وندىرىستىك ءوسىم 4,7 پايىزدى قۇراپ, 1077 ملرد تەڭگەنىڭ ءونىمى وندىرىلگەن. وڭىردەگى 9,1 پايىزدىق دەڭگەيدى قۇراعان وڭدەۋ ونەركاسىبىنىڭ ءوسىمى قازاقستان اۋماعىندا كوش باسىندا تۇر. وبلىس ەكونوميكاسىنا تارتىلعان ينۆەستيتسيانىڭ ەسەپتىك كەزەڭدە 21,1 پايىزعا وسكەن ناقتى كولەمىنىڭ يندەكسىمەن دە الدىڭعى قاتاردا. اۋىل شارۋاشىلىعىنىڭ جالپى كولەمىنىڭ ءوسىمى 3,9 پايىزدى قۇراسا, ارەكەت ەتەتىن شاعىن جانە ورتا بيزنەس سۋبەكتىلەرىنىڭ سانى 10,9 پايىزعا, بولشەك ساۋدا اينالىمى 7,9 پايىزعا جەتكەن.
ب.ساپارباەۆ قۇرىلىس كولەمىنىڭ ءوسىمى 10,3 پايىزدى قۇراپ, 390 مىڭ شارشى مەتر تۇرعىن ءۇي پايدالانۋعا بەرىلگەنىن ايتتى. جىل سوڭىندا 650 مىڭ شارشى مەتر تۇرعىن ءۇي يەلەرىنە تاپسىرىلماق. «وبلىستىڭ سالىق سالۋ نەگىزى دە ارتتى. وتكەن جىلمەن سالىستىرعاندا كولەم 72,5 ملرد تەڭگەنى قۇراپ, 7 پايىزعا ءوستى. ەكونوميكا ءوسىمى مەن الەۋمەتتىك تۇراقتىلىق وڭىردەگى جۇمىسپەن قامتۋدى ساقتاپ قالۋعا مۇمكىندىك بەردى. جۇمىسسىزدىق 4,8 پايىز دەڭگەيىندە. 15,2 مىڭ جاڭا جۇمىس ورنى قۇرىلدى. جىل سوڭىنا دەيىن 1,3 مىڭ جاڭا جۇمىس ورنى اشىلادى», دەدى اكىم.
ب.ساپارباەۆ پرەزيدەنت باستاماسىمەن پوستكەڭەستىك كەڭىستىكتە جاڭا تەحنولوگيالار مەن ينۆەستيتسيالاردى تارتۋ جانە ەنگىزۋ ماقساتىندا وتكەن ەكسپو-2017 حالىقارالىق كورمەسىنىڭ ءساتتى ۇيىمداستىرىلعانىن اڭگىمەلەدى. «حالىقارالىق ماڭىزدى شارانى 140 مىڭ اكتوبەلىك كورسە, ونىڭ 92-ءسى – وبلىستىڭ اناعۇرلىم ءىرى كاسىپورىندارىنىڭ وكىلدەرى, 20 مىڭنان استامى – ءوز وندىرىستەرىنە الدىڭعى قاتارلى تەحنولوگيالاردى ەنگىزۋ مۇمكىندىكتەرىن ۇيرەنگەن كاسىپكەرلەر», دەدى ول. ناتيجەسىندە وبلىستاعى كاسىپورىندار كورمەدە ۇسىنىلعان 18 ۇزدىك الەمدىك تەحنولوگيانى تاڭداپ العان. بۇل جاڭالىقتاردى قولدانۋ ءوڭىردىڭ ەكولوگيالىق جاعدايىن جاقسارتۋعا, ەنەرگيانى تۇتىنۋ مەن ەڭبەك ونىمدىلىگىنىڭ تيىمدىلىگىنە وڭ اسەرىن تيگىزبەك. ولاردى ترانسفەرتتەيتىن ينۆەستيتسيا كولەمى – 43 ملرد تەڭگە.
اكىم ءباسپاسوز ءماسليحاتىندا وبلىستاعى ۇدەمەلى يندۋستريالىق-يننوۆاتسيالىق دامۋ مەملەكەتتىك باعدارلاماسى جوبالارىنىڭ جۇزەگە اسىرىلۋى تۋرالى دا ايتتى. «ەكىنشى بەسجىلدىق اياسىندا 127 ملرد تەڭگەنى قۇرايتىن ينۆەستيتسياعا 1,8 مىڭ جۇمىس ورنىمەن قامتاماسىز ەتەتىن 16 جوبا جۇزەگە اسىرىلۋدا. ولاردىڭ ىشىندە ينۆەستيتسيالار كولەمى 18,5 ملرد تەڭگەنى قۇرايتىن 14 جوبا ىسكە قوسىلدى. مىڭنان اسا جۇمىس ورنى قۇرىلدى», دەدى بايانداماشى. بۇدان باسقا 2017 جىلى باعدارلامادان تىس 13,8 ملرد تەڭگەنى قۇرايتىن 8 ينۆەستيتسيالىق جوبا جوسپارلانعان, ونىڭ ىشىندە 6,7 ملرد تەڭگەنى قۇرايتىن 4 جوباسى ىسكە قوسىلىپ, 265 جۇمىس ورنى اشىلعان.
