وسى ورايدا ماڭعىستاۋ وبلىسىندا كوپتەگەن جوبالار جۇزەگە اسىرىلۋدا. بيۋدجەتتەن تىس قارجىعا مەكتەپ, بالاباقشا, جولدار جوندەلىپ, وقۋ عيماراتتارىنىڭ ماتەريالدىق-تەحنيكالىق بازاسى جاڭارتىلىپ, كاسىپكەرلەر جەرلەستەرىنە قولداۋ كورسەتۋدە, دەپ حابارلادى ماڭعىستاۋ وبلىسى اكىمدىگىنىڭ ءباسپاسوز قىزمەتى egemen.kz تىلشىسىنە.
تۋعان جەرگە تاعزىم جاساعانداردىڭ ءبىرى - شەتپە اۋىلىنان شىققان كاسىپكەر. ول جەرلەستەرىنە تاماشا تارتۋ جاساپ, اۋىلدا زامان تالابىنا ساي سپورت كەشەنىن سالىپ بەردى. سۇڭعات مۇڭالباەۆ كەشەن قۇرىلىسىنا 200 ملن. تەڭگەسىن جۇمساعان. قۋانعان اۋىل تۇرعىندارى ءزاۋلىم سپورت كەشەنىنىڭ اشىلۋ سالتاناتىنا تاي-تۇياعى قالماي تۇگەل جينالدى. مۇندا ءبىر مەزگىلدە 100 ادامعا دەيىن جاتتىعا الادى. سپورت كەشەنىندە ۆولەيبول, باسكەتبول مەن شاعىن فۋتبول زالدارىمەن قاتار تالاپقا ساي جابىق باسسەين اشىلدى. بوكس پەن كۇرەس ۇيىرمەلەرى جۇمىس ىستەي باستادى.
«اۋدانىمىز سپورتتان كەندە ەمەس. الەم چەمپيوندارى, ازيا چەمپيوندارى قاسىمىزدا ءجۇر. ەندى, ءبىزدىڭ بيىك شىڭىمىز, وليمپيادا چەمپيونىن دايىنداۋ. نەگىزىنەن سپورتتىڭ شىڭىنا شىعاتىنداردىڭ كوبى اۋىلدى جەردەن شىعادى. ونىڭ ۇستىنە ءدال مىناداي زامانعا ساي سپورت كەشەنىنىندە جاتتىعىپ, دايىندالاتىن بولسا بالالارىمىزدان دا ءۇمىتىمىز زور», – دەيدى قر قۇرمەتتى سپورت قايراتكەرى ساباقباي تىلەگەنوۆ.
ايتا كەتەيىك, ماڭعىستاۋ اۋدانىندا تاپ وسىنداي التى بىردەي سپورت كەشەنى اۋىل كاسىپكەرلەرىنىڭ قارجىلاندىرۋىمەن سالىنىپ جاتىر. اۋىل ازاماتتارى تۋعان جەرگە دەگەن ىستىق ىقىلاسىن وسىلايشا بىلدىرمەك نيەتتە, دەلىنگەن ءباسپاسوز حابارلاماسىندا.
گۇلايىم شىنتەمىرقىزى,
«ەگەمەن قازاقستان»
