرسىزدار. الدارىڭىزدا ۇلكەن ءبىلىم جولى كۇتىپ تۇر. سىزدەردى وسى مەرەكەلەرىڭىزبەن قۇتتىقتاي وتىرىپ وقۋدا وزات بولۋلارىڭىزدى تىلەيمىن! قادامدارىڭىز نىق بولسىن! ونەر جولىندا الار اسۋلارىڭىز بيىك بولسىن!» دەلىنگەن.
وسىدان كەيىن ستۋدەنتتىك ومىرگە قادام باسقان جاستارعا وقۋ بيلەتىن تاپسىرۋ ءراسىمى ءوتتى. سالتاناتتى راسىمنەن كەيىن جۇرت نازارى كونتسەرتتىك باعدارلاماعا اۋدى. العاش بولىپ ساحناعا بارابانشىلار توبى شىعىپ, ءوز ونەرلەرىن ورتاعا سالدى. ال بيتبوكس ىرعاعىنىڭ شەبەرى, بىرقاتار جارىستا جەڭىمپاز اتانعان بەيبارىس اسقاربەكوۆ جۇرتتى ەرەكشە اۋەنىمەن ءتانتى ەتتى.
قازاق ۇلتتىق ونەر ۋنيۆەرسيتەتى تالانتتى, شىعارماشىل جاستارعا تولى. مۇندا سيقىر ءىلىمىن مەڭگەرىپ, ءتۇرلى فوكۋستار كورسەتىپ جۇرگەن جاستار دا جوق ەمەس. سولاردىڭ ءبىرى – ايان نۇرلىباەۆ ءوز ونەرىن كورسەتتى. كورەرمەندەر اراسىنان بىرنەشە ادامدى تاڭداپ الىپ, الدارىنا كىتاپ قويدى. العاشقىسىنا كىتاپتىڭ بەتىن, ەندى بىرىنە سول بەتتەگى العاشقى ءسوزدى تاڭداتتى. ال سيقىرشىنىڭ ءوزى بۇل ساتتە نازارىن باسقا جاققا اۋدارىپ تۇرعان بولاتىن. وسىدان كەيىن ول قولىنداعى تاقتايشاعا كىتاپتىڭ بەت سانى مەن العاشقى ءسوزدى اينىتپاستان جازىپ, جۇرتتى تاڭ قالدىردى.
ءوز كەزەگىندە ارت-مەنەدجمەنت سالاسىنىڭ ستۋدەنتتەرى مىڭ بۇرالا بيلەپ, ءتۇرلى كورىنىستەر قويدى.
ونەر ورداسى بولعاننان كەيىن بۇل جيىننان ديزاينەرلەر دە شەت قالمادى. ولار كورەرمەندەر الدىندا ءسان كورسەتىلىمىن وتكىزدى. ءتۇرلى ديزاينەرلىك كيىمدەردى كورگەننەن كەيىن جۇرت بەينە ءبىر ميلانداعى, پاريجدەگى ءسان اپتالىعىنا ەنىپ كەتكەندەي كۇيدە قالىپ, تاڭدانىستارىن جاسىرا المادى.
قازاق ۇلتتىق ونەر ۋنيۆەرسيتەتىندە ستۋدەنتتەردىڭ باسىم بولىگى – بولاشاق اكتەرلەر. ولاردىڭ ءوزارا ءتۇرلى توپتارى دا بار. بۇل كەشتە ساحنانىڭ كوركىن قىزدىرعان اكتەرلەر دەپ ايتساق جاڭىلماعان بولار ەدىك. «بالالىق شاققا ساياحات». مىنە, بولاشاق ساحنا يەلەرى وسى ماقساتتا ءتۇرلى ونەرلەرىن كورسەتتى. ونەرپازدار «Tom and Jerry», «نۋ, پوگودي!» سەكىلدى مۋلفيلمدەردەن, ءبىر كەزدەرى كوپشىلىك اراسىندا ۇلكەن قىزىعۋشىلىققا يە بولعان «Grand Theft Auto (GTA)» ويىنىنان كورىنىس قويدى.
ال جۇرگىزۋشىلەر ءتۇرلى ازىلدەرى مەن كۇلكىلى وبرازدارى ارقىلى جينالعان قاۋىمنىڭ ريزاشىلىعىنا بولەندى.
«بۇل ناعىز شىعارماشىل جاستاردىڭ ورداسى, سولاردىڭ الەمى. شىعارماشىل جانداردىڭ ىشكى جان-دۇنيەسى سونداي نازىك كەلەتىنىن ۇمىتپاعان ءجون. ساپالى دۇنيە جارىققا شىعۋى ءۇشىن ارقايسىسىنىڭ ەبىن تابا ءبىلۋ قاجەت. ارت-مەنەدجمەنت سالاسىندا ءبىلىم الىپ جۇرگەننەن كەيىن بىرنەشە ستۋدەنت بىرىگىپ, وسى كەشتى وتكىزۋدى قولعا الدىق. سوڭعى كۇندەرى ۇيقىنى دا ۇمىتتىق, سەبەبى جوعارى دەڭگەيدە ءوتۋى ءۇشىن ءبارىن جان-جاقتى قاراستىردىق. مىنە, ستۋدەنت كۇنىمىزدەن باستاپ وسىلاي تاجىريبە جيناپ ءجۇرمىز. ماقساتىمىز – وقۋىمىزدى بىتىرگەننەن كەيىن باسەكەگە قابىلەتتى جاستاردىڭ قاتارىنا قوسىلۋ», – دەدى ۇيىمداستىرۋشىلاردىڭ ءبىرى كارينا يۋسۋپوۆا.
ءيا, بولاشاق ءبىلىمدى جاستاردىڭ قولىندا. مۇنداي تالانتتى, كاسىبي ورەندەرىمىز باردا قازاق ونەرى ءبىر ورىندا تۇرىپ قالماسى انىق...
ايان ءابدۋالي,
«ەگەمەن قازاقستان»