وبلىس اكىمى قازاقستاننىڭ باتىسىندا العاش اشىلعان «Aktobe Medical Center» مەديتسينالىق كلاستەرىنىڭ دامۋى جايىندا اڭگىمەلەدى. بۇگىندە وندا 400-دەن استام جوعارى تەحنولوگيالىق وتا جاسالسا, ونىڭ ىشىندە باۋىر مەن بۇيرەكتى اۋىستىرۋ سىندى كۇردەلى وتالار دا بار. جاڭا تەحنولوگيالاردى ازىرلەۋ مەن ەنگىزۋدەگى ارىپتەستەر – وڭتۇستىك كورەيا, پولشا, تۇركيا جانە باسقا ەلدەردەگى ەڭ مىقتى دارىگەرلەر مەن مەديتسينالىق ۇيىمدار. «مەديتسينالىق كلاستەردى دامىتۋدا مەملەكەت-جەكەمەنشىك ارىپتەستىگى تەتىكتەرى بەلسەندى قولدانىلۋدا. ماسەلەن, تۇرىك ينۆەستورلارى 2,4 ملرد تەڭگە تۇراتىن جەدەل جاردەم ستانساسىن سالدى. بىرەگەي قۇرىلىس نىسانى – وفتالمولوگيالىق اۋرۋحانانىڭ, 300 كەلۋشىگە ارنالعان قالالىق بالالار ستوماتولوگياسىنىڭ قۇرىلىسى اياقتالۋعا جاقىن, پوزيتروندى-ەميسسيوندى توموگرافيالىق ورتالىقتىڭ, ەكى قالالىق ەمحانا مەن 20 دەنساۋلىق ساقتاۋ مەكەمەسىنىڭ قۇرىلىس جۇمىستارى جۇرۋدە. ايماقتا دەنساۋلىق ساقتاۋ سالاسىندا ءمجا بويىنشا جالپى قۇنى شامامەن 14 ملرد تەڭگەنى قۇرايتىن 26 نىسان سالىنۋدا», دەگەن ب.ساپارباەۆ بارلىق نىساندا ەكسپو-2017 كورمەسىندە ۇسىنىلعان نەمىس, وڭتۇستىككورەيالىق, اۋستريالىق جانە تۇرىك وندىرۋشىلەرىنىڭ يننوۆاتسيالىق ازىرلەمەلەرى مەن جابدىقتارى قولدانىلاتىنىن مالىمدەدى. سونىمەن قاتار وڭىردە ءومىر ءسۇرۋ ۇزاقتىعىن ارتتىرۋ, جالپى جانە نارەستەلەر ءولىمىنىڭ ازايۋى بايقالادى.
وبلىستا بيىل مەملەكەت-جەكەمەنشىك ارىپتەستىگى مەن بيزنەستىڭ الەۋمەتتىك جاۋاپكەرشىلىگى اياسىندا شامامەن 50 ملرد تەڭگەگە جۋىق ينۆەستيتسيا كولەمىن قۇرايتىن 125 جوبا جۇزەگە اسىرىلۋدا. «مەملەكەت باسشىسى ءمجا دامىتۋعا ەرەكشە كوڭىل بولەدى. بۇل مەحانيزم ۇزاق مەرزىمدى پەرسپەكتيۆاعا وبلىستىق بيۋدجەتكە دەگەن جۇكتەمەنى ازايتىپ قانا قويماي, حالىقتىڭ الەۋمەتتىك قامسىزداندىرۋ ماسەلەسىن جاقسارتادى», دەدى ءوڭىر باسشىسى.
ايماق بيزنەستىڭ الەۋمەتتىك جاۋاپكەرشىلىگىن جانە مەملەكەتتىك-جەكەمەنشىك سەرىكتەستىكتى دامىتۋدا جەتەكشى ورىندا تۇر. ماسەلەن, «قازحروم» تۇك» اق بيزنەستىڭ الەۋمەتتىك جاۋاپكەرشىلىگى اياسىندا 1,5 ملرد تەڭگەنى قۇرايتىن بالالاردى دامىتۋعا ارنالعان شىعارماشىلىق اكادەمياسىن سالعان. «CNPC-اقتوبەمۇنايگاز» اق قاراجاتى ەسەبىنەن قازاقستاننىڭ باتىس ايماعىنداعى ەڭ ءىرى ونەر ورتالىعى ىرگە قالاعان. ء«سابي» جەكە قايىرىمدىلىق قورىنىڭ ينۆەستيتسيالارى ارقاسىندا «مەيىرىم» الەۋمەتتىك بەيىمدەلۋ ورتالىعى تۇرعىزىلدى. قازاقستاندا بالاماسى جوق بۇل كەشەندە 16-29 جاس ارالىعىنداعى بالالار ءۇيىنىڭ توقساننان اسا تۇلەگى جۇمىس ىستەيدى. بەردىبەك ساپارباەۆ جيىن بارىسىندا تىلشىلەر ساۋالدارىنا جاۋاپ بەردى.
اسحات رايقۇل,
«ەگەمەن قازاقستان»
