قازاق ادەبيەتىنىڭ كورنەكتى وكىلى, كوركەمسوز ونەرىنىڭ ۇلكەن شەبەرى سايىن مۇراتبەكوۆتىڭ قاي شىعارماسىنىڭ دا دەڭگەيىنىڭ تومەنى جوق. 1950-جىلداردىڭ باسىندا العاشقى شىعارمالارى جاريالانا باستاعان كەزدەن بەرى وقىرمان قاۋىم ونىڭ «مەنىڭ قارىنداسىم», «اۋىل وتى», «كوكوراي», «وتاۋ ءۇي», «دوس ىزدەپ ءجۇرمىن», «جابايى الما», «ەسكەك جەل» سەكىلدى جيناقتارىن قۇمارتا وقۋمەن كەلەدى. ونىڭ شىعارمالارى وقيعا جەلىسىنىڭ شىنايىلىعىمەن, كەستەلى تىلىمەن, كەيىپكەرلەرىنىڭ بيىك ادامگەرشىلىك قاسيەتتى جوعارى قوياتىندىعىمەن ەرەكشەلەنىپ تۇرادى.
كوزى تىرىسىندە بەرگەن سۇحباتتارى مەن ەستەلىك جازبالارىندا سايىن اعامىز كۇز مەزگىلىن ەرەكشە جاقسى كورەتىنىن كوپ ايتاتىن ەدى. ءوزى دە كۇز مەزگىلىندە دۇنيەگە كەلگەن-ءدى. كۇز كەلگەلى كەلبەتىن وزگەرتىپ, سان ءتۇرلى بوياۋلارعا مالىنىپ تۇرعان الماتىنىڭ تامىلجىعان كۇنىندە قالامگەرگە ارنالعان تاقتانىڭ ورناتىلۋى قازاق ادەبيەتىنە جاسالعان تارتۋ سياقتى قابىلداندى. سەبەبى ءتورت قاباتتى ەڭسەلى ءۇيدىڭ قابىرعاسى بۇل ەسكەرتكىش-تاقتانى ون جىل بويى كۇتتى. تالانتتى جازۋشىنىڭ كەيىنگى ومىرىنە بايلانىستى اتقارىلار كوپ شارۋانىڭ ءبىرى وسى بولاتىن, ول دا ورىنداۋىن تاپقاندا قۋانباعان ادام كەمدە-كەم ەدى.
زەنكوۆ پەن شەۆچەنكو كوشەلەرىنىڭ قيىلىسىنداعى ءۇيدىڭ قابىرعاسىنا ورناتىلعان تاقتانىڭ شىمىلدىعىن اقىن, بەلگىلى قوعام قايراتكەرى ولجاس سۇلەيمەنوۆ, قازاقستان جازۋشىلار وداعىنىڭ توراعاسى نۇرلان ورازالين جانە جازۋشىنىڭ تۋعان باۋىرى ابىلاكىم اۋباكىروۆ ءتۇسىردى. تاقتا الدىندا ادەبيەتتەگى قاتارلاستارى مەن جاسى كىشى ىنىلەرى سايىن مۇراتبەكوۆتىڭ ادامي كەلبەتى مەن ادەبي قارىمىن تەڭ ءسوز ەتتى. ءوز كەزەڭىندە قازاقستان جازۋشىلار وداعىن بىرگە باسقارعان, قاناتتاس, قالامداس قۇرداسى ولجاس سۇلەيمەنوۆ ءبىر ءسات وتكەندى ەسكە الىپ, دوسىنىڭ اتى تاريحتا قالاتىنىنا سەنىم ءبىلدىردى.
قازاقستان جازۋشىلار وداعىنىڭ توراعاسى نۇرلان ورازالين, اقىن مارفۋعا ايتقوجينا, باۋىرى مەن بالالارى قارىمى بولەك قالامگەردىڭ ەرەكشە جارالعان ادامي بولمىس-ءبىتىمىن تەبىرەنە تۇرىپ ەسكە الدى. ءبارى دە قالامگەرگە كورسەتكەن قۇرمەتى ءۇشىن قالا اكىمدىگىنە العىسىن ءبىلدىردى.
ايگۇل احانبايقىزى,
«ەگەمەن قازاقستان»
الماتى
