جوبانىڭ جالپى قۇنى 2 ميلليارد تەڭگەنى قۇرايدى. ال اتالعان قارجىنىڭ 1,2 ميلليارد تەڭگەسى «قازاگرو» حولدينگىنىڭ قۇرىلىمىنداعى كومپانيا «قازاگروقارجى» اكتسيونەرلىك قوعامى ارقىلى قارجىلاندىرىلادى. كاسىپكەرلىكتى قولداۋ جانە ونى ناسيحاتتاۋ ماقساتىندا «قازاگرو» حولدينگى بايزاق اۋدانىنا جۋرناليستەر ءۇشىن تۋر ۇيىمداستىرىپ, وعان رەسپۋبليكالىق گازەتتەر مەن تەلەارنالاردىڭ جامبىل وبلىسىنداعى مەنشىكتى تىلشىلەرى, سونداي-اق وبلىستىق باسىلىمداردىڭ تىلشىلەرى قاتىستى. «اۋليە-اتا فەنيكس» جاۋاپكەرشىلىگى شەكتەۋلى سەرىكتەستىگىنىڭ ديرەكتورى فاريدا ءجۇنىسوۆا جۋرناليستەرگە سۇحبات بەرىپ, فابريكانىڭ بۇگىنگى تاڭداعى تىنىس-تىرشىلىگىمەن تانىستىردى. «بۇگىندە كاسىپورىن «حالال» ستاندارتى بويىنشا جوعارى ساپالى قۇس ەتىنىڭ ءوندىرىسىن جولعا قويدى جانە جىل باسىنان بەرى 3 مىڭ توننادان استام ءونىم شىعاردى. العاشقى ەكسپورت رەسەي مەملەكەتىنە شىعارىلدى. ەندى باسقا ەلدەرگە دە ەكسپورتتىق مۇمكىندىكتەردى كەڭەيتۋ ماقساتىندا كەلىسسوزدەر جۇرگىزىلۋدە», دەيدى ف.ءجۇنىسوۆا. سونداي-اق كاسىپورىن باسشىسى قۇس ءونىمى قازاقستاننىڭ بارلىق ايماقتارىمەن قاتار, استانا قالاسىن دا قامتيتىندىعىن ايتىپ ءوتتى.
ءوندىرىس ورنى نەگىزىنەن 1978 جىلى سالىنعان. الايدا توقسانىنشى جىلدارداعى كۇردەلى كەزەڭدە جۇمىس ىستەمەي قالعان كاسىپورىن تۇيەتاۋىق وسىرەتىن ەسكى قۇس فابريكاسىنىڭ بازاسىندا قۇرىلعان. ال جوبانى ىسكە اسىرۋ بارىسىندا 16 تاۋىققوراعا, قويمالارعا, زەرتحاناعا جانە اكىمشىلىك عيماراتىنا كۇردەلى جوندەۋ جۇرگىزىلگەن. سونداي-اق سويۋ جانە قوسپاجەم تسەحتارى قايتا قالپىنا كەلتىرىلىپ, ينكۋباتور ءۇيى سالىنعان. بۇل تۇرعىدا مەملەكەتتىڭ دە قولداۋىنىڭ اسا ماڭىزدى ەكەنىن اتاپ وتكەن ءجون. ماسەلەن, «بيزنەستىڭ جول كارتاسى-2020» باعدارلاماسى شەڭبەرىندە نىسان قۇرىلىسى كەزىندە 547 ميلليون تەڭگەگە كوممۋنيكاتسيالىق جۇيەلەردىڭ كەڭەيتىلگەن جەلىسى جۇرگىزىلگەن.
كاسىپورىن باسشىسى فابريكانىڭ بولاشاق جوسپارلارىمەن دە ءبولىستى. «الداعى ۋاقىتتا «قازاگرو» حولدينگىنىڭ قولداۋىمەن كاسىپورىننىڭ قۋاتىن 20 مىڭ تونناعا دەيىن جەتكىزۋ جوسپاردا بار. قۇس شارۋاشىلىعى كەشەنى وڭىردە 40 ساۋدا ورنىن اشۋعا مۇمكىندىك بەرەدى», دەيدى فاريدا امانسارىقىزى.
جالپى, قازاقستاننىڭ قۇس شارۋاشىلىعى سالاسىندا 2010 جىلدان باستاپ وتاندىق قۇس فابريكالارىنىڭ ءوندىرىس كولەمىنىڭ ءوسىمى 136,4 پايىزدى قۇراپ وتىر. سونداي-اق سالا دامۋىنىڭ وڭ ديناميكاسىنا «قازاگرو» ۇلتتىق حولدينگىنىڭ ينۆەستيتسيالىق جوبالاردى قارجىلاي قولداۋى ىقپال ەتكەنىن دە ايتىپ ءوتۋ كەرەك.
جامبىل وبلىسى بويىنشا «قازاگرو» حولدينگىنىڭ ينۆەستيتسيالىق قورجىنىندا قۇنى 8,4 ميلليارد تەڭگەنىڭ جوباسى بار. سونىمەن قاتار بايزاق اۋدانىنداعى «اۋليە-اتا فەنيكس» قۇس فابريكاسى جانە ت.رىسقۇلوۆ اۋدانىنداعى «لۋگوۆوي جىلقى زاۋىتى» جاۋاپكەرشىلىگى شەكتەۋلى سەرىكتەستىگى وبلىستاعى ەڭ ءىرى جوبالار قاتارىنا جاتادى. ايتا كەتەيىك, اعىمداعى جىلى وبلىستا «قازاگرو» جەلىسى بويىنشا 900,1 ميلليون تەڭگەگە 7 نەسيە سەرىكتەستىكتەرى قارجىلاندىرىلعان. الداعى ۋاقىتتا دا اتالعان سەرىكتەستىكتەر اۋليەاتانىڭ الەۋەتىن ارتتىراتىن جوبالار قاتارىنان كورىنەتىن بولادى.
حاميت ەسامان,
«ەگەمەن قازاقستان»
جامبىل وبلىسى
