قازاقتىڭ بالۋانى, ءانشى-كومپوزيتور, سەرى, حالىق اراسىندا بالۋان شولاق اتانعان نۇرماعانبەت بايمىرزا ۇلىنىڭ ومىرىنەن سىر شەرتەتىن قويىلىمدى تەاتر ۇجىمى 1 قازان كۇنى ستوكۋەلل تەاترىنىڭ (Stockwell Playhouse) ساحناسىندا جينالعان كورەرمەنگە ۇسىندى. كۇرەسكەر تۇلعا بالۋان شولاقتىڭ ساحنالىق بەينەسىن تەاترىمىزدىڭ تالانتتى اكتەرى, ساحنا شەبەرى ەرلان ءبىلال سومدادى.
لوندونداعى بۇل فەستيۆال بەلگىلى قازاق جازۋشىسى, دراماتۋرگ دۋلات يسابەكوۆتىڭ 75 جىلدىعىنا وراي ۇيىمداستىرىلىپ وتىر. بيىل ءۇشىنشى مارتە وتكىزىلىپ وتىرعان فەستيۆالدىڭ ۇيىمداستىرۋشىسى – لوندونداعى ايتماتوۆ اكادەمياسى. 2011 جىلى لوندون قالاسىندا پروفەسسور, فيلوسوفيا عىلىمدارىنىڭ دوكتورى راحيما ابدۋۆاليەۆا نەگىزىن قالاعان ايتماتوۆ اكادەمياسى – ايگىلى جازۋشىنىڭ شىعارمالارىن الەم تىلدەرىنە اۋدارۋمەن جانە ۇلى جازۋشى قالدىرعان مول مۇرانى دارىپتەۋمەن اينالىسادى.
ەلىمىزدە وتكەن اۋقىمدى, ماڭىزدى جوبالاردىڭ ءبىرى – ەكسپو-2017 حالىقارالىق مامانداندىرىلعان كورمەسىنىڭ مادەني باعدارلاماسى اياسىندا كوپتەگەن ءىس-شارالاردىڭ اتقارىلعاندىعى بارشامىزعا بەلگىلى. ءارتۇرلى باعىتتا وتكەن تەاتر جانە كينو فەستيۆالدەرى, ارقانداي كونتسەرتتەر مەن كورمەلەر قازاقستاندىقتار مەن شەتەلدىك قوناقتارعا ەرەكشە اسەر قالدىرسا, ءوز سالاسىنىڭ ماماندارى ءۇشىن تاجىريبە الماسۋ مەكتەبى بولدى. ەكسپو-2017 كورمەسى نەگىزىندە وتكەن مادەني جانە سپورتتىق شارالاردىڭ جوعارى دەڭگەيدە ۇيىمداستىرىلۋى – مادەنيەت جانە سپورت مينيسترلىگىنىڭ قاجىرلى ەڭبەگىنىڭ جەمىسى. حالىقارالىق كورمەنىڭ ۇلىبريتانيا پاۆيلونىندا وتكەن اعىلشىن تىلىندەگى شىعارمالاردىڭ تۇساۋكەسەرىندە جازۋشى-دراماتۋرگ دۋلات يسابەكوۆتىڭ شىعارمالارىن الىس-جاقىن شەتەلدەن كەلگەن مەيماندار جوعارى باعالاعان بولاتىن.
انگليا پارلامەنتىنىڭ جوعارعى لوردتار پالاتاسىنداعى دۋلات يسابەكوۆپەن كەزدەسۋ وتە اسەرلى بولدى.
مادەنيەت جانە سپورت مينيسترلىگىنىڭ وسى كەلەلى ءىس-شارانى موينىنا الىپ, قازاق تەاتر ونەرىنىڭ الەم ساحناسىندا سالتانات قۇرۋىنا اتسالىسۋى – ۇلت رۋحانياتىنىڭ الەمدىك كەڭىستىكتە ەركىن كوسىلۋىنە ءوز سەپتىگىن تيگىزدى.
گۇلزيا سادۋاقاسوۆا
